Seoa sa borobeli: Litsie
1Joale Morena a re ho Moshe: “E-ea ho Faro. Ke thatafalitse pelo ea hae le lipelo tsa bahlanka ba hae, hore ke tle ke etse mehlolo ena ea ka har'a bona; 2Le hore u tle u tsebe ho phetela bana ba hao le litlōhōlō tsa hao, kamoo ke neng ke bapale ka Baegepeta kateng; le ho ba phetela mehlolo ena ea ka, eo ke e entseng har'a Baegepeta. Ka hona le tla tseba hore ke 'na Morena.”
3Moshe le Arone ba ea ho Faro, ba re ho eena: “Morena Molimo oa Baheberu, o bua tjena, o re: ‘U tla hana ho ikokobetsa kapele ho 'na ho fihlela neng? Lokolla sechaba sa ka, se e'o ntšebeletsa. 4Haeba u hana ho lokolla sechaba sa ka, bona, hosasane ke tla tlisa litsie naheng ena ea hao. 5Li tla aparela naha eohle, 'me ha ho le ea mong ea tla tseba ho bona mobu. Li tla ja tsohle tse ileng tsa siuoa ke sefako, li je lifate tsohle tsa lōna tse melang. 6Li tla tlala ka matlung a hao, le ka matlung 'ohle a bahlanka ba hao, le ka matlung 'ohle a Baegepeta. Bo-ntat'ao le bo-ntat'ao-moholo ha ba e-s'o bone tse kaalo, haesale ba e-ba teng lefatšeng, ho fihlela letsatsi lena.’ ” Eaba Moshe oa reteleha, o tloha ho Faro.
7Joale bahlanka ba Faro ba re ho eena: “Motho eo e tla ba leraba ho rōna ho fihlela neng? Lokolla batho bana, ba tle ba e'o sebeletsa Morena, Molimo oa bona. Na ha u e-s'o hlokomele hore Egepeta ea timela?”
8Bo-Moshe le Arone ba khutlisetsoa ho Faro, 'me a re ho bona: “Tsamaeang, le e'o sebeletsa Morena, Molimo oa lōna. Feela ke bo-mang ba tla ea?”
9Moshe a re: “Re tla ea le bana ba rōna, le maqheku a rōna; re tla ea le bara ba rōna, le barali ba rōna; le mehlape ea rōna ea linku, le mehlape ea rōna ea likhomo, hobane re lokela ho etsetsa Morena mokete.”
10Eaba Faro o re ho bona: “Morena a ke a be le lōna, haeba le re, nka le lokolla le bana ba lōna! Bonang, le na le morero o khopo! 11Le ho ka! A ho tsamaee lōna banna, hona joale, le e'o sebeletsa Morena, hobane ke sona seo le neng le se batla.” Eaba ba lelekoa kapele ho Faro.
12Morena a re ho Moshe: “Otlollela letsoho la hao holim'a naha ea Egepeta, hore litsie li tle; li aparele naha ea Egepeta, li je limela tsohle tsa naha, le tsohle tse siiloeng ke sefako.”
13Moshe a phahamisetsa molamu oa hae holim'a naha ea Egepeta, 'me Morena a fokisa moea oa bochabela holim'a lefatše, letsatsi lohle le bosiu bohle. Ha bo e-sa, moea oa bochabela oa tlisa litsie. 14Litsie tsa aparela naha eohle ea Egepeta, tsa hoaramana naheng eohle ea Egepeta, e le boieane bo tšabehang. Pele ho tsona ho ne ho e-s'o be le litsie tse kang tsona; le kamorao ho tsona ha li sa tla ba teng. 15Li ne li aparetse naha hoo ho neng ho bonahala botšo ba tsona feela; tsa e-ja limela tsohle tse naheng eo, le litholoana tsohle tse lifateng, tseo sefako se neng se li siile. Ha hoa ka ha sala letho le letalana lifateng le limeleng tsa naha, naheng eohle ea Egepeta.
16Faro a bitsa Moshe le Arone ka potlako, a re ho bona: “Ke sitetsoe Morena Molimo oa lōna; le lōna ke le sitetsoe. 17Joale kea le kōpa: a le ke le ntšoarele sebe sena sa ka lekhetlo lena feela, 'me le rapele Morena Molimo oa lōna, hore a mpe a tlose lefu lena ho 'na.”
18Moshe a tloha ho Faro, a ea rapela Morena. 19Eaba Morena o tsosa moea oa bophirimela, o matla haholo; oa fefola litsie, oa ea li thesemetsa Leoatleng la Lehlaka, 'me ha se ke ha sala tsie leha e le 'ngoe feela naheng eohle ea Egepeta. 20Empa Morena a 'na a thatafatsa pelo ea Faro, 'me a se ke a lokolla bana ba Iseraele.
Seoa sa borobong: Lefifi
21Joale Morena a re ho Moshe: “Phahamisetsa letsoho la hao maholimong, ho tle ho be lefifi naheng ea Egepeta; lefifi leo ekang motho a ka le tšoara ka letsoho.” 22Moshe a phahamisetsa letsoho la hae maholimong, 'me ka matsatsi a mararo lefifi la bonka-ntjana la aparela naha eohle ea Egepeta. 23Batho ba sitoa ho bonana, 'me ka matsatsi a mararo motho a sitoa ho tloha moo a lutseng teng. Empa moo ho ahileng bana ba Iseraele bohle, leseli le ne le ntse le le teng.
24Eaba Faro o bitsa Moshe, o re ho eena: “Tsamaeang, le e'o sebeletsa Morena! Fela mehlape ea lōna ea linku le ea likhomo, eona le e siee. Bana ba lōna bona ba ka ea le lōna.”
25Eaba Moshe o re: “Le uena he, u tlameha ho re nea liphoofolo tsa sehlabelo le tsa secheso, re tle re etsetse Morena Molimo oa rōna, sehlabelo. 26Le liphoofolo tsa rōna li tla ea le rōna; ha ho na ho sala leha e le 'ngoe feela, hobane ho tsona re tla khetha tse tla sebeletsa Morena Molimo oa rōna. Ha re ka ke ra tseba seo re tla sebeletsa Morena ka sona, ho fihlela re fihla teng.”
27Morena a 'na a thatafatsa pelo ea Faro, 'me a se ke a utloisisa ho ba lokolla. 28Faro a re ho Moshe: “Tloha pel'a ka! U itlhokomele, ke se hlole ke u bona hape, hobane mohla nka tšohang ke u bona hape, ke tla u bolaea!”
29Moshe a re: “U buile hantle! Ha ke sa tla hlola ke bona sefahleho sa hao hape!”
