Sechaba se halalelang sa Morena
1“Ha Morena Molimo oa lōna, a le fihlisa naheng eo le eang ho eona, hore e be ea lōna, o tla leleka lichaba tse ngata, tse kapele ho lōna, e leng: Bahete, le Bagirigashe, le Baamore, le Bakanana, le Baperise, le Bahife, le Bajebuse. Ke lichaba tse supileng, tse kholo, tse matla ho le feta. 2Ha Morena Molimo oa lōna, a le neela lichaba tsena, le tla li hlōla, ebe le li timetsa ho hang. Le se ke la etsa selekane le lichaba tseo, leha e le ho li utloela bohlōkō. 3Le se ke la nyallana le tsona. Le se ke la nea bara ba tsona barali ba lōna, kapa la nkela bara ba lōna barali ba tsona. 4Barali bao ba tla khelosa bara ba lōna hore ba se ke ba ntatela, ebe ba sebeletsa melimo e meng; kahoo khalefo ea Morena e tla le tlōkōmela, ebe o le timetsa kapele. 5Empa le tle le ba etse tjena: Le heletse lialetare tsa bona, le thue lifika tsa bona tseo ba li khumamelang, le senye litšoantšo tsa bona tsa Ashera, le chese le litšoantšo tse betliloeng tsa melimo ea bona.
6“Lōna le sechaba se halalelang ho Morena Molimo oa lōna. Morena Molimo oa lōna, o le khethile hore le be sechaba seo e leng sa hae har'a lichaba tsohle tse teng lefatšeng. 7Hase hobane le le bangata ho feta lichaba tsohle, Morena a ileng a le rata, 'me a le khetha, hobane ka palo le sechaba se senyenyane ho feta lichaba tsohle. 8Ke hobane Morena oa le rata, le hobane o rata ho bōlōka kano eo a neng a e hlapanyetse bo-ntat'a lōna, a le ntšitseng ka letsoho la hae le matla, a le lopolla bokhobeng ba Faro, khosi ea Egepeta. 9Tsebang ke hona hore Morena Molimo oa lōna, ke eena Molimo. Ke Molimo ea tšepahalang, ea bōlōkang selekane le lerato la hae le tiileng ho ba mo ratang, le ho ba bōlōkang melao ea hae, ho isa melōkong e sekete. 10Ba mo hloeang sefahlamahlo o ba putsa ka ho ba timetsa. Ba mo hloeang sefahlamahlo, ha a ba liehele, o ba timetsa hang-hang. 11Ka baka leo, bōlōkang melao, le litaelo, le litemoso tseo ke le laelang tsona kajeno, hore le li phethe.
Mahlohonolo a ho ikokobetsa
12“Haeba le mamela litaelo tsena, le li bōlōka, le li phetha, Morena Molimo oa lōna, o tla bōlōka selekane le lerato leo a neng a le hlapanyetse bo-ntat'a lōna. 13O tla le rata, a le hlohonolofatse, a le ngatafatse. O tla hlohonolofatsa bana ba lōna, le litholoana tsa masimo a lōna, le koro ea lōna, le veine ea lōna e ncha, le ole ea lōna. O tla ngatafatsa makhomo a lōna, le mehlape ea lōna e tla tsoala 'moella, naheng eo a hlapanyelitseng bo-ntat'a lōna hore o tla le nea eona. 14Le tla hlohonolofatsoa ho fetisa lichaba tsohle. Ho ke ke ha e-ba le nyopa ea monna kapa ea mosali har'a lōna; le har'a liphoofolo tsa lōna ho ke ke ha eba le e sa tsoaleng. 15Morena o tla felisa maloetse 'ohle har'a lōna. A ke ke a le otla ka mafu afe kapa afe a mabe, a Egepeta, ao le a tsebang, empa bohle ba le hloileng o tla ba otla ka 'ona. 16Lichaba tsohle tseo Morena Molimo oa lōna, a tla neelana ka tsona matsohong a lōna, le tla li timetsa. Le se ke la li hauhela, le se ke la sebeletsa melimo ea tsona, hobane hona e tla ba leraba ho lōna.
Matla a Morena
17“Le se ke la re ka lipelong tsa lōna: ‘Lichaba tsena li ngata ho re feta; re ke ke ra tseba ho li leleka.’ 18Le se ke la li tšaba, le mpe le hopole hantle seo Morena Molimo oa lōna, a neng a se etse ho Faro, le ho Baegepeta bohle; 19le meleko eo le e boneng, le lipontšo, le mehlolo; le letsoho le matla, le otlolohileng, leo Morena Molimo oa lōna, a ileng a le ntša ka lona. Morena Molimo oa lōna, o tla etsa joalo ho lichaba tsohle tseo le li tšabang. 20Hape Morena Molimo oa lōna, o tla rōmela bobi har'a tsona, ho fihlela ho timela lichaba tse setseng, le tse ipatetseng lōna.
21“Le se ke la li tšaba, hobane Morena Molimo oa lōna, o teng har'a lōna, 'me ke Molimo e moholo, ea tšabehang. 22Morena Molimo oa lōna, o tla leleka lichaba tsena kahanyane, kapele ho lōna. Le ke ke la li timetsa hang-hang, esere libatana tsa naha tsa tšoha li ngatafala ho le feta. 23Empa Morena Molimo oa lōna, o tla neelana ka lichaba tsena matsohong a lōna, a li ferekanye ka pherekano e kholo, ho fihlela li timetsoa. 24O tla neelana ka likhosi tsa lichaba tseo matsohong a lōna, 'me le tla timetsa mabitso a tsona lefatšeng. Ha ho motho ea ka le emang kapele, ho fihlela le li timelitse tsohle.
25“Litšoantšo tse betliloeng tsa melimo ea lichaba tseo le li chese ka mollo. Silefera kapa khauta e holim'a litšoantšo tseo le se ke la e tsoela pelo, la inkela eona, esere la tšoasoa ke leraba, hobane tseo ke manyala ho Morena Molimo oa lōna. 26Le se ke la tlisa melimo ea bohata ka matlung a lōna, esere la timela joaloka eona. Le e hloee ho hang, le e nyonye ho hang, hobane ke ntho e tla timetsoa.”
