BAEFESE 3

₁Ke ka hona, 'na Paulosi, ke le motšoaruoa ka baka la Kreste Jesu, le ka baka la lōna balichaba, ke rapelang Molimo.

₂Kea tšepa, le utloile kamoo Molimo a 'neileng tšebetso ea mohau eo ke e etsetsang lōna kateng, ₃le kamoo, ka ho senoleloa, ke tsebisitsoeng sephiri sa hae kateng, joalokaha ke se ke ngotse hakhutšoanyane. ₄Ka ho bala seo ke se ngotseng, le tla elelloa kutloisiso eo ke nang le eona ea sephiri sa Kreste. ₅Mehleng e fetileng Molimo ha aa ka a tsebisa batho sephiri seo, empa kajeno, ka Moea, o se senoletse baapostola le baporofeta ba hae ba halalelang. ₆Sephiri seo ke ho re, ho Kreste Jesu, ka molaetsa o molemo, balichaba ke majalefa 'moho le Bajuda, bobeli ke litho tsa 'mele o le mong, 'me ba na le kabelo tšepisong e le 'ngoe.

₇Ke entsoe mosebeletsi oa molaetsa oo, ka mpho ea mohau eo Molimo a mphileng eona, ka ho sebelisa matla a hae. ₈'Na ke e monyenyane har'a balumeli bohle, empa ke abetsoe mosebetsi ona o khethehileng, oa ho bolella balichaba molaetsa o molemo oa menono e ke keng ea lekanngoa ea Kreste, ₉le ho bontša batho bohle kamoo Molimo a phethahatsang morero oa hae oa sephiri kateng. Haesale Molimo, 'Mōpi oa tsohle, a patile sephiri seo sa hae, ₁₀e le hore kajeno, ka kereke, meea e busang, le e laolang sebakeng, e tle e tsebe bohlale ba Molimo ka mefuta eohle ea bona. ₁₁Molimo o entse hona ka ho ea ka morero oa hae oa khale-khale, oo a o phethileng ka Kreste Jesu, Morena oa rōna. ₁₂Ke ka Kreste, le ka ho lumela ho eena, re nang le sebete sa ho atamela ho Molimo ka tšepo. ₁₃Ka hona ke le kōpa hore le se ke la tepella, hobane ke matšoenyehong ka baka la lōna, 'me le ka ithorisa ka 'ona.

₁₄Ka baka leo, ke khumamela Ntate, ₁₅eo melōko eohle e maholimong le lefatšeng e reeletsoeng ka eena. ₁₆Ka ho ea ka boholo ba tlōtla ea hae, a ke a le ekeletse matla ka Moea oa hae le tle le matlafale bothong ba lōna ba moea, ₁₇e le hore, ka tumelo, Kreste a ahe ka lipelong tsa lōna. Le tsitse, le tiee leratong, ₁₈hore, 'moho le balumeli bohle, le tle le tsebe ho utloisisa seo bophara ba lona, bolelele ba lona, bophahamo ba lona, le botebo ba lona bo leng sona. ₁₉Le tsebe lerato la Kreste le fetang tsebo eohle, e le hore le tlale bophelo bo phethehileng ba Molimo.

₂₀Eena eo matla a hae, ka ho sebetsa ka ho rōna, a ka etsang tse fetang hōle tseo re ka li kōpang kapa tseo re ka li hōpōlang, ₂₁a ke a tlotlisoe kerekeng le ho Kreste Jesu, kamehla le mehla, ka mengoaha le mengoaha. A ho be joalo!