Mehaho e 'meli e haufi le Tempele
1Eaba monna eo o nkisa lebaleng le kantle, ka nq'a lebōea, o mphihlisa likamoreng tse tobaneng le lebala la Tempele le malebana le lerako le kantle, le ka lebōea. 2Bolelele ba mohaho oo monyako oa oona o shebileng lebōea, e ne e le limethara tse mashome a mahlano, bophara bona e le limethara tse mashome a mabeli a metso e mehlano. 3Kapele ho lebala le kantle, le etsang bophara ba limethara tse leshome, le kapele ho tsela e katiloeng ea lebala le kantle, ho ne ho e-na le mehohoma e lisollorong tse tharo. 4Kapele ho likamore ho ne ho e-na le tsela e phunyeletsang, bophara ba eona e le limethara tse hlano, bolelele e le limethara tse mashome a mahlano. Menyako ea likamore tsena e ne e le ka lebōea. 5Likamore tse kaholimo li ne li qotetsane ho feta tse sollorong e hare le e katlase ho mohaho, hobane mehohoma e ne e jele sebaka se sengata. 6Likamore tsa lisolloro tsena tse tharo li ne li se na litšiea tse kang tsa lebala le kantle. Kahoo likamore tse kaholimo-limo li ne li sesefetse ho feta tse sollorong e katlase le e mahareng. 7Kantle ho ne ho e-na le lerako le bapileng le likamore le lebala le kantle; bolelele ba lona e le limethara tse mashome a mabeli a metso e mehlano. 8Bolelele ba likamore tsa lebala le kantle e ne e le limethara tse mashome a mabeli a metso e mehlano, athe bolelele ba tse tobaneng le Tempele bona e ne e le limethara tse mashome a mahlano. 9Katlas'a likamore tsena ho ne ho e-na le khoro ka bochabela, eo motho a kenang ka eona ha a e-tsoa lebaleng le kantle.
10Ka boroa, ho sika le lerako la lebala le kantle, e leng le kapele ho Tempele, ho ne ho e-na le likamore 11tse nang le tsela e fetang kapele ho tsona. Likamore tsena li ne li tšoana le tse ka lebōea ka bolelele le ka bophara, le ka menyako e tsoelang kantle, le ka litekanyo. Katlas'a likamore tse ka boroa, 12ho ne ho e-na le khoro ka bochabela, eo motho a kenang ka eona. Qalong ea tsela ena e sikileng le lerako, ho leba nq'a bochabela, ho ne ho e-na le monyako oo motho a kenang likamoreng ka oona.
13Eaba monna eo o re ho 'na: “Likamore tse ka lebōea le tse ka boroa, tse shebileng ka lebaleng la Tempele, ke likamore tse halalelang tsa baprista ba atamelang ho Morena; ke moo ba tla jela teng linyehelo tse halalelang ka ho fetisisa. Ke hona moo ba tla boloka linyehelo tse halalelang ka ho fetisisa teng, e leng linyehelo tsa koro, le linyehelo tse etsoang ka baka la sebe, le linyehelo tsa tefelo ea melato, hobane ke sebaka se halalelang. 14Hang hoba baprista ba kene ka sebakeng se halalelang, ba ke ke ba tsoela lebaleng le kantle, ho fihlela ba hlobola liaparo tseo ba sebeletsang ba li apere, hobane lia halalela. Ba tla apara liaparo tse ling ba e-s'o ka ba atamela libaka tseo sechaba se leng ho tsona.”
Litekanyo tsa setša sa Tempele
15Joale ha a se a qetile ho metha Tempele kahare, a nkisa kantle ka khoro e ka bochabela, a metha setša sa Tempele ho potoloha. 16A metha lehlakore le ka bochabela ka leqala le methang, 'me lehlakore lena le ne le etsa limethara tse makholo a mabeli le mashome a mahlano. 17A metha lehlakore le ka lebōea; lona la etsa limethara tse makholo a mabeli le mashome a mahlano. 18A metha lehlakore le ka boroa; lona la etsa limethara tse makholo a mabeli le mashome a mahlano. 19Eaba joale o ea lehlakoreng le ka bophirimela, oa le metha; lona la etsa limethara tse makholo a mabeli le mashome a mahlano. 20Setša seo a se metha ka mahlakoreng a mane. Ho ne ho e-na le lerako le se potolohang, leo bolelele ba lona e neng e le limethara tse makholo a mabeli le mashome a mahlano, bophara ba lona e le limethara tse makholo a mabeli le mashome a mahlano, e le le arolang sebaka se halalelang ho se sa halaleleng.
