LIPOLELO 32

₁“Sekehang tsebe,

lōna maholimo,

'me ke tla bua;

lefatše le ke le utloe

polelo tsa molomo oa ka.

₂Thuto tsa ka

li tla rotha joaloka pula,

polelo tsa ka

li monyele joaloka phōka,

joaloka lefafatsane

holim'a joang bo botalana,

le joaloka molupe holim'a lijalo.

₃“Ke tla phatlalatsa

lebitso la Morena;

lōna le thōhōletse

boholo ba Molimo oa rōna.

₄“Eena ke Lefika,

mosebetsi oa hae o hloka koli,

litsela tsohle tsa hae li na le toka;

ke Molimo ea tšepahalang,

ea se nang bokhopo;

o lokile, 'me o nepa kamehla.

₅“Ba itšilafalitse,

ha e sa le bana ba hae,

ba likoli,

ke molōko o khelohang, o khopo.

₆Le buseletsa Morena

ka mokhoa o tjee,

lōna chaba sa lithoto,

chaba sa litseketseke?

Na hase eena Ntat'a lōna

le 'Mōpi oa lōna?

O le bōpile, a le etsa sechaba.

₇“Hopolang mehla ea khale-khale,

nahanang mengoaha

ea melōko ea pele,

botsang bo-ntat'a lōna,

'me ba tla le joetsa,

baholo ba lōna ba tla le bolella.

₈Ha Raliphahama a aba,

a abela machaba linaha,

a arola bana ka merabe ea bona,

a na a sehela lichaba meeli,

ho ea ka palo ea bana ba Iseraele.

₉Seabo sa Morena ke sechaba sa hae,

Jakobo ke karolo ea lefa la hae.

₁₀“A na a mo fumana

a lelera lehoatateng,

feelleng le bolutu la lipukupuku;

a mo sireletsa, a mo baballa,

a mo hlokomela seka thaka ea leihlo.

₁₁Joaloka ntsu

e phaphamisa malinyane a eona,

e a okaokela,

e thathalatsa mapheo,

e hloibile malinyana a eona,

e a jara ka mapheo a eona,

₁₂Morena a mo tataisa a le inotši,

a sa thusoe ke melimo e meng.

₁₃“A mo etsa 'musi

oa phahama tsa lefatše,

a phela ka ho ja mabehoa-ke-naha;

a mo momontša

mahe a linotši a e-tsoa lefikeng,

a mo fa ole

e e-tsoa fikeng la moralla;

₁₄sereleli ea e-ba sa serema sa khomo,

lebese ea e-ba le mafura la linku,

mafura ea e-ba a likonyana,

lipheleu le lipōli

ea e-ba tsa Bashane,

koro ea e-ba e lefi le thata,

a noa lero la morara le lefubelu.

₁₅“Jakobo a ja, a khōra,

Jeshurune a nona, a b'a penya,

a lahla Molimo e le 'Mōpi oa hae,

a nyelisa Fika le mo pholositse.

₁₆Ba mo phephetsa

ka melimo e meng,

ba mo halefisa

ka manyala a melingoana.

₁₇Ba etsa mahlabelo,

ba a etsetsa bademona,

e seng Molimo,

ba hlabela melimo

eo ba sa kang ba e tseba,

ba hlabela melimo e mecha,

melimo eo bo-ntat'a bona

ba sa kang ba e tšaba.

₁₈Ha lea tsotella Fika le le emotse,

le lebetse Molimo,

‘Mōpi oa lōna.’

₁₉“Morena a bona hona,

'me a ba nyonya,

a lahla bara le barali ba hae.

₂₀‘Ke tla ba patela fahleho sa ka,’

ha rialo Morena,

'ke bone na ba tla fella kae;

ke molōko o khelohileng,

oa bana ba hlokang botšepehi.

