PHALLO 32

₁Ha sechaba se bona hore Moshe o lieha ho theoha thabeng, sa bokanela Arone, 'me sa re ho eena: “Tloo, u re etsetse molimo o tla re etella pele, hobane ke mona ha re tsebe hore na Moshe, monna ea re nyolotseng naheng ea Egepeta, ho etsahetse eng ka eena.”

₂Eaba Arone o re ho sona: “Rōlisang basali ba lōna, le bara ba lōna, le barali ba lōna, masale a khauta a litsebeng tsa bona, le a tlise ho 'na.” ₃Sechaba sohle sa rōla masale a khauta, ao se neng se a roetse litsebeng, sa a tlisa ho Arone. ₄A nka masale ao matsohong a Baiseraele, a a qhibilihisa, a bopa namane ea khauta ka 'ona. Eaba ba re: “Ona ke oona molimo oa hao, uena Iseraele, o u nyolotseng naheng ea Egepeta!”

₅Arone ha a bona ntho ena, a haha aletare kapele ho namane ea khauta, a hōoeletsa, a re: “Hosasane ke mokete oa Morena!” ₆Ka la hosasane ba tsoha ka malungoalungoana, ba nyehela ka mahlabelo a secheso, ba tlisa le mahlabelo a teboho; sechaba sa lula fatše, sa e-ja, sa e-noa; eaba sea ema, sea bapala.

₇Morena a bua ho Moshe, a re: “Theoha kapele, hobane sechaba sa heno, seo u se nyolotseng naheng ea Egepeta, se se se silafetse. ₈Se se se khelohile kapele tseleng eo ke se laetseng eona. Se ipōpetse namane ea khauta, 'me se e khumametse, sa ba sa e etsetsa mahlabelo, sa re: ‘Ona ke oona molimo oa hao, uena Iseraele, o u nyolotseng naheng ea Egepeta!’ ”

₉Morena a boela a re ho Moshe: “Sechaba sena ke se bone; ke sechaba se manganga. ₁₀Joale ak'u ntlohele, khalefo ea ka e ke e se tlōkōmele, ke tle ke se timetse. Ha e le uena ke tla u etsa sechaba se seholo.”

₁₁Eaba Moshe o leka ho kokobetsa khalefo ea Morena Molimo oa hae, o re: “Ke ka lebaka la'ng, Morena, khalefo ea hao o tlōkōmelang sechaba sa hao, seo u se ntšitseng naheng ea Egepeta, ka matla a maholo, le ka letsoho le matla? ₁₂U etsetsa'ng hore Baegepeta ba tle ba re: ‘O ba ntšitse ka morero o mobe, hore a tle a e'o ba bolaela lithabeng, le ho ba timetsa lefatšeng?’ Kokobetsa khalefo ea hao e tukang, u fetole morero oa hao oa ho timetsa sechaba sa hao. ₁₃Hopola bahlanka ba hao, bo-Aborahama, le Isaka, le Iseraele, bao u neng u ba hlapanyetse ka lebitso la hao, ua re: ‘Ke tla ngatafatsa litlōhōlō tsa lōna li be kaalo ka linaleli tsa leholimo; le naha ena eohle, eo ke buileng ka eona, ke tla e nea litlōhōlō tsa lōna, 'me e tla ba ea lōna kamehla eohle.’ ” ₁₄Eaba Morena o fetola morero oa hae oa ho timetsa sechaba sa hae.

₁₅Joale Moshe a reteleha, a theoha thabeng, matsohong a nkile matlapa a mabeli a ngotsoeng Molao. E ne e le matlapa a ngotsoeng ka mahlakoreng a mabeli; a ngotsoe ka nq'ena le ka nq'ane. ₁₆Matlapa ana a ne a entsoe ke Molimo; le mongolo e ne e le mongolo oa Molimo; o ngotsoe matlapeng.

₁₇Ha Joshua a utloa lerata la sechaba ha se ntse se hōoeletsa, a re ho Moshe: “Ho na le lerata la ntoa liahelong!”

₁₈Empa Moshe a re:

₁₉Ha a atamela liahelong, 'me a bona namane le metjeko, khalefo ea Moshe ea tlōkōma. A ptjatlanya matlapa a matsohong a hae fatše, a a pshatlela mosikong oa thaba. ₂₀A nka namane eo ba neng ba e entse, a e chesa mollong, a e sila ho fihlela e e-ba phofo, a e tšèla metsing, eaba o noesa bana ba Iseraele metsi ao.

₂₁Joale Moshe a re ho Arone: “Sechaba see se u senyelitse eng, ha u se tliselitse sebe se sekaale-kaale?”

₂₂Eaba Arone o re: “Khalefo ea morena oa ka e se ke ea tlōkōma hle! U tseba hore sechaba sena se sekametse bokhopong. ₂₃Se ile sa re ho 'na: ‘Re etsetse molimo o tla re etella pele, hobane ke mona ha re tsebe hore na Moshe, monna ea re nyolotseng naheng ea Egepeta, ho etsahetse eng ka eena.’ ₂₄Ke ile ka re ho sona: ‘Ke bo-mang ba nang le khauta?’ Ba be ba se ba e rōla, ba 'nea eona. Ka e akhela mollong, eaba ho tsoa namane ena.”

₂₅Moshe a hlokomela hore sechaba se iketsetsa borata, hobane Arone a ne a se tloheletse ho iketsetsa borata, le ho iphetola sesomo har'a lira tsa sona. ₂₆Moshe a ema monyakong oa liahelo, a re: “Bao e leng ba Morena a ba tle ho 'na!”

Eaba bara ba Levi bohle ba bōkana ho eena.

₂₇Joale a re ho bona: “Morena Molimo oa Iseraele, o bua tjena: ‘Motho ka mong a nke sabole ea hae, a kene ka monyako ona, a tsoe ka monyako oane, liahelong tsohle, a bolaee ngoan'abo, a bolaee motsoalle oa hae, a bolaee le ea ahelaneng le eena.’ ”

₂₈Bara ba Levi ba etsa joalokaha Moshe a boletse. Ka letsatsi leo ha e-shoa batho ba ka bang likete tse tharo.

₂₉Eaba Moshe o re: “Kajeno le ikhethetse ho sebeletsa Morena, kaha motho ka mong a bolaile mora oa hae, a bolaile le ngoan'abo, e le hore kajeno le tle le hlohonolofatsoe.”

₃₀Ka le hlahlamang Moshe a re ho sechaba: “Le entse sebe se seholo. Joale ke tla nyolohela ho Morena; mohlomong ke tla le etsetsa tefelo ea sebe sa lōna.”

₃₁Eaba Moshe o khutlela ho Morena, o fihla, a re: “Ruri sechaba sena se entse sebe se seholo, se iketselitse molimo oa khauta. ₃₂Joale ak'u se tšoarele sebe sena sa sona hle! Ho seng joalo hlakola lebitso la ka bukeng eo u e ngotseng.”

₃₃Eaba Morena o re ho Moshe: “Ea ntšitetsoeng ke eena eo ke tla mo hlakola bukeng ea ka. ₃₄Joale tsamaea, u ise sechaba moo ke itseng u se ise teng. Bona, lengeloi la ka le tla u etella pele; feela mohl'a letsatsi la kotlo, sechaba sena ke tla se otlela sebe sa sona.”

₃₅Joale Morena a otla sechaba, hobane se ne se ile sa re Arone a se etsetse namane.