Manna le likoekoe
1Sechaba sohle sa bana ba Iseraele sa tloha Elime, sa ea fihla lehoatateng la Sine, pakeng tsa Elime le Sinai. E ne e le letsatsi la leshome le metso e mehlano, la khoeli ea bobeli ea ho tloha ha bona naheng ea Egepeta. 2Sechaba sohle sa bana ba Iseraele sa korotlela Moshe le Arone lehoatateng. 3Bana ba Iseraele ba re ho bona: “Hoja Morena o hlile a re bolaela naheng ea Egepeta, moo re neng re ituletse pel'a lipitsa tsa nama, moo re neng re itjella bohobe, re khora, hobane joale le re tlisitse lehoatateng lena, hore sechaba sena sohle se tl'o shoela mona ke tlala.”
4Eaba Morena o re ho Moshe: “Bona, ke tla le nesetsa lijo tse tsoang leholimong. Sechaba se tla tsoa, se e'o thonaka ho lekaneng letsatsi ka leng, e le hore ke tle ke se leke, ke bone hore na se tla tsamaea ka Molao oa ka kapa che. 5Ka letsatsi la botšelela se tla bōkella, 'me se bōkelle ho lekaneng matsatsi a mabeli.”
6Moshe le Arone ba re ho bana bohle ba Iseraele: “Mantsiboeeng 'ona ana, le tla tseba hore Morena ke eena ea le ntšitseng naheng ea Egepeta. 7Hoseng le tla bona tlōtla ea Morena, hobane o utloile kamoo le mo korotlelang kateng. Joale rōna re bo-mang, hoo le ka re korotlelang?”
8Moshe a re: “Ke Morena ea tla le fa nama mantsiboea, hore le je; le bohobe hoseng, hore le khore, hobane o utloile kamoo le mo korotlelang kateng. Rōna re bo-mang? Ha le korotlele rōna, le korotlela Morena.”
9Joale Moshe a re ho Arone: “E-re ho sechaba sohle sa bana ba Iseraele: ‘Tloong kapele ho Morena, hobane o utloile ho korotla ha lōna’.”
10Eare ha Arone a ntse a bua le sechaba sohle sa bana ba Iseraele, sa talima lehoatateng, 'me sa bona tlōtla ea Morena e iponahatsa lerung.
11Eaba Morena o bua ho Moshe, o re: 12“Ke utloile ho korotla ha bana ba Iseraele; bua le bona, u re: ‘Mantsiboea le tla ja nama, hoseng le tla ja bohobe, le khore. Ka hona le tla tseba hore ke 'na Morena Molimo oa lōna.’ ”
13Mantsiboea ha nyoloha likoekoe, tsa fihla tsa hoaramana liahelong tsa bona. Hoseng ha tsoha ho letse phoka liahelong tsa bona. 14Ha phoka ena e ntse e nyamela, holim'a lehoatata ha bonahala ho hong ho honyenyane, ho kang mahehefa, ho honyenyane joaloka serame se letseng. 15Bana ba Iseraele ba bona hona, 'me ba botsana, ba re: “Hoo ke'eng?” Ke hobane ba ne ba sa tsebe hore na ke eng.
Eaba Moshe o re ho bona: “Hono ke bohobe boo Morena a le fileng bona, hore le je. 16Sena ke seo Morena a se laetseng: ‘Motho ka mong a ipōkellele ho lekaneng hore a je. Tekanyo ea motho ka mong ke lilethara tse peli, ho latela palo ea batho; motho ka mong a nkele ba ka tenteng ea hae.’ ”
17Bana ba Iseraele ba etsa joalo. Ba thonaka, e mong a bōkella haholo, e mong hanyenyane. 18Ha ba etsa tekanyo ka lilethara tse peli, ea neng a bōkeletse haholo a se ke a salloa ke letho; le ea neng a bōkeletse hanyenyane a se ke a haelloa ke letho; e mong le e mong o ne a bokeletse ho lekaneng hore a je.
19Moshe a re ho bona: “Ho se be ea bōlōkelang letsatsi la hosasane!”
20Empa ha baa ka ba mamela Moshe; ba bang ba li bōlōkela letsatsi la hosasane, eaba li nyeunya libōkō, lia nkha. Moshe a ba halefela.
21Hosasa ho hong le ho hong ba bōkella; e mong le e mong a bōkella ho lekaneng hore a je, empa ha letsatsi le chesa li ne li ee li qhibilihe.
22Ka letsatsi la botšelela ba bōkella bohobe ba matsatsi a mabeli, motho ka mong lilethara tse 'ne. Baokameli bohle ba sechaba ba tla, ba tsebisa Moshe. 23Moshe a re ho bona: “Sena ke seo Morena a se boletseng: ‘Hosasane ke letsatsi la phomolo; ke letsatsi la phomolo la Sabatha sa Morena. Seo le se besang le se bese, seo le se apehang le se apehe; sohle se salang le se bōlōkele la hosasane.’ ”
24Eaba ba li bōlōkela la hosasane, joalokaha Moshe a ne a ba laetse, 'me tsa se ke tsa nkha, le libōkō tsa se ke tsa e-ba teng ho tsona. 25Moshe a re: “Li jeng kajeno, hobane kajeno ke Sabatha sa Morena. Kajeno ha ho letho leo le ka le fumanang naheng. 26Le tla li bōkella ka matsatsi a tšeletseng, empa ka letsatsi la bosupa, leo e leng la Sabatha, ha ho letho le tla ba teng.”
27Ka letsatsi la bosupa batho ba bang ba tsoa ho ea ithonakela, empa ba se ke ba fumana letho. 28Eaba Morena o re ho Moshe: “Ke ho fihlela neng le tla hana ho bōlōka litaelo tsa ka, le melao ea ka? 29Bonang, Morena o le neile Sabatha; ka baka lena, ka letsatsi la botšelela o tla le nea lijo tse lekaneng matsatsi a mabeli. Bohle ba lule moo ba leng teng. Ho se be motho ea tla tloha ha hae ka letsatsi la bosupa.” 30Sechaba sa phomola ka letsatsi la bosupa.
31Eaba sechaba sa Iseraele se rea lijo tseo lebitso la manna, kaha li ne li tšoana le peō e tšoeunyana, 'me li latsoeha joaloka likuku tse entsoeng ka mahe a linotši.
32Joale Moshe a re: “Seo Morena a se laetseng ke sena: ‘Tlatsang lilethara tse peli ka manna, le a bōlōkele litlōhōlō tsa lōna, e le hore li tle li bone bohobe boo ke ileng ka le fepa ka bona lehoatateng, hoba ke le ntše naheng ea Egepeta’.”
33Eaba Moshe o re ho Arone: “Nka nkho e le 'ngoe, u tšélé manna a etsang lilethara tse peli ka ho eona, u e bee kapele ho Morena, e tle e bōlōkeloe litlōhōlō tsa lōna.”
34Arone a etsa joalokaha Morena a ne a laetse Moshe, a bea nkho pel'a matlapa a ngotsoeng Molao, hore e bōlōkoe. 35Ka lilemo tse mashome a mane bana ba Iseraele ba 'na ba ja manna, ho fihlela ba fihla naheng e nang le baahi; ba ja manna ho fihlela ba fihla meeling ea naha ea Kanana.
36Lilethara tse peli e ka ba karolo e le 'ngoe ea tse leshome tsa moritšoana oo ho neng ho lekanngoa ka oona.