₂₁Ba mphephelitse

ka hoo e seng Molimo,

ba nkhalefisa

ka melimo ea mafeela;

ke tla ba phephetsa

ka bao e seng sechaba,

ke ba halefise

ka chaba se hloka kelello.

₂₂Khalefo ea ka e tuka malakabe,

e tlōkōma

ho ea fihla Qalong ea Bafu,

e timetsa lefatše le tsa eona,

e chesa le methèo ea lithaba.

₂₃“ ‘Ke tla ba lihela

bomalimabe holimo,

metsu ea seqha sa ka

e felle holim'a bona.

₂₄Sekoboto, feberu le seoa

li tla ba qeta,

ke rōmele libatana li ba harōle,

le mahlōkō a lihahabi tsa lefatše.

₂₅Sabole e tla ja bana mabaleng,

e timetse ngoanana le moshanyana,

lesea le leqheku ka ho tšoana,

ka matlung teng ho buse tšabo.

₂₆Ke ne ke itse ke tla ba hasanya,

bitso la bona le felisoe har'a batho,

₂₇hoja ha ke tsoafe ho thabisa sera,

sa tšoha se ithorisa,

se re:

Ke ka matsoho a rōna

re ba hlōtseng,

hase Morena

ea entseng tsena tsohle.’

₂₈“Ke chaba se hlokang kelello,

kutloisiso ha e eo ho sona.

₂₉Ha se ne se le bohlale,

se utloisisa,

se ne se tla lemoha

pheletso ea sona.

₃₀Motho a ka phalalisa sekete

a le inotši?

Ba babeli

ba lelekisa li le leshome,

Fika la bona le sa ba rekisa,

Morena a sa neelana ka bona?

₃₁‘Fika’ la bona

ha e ke Fika la rōna,

le lira tsa rōna li ka re pakela.

₃₂Ke makala a morara oa Sodoma,

a khethutsoe masimong a Gomora;

morara oa eona o tletse mahlōkō,

masihla a eona aa baba ha a jeoe.

₃₃Veine ea teng ke chefō ea lihahabi,

ke mahlōkō a bohale a bo-marabe.

₃₄“Na tsee ha lia bōlōkoa

sesiung sa ka,

tsa bitielloa letlōleng la ka?

₃₅Phetetso le puseletso ke tsa ka,

mohla maoto a bona

a khetsemelang;

tsatsi la tlokotsi ea bona

le atametse,

timelo ea bona e potlakile.

₃₆“Morena o tla ahlōla,

a ahlōlele chaba sa hae,

a utloele bahlanka ba hae bohlōkō,

ha a bona matla a bona a felile,

a sa siee mothōpuoa

kapa molokolohi.

₃₇O tla botsa:

‘E kae melimo ela ea bona,

“lefika” leo

ba tšabetseng ho lona;

₃₈melimo e jeleng

mafura a mahlabelo a lōna,

e noeleng veine e linyehelo tsa lōna?

Melimo eo

a e tsohe e le thusetse,

melimo ea lōna e le sireletse.

₃₉“ ‘Bona, ke 'na

eo e ntseng e le eena,

ha ho Molimo e mong.

Kea timetsa, kea phelisa,

kea hlatha, kea folisa,

ha ho ea ka namoleloang

matsohong a ka.

₄₀Ke supa holimo, kea ikana,

'na ea phelang kamehla

kea hlapanya:

₄₁Ke tla leotsa

sabole ea ka ea lebenyane,

ke tšoare

kahlōlo ka letsohong la ka,

ke iphetetse ho lira tsa ka,

ba ntlhoileng ke ba buseletse.

₄₂Metsu ea ka

e tla rotha mali a bona,

sabole ea ka

e tla khanathela linama,

e tlale mali

a babolauoa le bathōpuoa,

e ebōle mahata a ba lireng.’

₄₃“Lōna maholimo

thōhōletsang le eena;

o phetetsa

mali a bahlanka ba hae,

o buseletsa ba mo hloileng.

O tšoarela chaba sa hae

le naha ea sona.”