ESEKIELE 3

₁Molimo a re ho 'na: “Uena ngoan'a motho, e-ja se kapele ho uena: E-ja buka ena, 'me u tsamaee, u e'o bua le bana ba Iseraele.”

₂Eaba kea ahlama, 'me a 'nea buka hore ke e je.

₃Eaba o re ho 'na: “Uena ngoan'a motho, e-ja buka ena eo ke u neang eona, 'me u tlatse mala a hao ka eona.”

Eaba kea e ja; ka utloa e le monate joaloka mahe a linotši.

₄Joale Morena a re ho 'na: “Uena ngoan'a motho, tsamaea, u ee ho bana ba Iseraele, u ba bolelle mantsoe a ka. ₅Ha u rōngoe sechabeng se buang puo esele, e thata, empa u rōngoa ho ba ntlo ea Iseraele, ₆e seng ho lichaba tse ngata tse buang lipuo lisele, tse thata, tseo u ke keng ua li utloisisa. Ruri hoja ke ile ka u rōma ho tsona li ka be li ile tsa u mamela. ₇Empa bana ba Iseraele ba ke ke ba u mamela, hobane le 'na ha baa ka ba 'mamela. Bana ba Iseraele bohle ba thatafalitse lipelo, ba manganga. ₈Ke tla etsa hore pelo ea hao e thatafale, 'me u be manganga joaloka bona. ₉Ke tla thatafatsa pelo ea hao sa lejoe la moremaphofu, u be thata ho feta tšepe. U se ke ua ba tšaba, leha e le ho ba tšoha, le hoja e le sechaba sa bafetoheli.”

₁₀Molimo a tsoela pele, a re ho 'na: “Uena ngoan'a motho, mamela ka hloko, 'me mantsoe 'ohle a ka a kene pelong ea hao. ₁₁Tsamaea, u ee sechabeng sa heno se bothōpuoeng, u e'o bua le sona, u re: ‘Morena Molimo o bua tjena,’ ebang sea u mamela kapa ha se u mamele.”

₁₂Eaba Moea o nkukela holimo, 'me kamorao ho 'na ka utloa lentsoe le phefa, le re: “Ho rorisoe tlōtla ea Morena leahong la hae!” ₁₃Ka utloa molumo oa mapheo a libōpuoa tse phelang ha a thetsana, le molumo oa mabili a mahlakoreng a tsona, e le molumo o moholo. ₁₄Joale Moea oa mphahamisa, oa nkuka oa ea le 'na, ka tsamaea ke utloile bohlōkō, ke halefile, 'me matla a tsoang ho Morena a ntsukutla haholo. ₁₅Eaba ke fihla ho bathōpuoa ba le Tele-Abibe, moo ba ahileng teng pel'a nōka ea Kebare; ka phela moo le bona ka matsatsi a supileng, ke maketse!

₁₆Hoba matsatsi a supileng a fete, lentsoe la Morena la fihla ho 'na, la re: ₁₇“Uena ngoan'a motho, ke u entse molebeli oa ntlo ea Iseraele, ka baka leo, ha u utloa lentsoe le tsoang molomong oa ka, u ba nee keletso ea ka. ₁₈Ha ke re ho ea khopo: ‘Ruri u tla shoa,’ 'me uena u sa mo eletse, kapa ua mo khalemella litsela tsa hae tse khopo, e le hore a pholose bophelo ba hae, motho eo ea khopo o tla shoa ka baka la sebe sa hae, empa mali a hae ke tla a batla ho uena. ₁₉Empa ha u eletsa ea khopo, feela a sa khutle bokhopong ba hae, kapa tseleng tsa hae tse khopo, o tla shoa ka baka la sebe sa hae, empa uena u tla be u ipholositse.

₂₀“Hape ha motho ea lokileng a kheloha ho loka ha hae, a etsa bobe, 'me ke bea sekhōpi tseleng ea hae, o tla shoa. Kahobane ha ua ka ua mo eletsa, o tla shoa ka baka la sebe sa hae. Ho loka ha hae, hoo a kileng a ho etsa, ho ke ke ha hopoloa, empa mali a hae ke tla a batla ho uena. ₂₁Empa haeba u eletsa ea lokileng hore a se ke a etsa sebe, 'me a fela a sa se etse, o tla phela, hobane o ile a eletseha, 'me uena u ipholositse.”

₂₂Eaba matla a tsoang ho Morena a ntsukutla, Morena a re: “Ema, u tsamaee, u ee phuleng, moo ke tla bua le uena teng.”

₂₃Eaba kea ema, ke ea phuleng. Ka bona tlōtla ea Morena e eme moo, e tšoana le eo ke ileng ka e bona ha ke le pel'a nōka ea Kebare. Eaba ke itihela fatše ka sefahleho.

₂₄Moea oa kena ka ho 'na, oa nkemisa ka maoto, oa bua ho 'na, oa re: “Tsamaea u e'o ikoalla ka tlung ea hao. ₂₅Ha e le uena ngoan'a motho, ba tla u tlama ka mehala; u tla tlangoa, u sitoe le ho tsamaea har'a sechaba. ₂₆Ke tla etsa hore leleme la hao le khomarele mahalapeng a hao, u be semumu, u sitoe ho ba khalemela, hobane ke sechaba sa bafetoheli. ₂₇Empa etlare ha ke bua le uena, ke rarolle leleme la hao, ebe u re ho bona: ‘Morena o bua tjena!’ Ea ratang ho mamela a ke a mamele, ea hanang ho mamela a ke a hane, hobane ke sechaba sa bafetoheli.