Tsohle ke lefeela
1Tsena ke lipolelo tsa Moruti, mora oa Davida eo e neng e le khosi motseng oa Jerusalema:
2“Lefeela la mafeela,”
ho rialo Moruti;
“lefeela la mafeela,
tsohle ke lefeela!”
3Motho o boelloa ke'ng
mosebetsing oohle oa hae,
oo a o sebetsang
ka thata lefatšeng?
4Molōko oa hlaha,
molōko oa feta,
fatše lona le hlola kamehla eohle.
5Tsatsi lea chaba,
tsatsi lea likela,
le potlake hape
ho khutlela bochabela.
6Moea o fōkela boroa,
o fōkele leboea,
o potolohe joalo,
o khutlele moo o tsoang teng.
7Linōka tsohle
li phallela leoatleng,
empa leoatle ha le ke le tlala.
Moo linōka li phallelang teng,
ke moo li phallelang teng kamehla.
8Lintho tsohle li tena motho,
li tena ho feta polelo ea motho;
leihlo la motho
ha le tenehe ke ho bona,
tsèbè ha e tlale tseo e li utloang.
9Se bileng teng se tla ba teng hape,
se kileng sa etsoa se tla etsoa hape;
ha ho letho le lecha mona lefatšeng.
10Na letho le teng
leo ho ka thoeng ka lona:
“Bona mona, hona ke ho hocha?”
Ho bile teng mehleng ea khale,
ho bile teng pele ho mehla ea rōna.
11Baholo-holo ba khale
ha ba sa hopoloa;
esita le bao
e leng hona ba tla tla,
bahlahlami ba bona
ba ke ke ba ba hopola!
Ho batla bohlale ha ho thuse letho
12'Na, Moruti, ke ne ke le khosi ea Iseraele, motseng oa Jerusalema. 13Ka ineela ka pelo ea ka eohle ho batla le ho fuputsa ka bohlale, lintho tsohle tse etsoang mona lefatšeng. Molimo o neile batho mosebetsi ona o boima hore ba o sebetse ka thata. 14Ke bone mesebetsi eohle e etsoang mona lefatšeng, empa kaofela ha eona ke mafeela a tšoanang le ho lelekisa moea.
15Ho khopameng
ho ke ke ha khopamolloa,
ho seng teng
ho ke ke ha ba ha baloa.
16Eaba ke bua ka pelo, ke re: “Ak'u bone, ke tumme haholo ka ho hlalefa ho feta bohle ba kileng ba busa motseng oa Jerusalema pele ho 'na. Ke na le tsebo e ngata ea bohlale le ea thuto.” 17Ka ikemisetsa ho ithuta hore ke utloisise bohlale le bohlanya le botho, empa ka elelloa hore le hona e nts'e le ho lelekisa moea feela.
18Bohlale bo bongata
bo tlisa mahlomola a mangata,
ea eketsang tsebo
o ikekeletsa masoabi.
