Ho tšeloa Leoatle la Lehlaka
1Morena a bua ho Moshe, a re: 2“Bolella bana ba Iseraele ba khutlele morao, ba e'o hloma kapele ho Pi-Hahiroke, pakeng tsa Migedole le Leoatle, kapele ho Baale-Sefone, ba hlome litente lebōpong la Leoatle. 3Faro o tla re: ‘Bana ba Iseraele ba ntse ba lelera har'a naha; lehoatata le ba thibetse.’ 4Ke tla thatafatsa pelo ea Faro, 'me o tla le phalalisa. Ke tla itlotlisa ka Faro le ka lebōtho la hae kaofela. Baegepeta ba tla tseba hore ke 'na Morena.” Eaba Baiseraele ba etsa joalo.
5Ha khosi ea Egepeta e tsebisoa hore Baiseraele ba balehile, Faro le bahlanka ba hae ba fetohela sechaba seo, ba re: “Re ne re etsa'ng ha re lokolla Baiseraele ba neng ba re sebeletsa?” 6Faro a hlopha likariki tsa hae tsa ntoa, 'me a nka le sechaba sa hae. 7A nka likariki tsa ntoa tse makholo a tšeletseng, tse khethiloeng, le likariki tsohle tsa Egepeta, le balaoli ba li laolang. 8Morena a 'na a thatafatsa pelo ea Faro, khosi ea Egepeta, 'me a phalalisa bana ba Iseraele, ba neng ba tsamaea ba le motlōtlō. 9Baegepeta ba ba phalalisa ka lipere le ka likariki tsa ntoa tsa Faro, le ka bapalami ba hae, le ka lebōtho lohle la hae, 'me ba fihla ho bona moo ba neng ba hlomile lebōpong la Leoatle, haufi le Pi-Hahirote, kapele ho Baale-Sefone.
10Ha Faro a ntse a atamela, bana ba Iseraele ha ba re mahlo tloha! ba bona Baegepeta ba ba phalletse. Bana ba Iseraele ba tšoha haholo, 'me ba ipiletsa ho Morena. 11Eaba ba re ho Moshe: “Na ho ne ho se mabitla Egepeta, ha u re tlisitse ho tla shoela lehoatateng moo? Ke'ng ntho ee eo u e entseng ho rōna, ha u re ntšitse Egepeta? 12Na ha rea ka ra u bolella pele re tloha Egepeta, ra re: ‘Re hlokomōlōhe, u re tlohelle re sebeletse Baegepeta’? Ho molemo ho rōna ho sebeletsa Baegepeta, ho e-na le hore re tl'o shoela lehoatateng mona!”
13Eaba Moshe o re ho sechaba: “Se tšabeng; emang le tiile, le tle le bone pholoho eo Morena a tla le etsetsa eona kajeno, hobane joalokaha le bona Baegepeta kajeno, ha le sa tla hlola le ba bona le ka mohla, ho isa khale. 14Morena o tla le loanela, lōna le ntse le ithōletse!”
15Morena a re ho Moshe: “Ke hobane'ng u ntseng u ipiletsa ho 'na? Bolella bana ba Iseraele hore ba tsamaee. 16Uena phahamisa molamu oa hao, u otlollele letsoho la hao holim'a leoatle, 'me u le arole koto tse peli, bana ba Iseraele ba tle ba tsamaee har'a leoatle, mobung o ommeng. 17Bona, ke tla thatafatsa lipelo tsa Baegepeta, 'me ba tla ba sala morao. Ke tla itlotlisa ka Faro, le ka mabōtho a hae, le ka likariki tsa hae tsa ntoa, le ka bapalami ba hae. 18Baegepeta ba tla tseba hore ke 'na Morena, ha ke itlotlisa ka Faro, le ka likariki tsa hae tsa ntoa, le ka bapalami ba hae.”
19Lengeloi la Molimo, le neng le tsamaea kapele ho mabōtho a bana ba Iseraele, la checha, la ema kamorao ho bona. Le leru le lopaletseng la tloha kapele ho bona, la ema kamorao ho bona, 20pakeng tsa liahelo tsa Baegepeta le liahelo tsa Baiseraele. Leru la etsetsa Baegepeta lefifi, empa bana ba Iseraele la ba etsetsa leseli; kahoo mabōtho a sitoa ho atamelana bosiu bohle.
21Eaba Moshe o otlollela letsoho la hae holim'a leoatle, Morena a tlosa metsi a leoatle ka moea o matla oa bochabela, bosiu bohle; a fetola leoatle mobu o ommeng, 'me metsi a arohana. 22Bana ba Iseraele ba kena har'a leoatle, mobung o ommeng, metsi a ba etsetsa lerako ka letsohong le letona, le ka letsohong le letšehali.
23Baegepeta ba ba phalalisa ba ba sala morao ho ea fihla har'a leoatle, ka lipere tsohle tsa Faro, le ka likariki tsa hae tsa ntoa, le ka bapalami ba hae. 24E sa le ka malungoalungoana, Morena a le kahar'a leru le lopaletseng, le kahar'a khanare ea mollo, a talima mabōtho a Baegepeta, 'me a a ferekanya. 25A khina mabili a likariki tsa bona tsa ntoa, 'me likariki tsa ntoa tsa tsamaea haboima. Baegepeta ba re: “A re baleheng Baiseraele, hobane Morena oa ba loanela!”
26Morena a re ho Moshe: “Otlollela letsoho la hao holim'a leoatle, u etse hore metsi a koahele Baegepeta, le likariki tsa bona tsa ntoa, le bapalami ba bona.” 27Eaba Moshe o otlollela letsoho la hae holim'a leoatle, 'me ha bosiu bo e-sa leoatle la khutlela tulong tsa lona. Baegepeta ba leka ho baleha metsi ana, empa Morena a ba lahlela har'a leoatle. 28Joale metsi a khutla, a koahela likariki tsa ntoa le bapalami, 'moho le mabōtho 'ohle a Faro a neng a ba setse morao ho ea fihla leoatleng, empa ha ho leng ea mong oa bona ea ileng a phonyoha.
29Bana ba Iseraele ba ne ba ile ba tsamaea mobung o ommeng kahar'a leoatle, metsi a ba etselitse lerako ka letsohong le letona, le ka letsohong le letšehali.
30Ka lona letsatsi leo Morena a namolela Baiseraele matsohong a Baegepeta. Baiseraele ba bona litōpō tsa Baegepeta li karaletse lebōpong la leoatle. 31Baiseraele ba bona letsoho le matla la Morena, le ileng la hlōla Baegepeta. Sechaba sa tšaba Morena, 'me sa lumela ho Morena, le ho Moshe, mohlanka oa hae.
