Naha e aroleloa merabe
1“Ana ke mabitso a merabe. Moeli oa naha ea Dane o tla tloha ka lebōea, o ee lebōpong la leoatle, ka tsela e lebang Hetelone, ha motho a e-ea Hamate le Hasere-Enane, o e'o fihla moeling o ka lebōea oa Damaseka, lekhalong la Hamate. Ho tloha bochabela ho ea bophirimela Dane o tla abeloa karolo e le 'ngoe ea naha.
2“Naha eo ea Dane e tla sehelana moeli le ea Ashere; 3naha ea Ashere e sehelane moeli le ea Nafthali; 4naha ea Nafthali e sehelane moeli le ea Manase; 5naha ea Manase e sehelane moeli le ea Efraime; 6naha ea Efraime e sehelane moeli le ea Rubene; 7naha ea Rubene e sehelane moeli le ea Juda.
Karolo e bohareng ba naha
8“Ho tloha bochabela ho ea bophirimela, naha e sehelaneng moeli le ea Juda ke naha eo le tla e khethela Morena. Bolelele ba eona ho tloha bochabela ho ea bophirimela bo tla lekana le bophara ba eona ho tloha lebōea ho ea boroa, e be likilomethara tse leshome le metso e 'meli le halofo joaloka likarolo tsa naha tse abetsoeng merabe. Sehalalelo se tla ba bohareng ba eona.
9“Bolelele ba karolo e tla abeloa Morena e tla ba likilomethara tse leshome le metso e 'meli le halofo, bophara ba eona e be likilomethara tse leshome. 10Karolo ea sebaka sena se halalelang e tla ba naha ea baprista. Bolelele ba eona, ho tloha bochabela ho ea bophirimela e tla ba likilomethara tse leshome le metso e 'meli le halofo; ka boroa bophara ba eona, ho tloha lebōea ho ea boroa, e be likilomethara tse hlano. Sehalalelo sa Morena se tla ba bohareng ba eona. 11Sebaka sena e tla ba sa baprista ba tlotsitsoeng, bao e leng litlōhōlō tsa Sadoke, ba ileng ba boloka taelo ea ka, ba sa kang ba kheloha ha bana ba Iseraele ba kheloha, joalokaha Balevi ba ile ba kheloha. 12Naha ena eo ba tla e neoa, ho bona e tla ba mpho e halalelang haholo, 'me e tla sehelana moeli le naha ea Balevi.
13“Balevi le bona ba tla ba le naha e ikhōhlileng ka ea baprista. Bolelele ba eona e tla ba likilomethara tse leshome le metso e 'meli, bophara e be likilomethara tse hlano. 14Naha ena ke e ntlehali, 'me ha baa lokela ho e rekisa, kapa ho e ananya, kapa ho e nea motho e mong, hobane ke naha e halalelang ea Morena.
15“Karolo e setseng, e etsang bolelele ba likilomethara tse leshome le metso e 'meli le halofo, le bophara ba likilomethara tse peli le halofo, eona hase e halalelang, 'me ke e tla sebelisoa ke sechaba ho haha metse, matlo a bolulo le ho etsa makhulo. Motse o tla ba bohareng ba karolo ena. 16Litekanyo tsa motse e tla ba tsena: Bolelele ba oona bo tla lekana le bophara ba oona, e be limethara tse likete tse peli le makholo a mabeli le mashome a mahlano. 17Makhulo a pota-potileng motse a tla lekana ka bolelele le ka bophara, e be limethara tse lekholo le mashome a mabeli a metso e mehlano. 18Sebaka se setseng, se sehelanang moeli le karolo e halalelang, seo ka bochabela se tla etsa likilomethara tse hlano, le ka bophirimela se etse likilomethara tse hlano, e tla ba masimo, 'me tse kotuloang ho sona e be tsa baahi ba motse. 19Basebeletsi ba motse e tla ba ba merabe eohle ea Iseraele.
20“Litekanyo tsa sebaka se bohareng ba karolo e khethehileng li tla lekana, bolelele le bophara ba sona e be likilomethara tse leshome le metso e 'meli le halofo, ho se ho balelloa le sebaka seo motse o hahiloeng ho sona.
21“Sebaka se setseng ka mahlakoreng a mabeli a karolo e khethehileng, le se setseng kathōko ho setša sa motse, se tla abeloa khosana. Ho tloha sebakeng se khethehileng, sebaka seo se tla namela moeling o ka bochabela, se be se namele le moeling o ka bophirimela. Libaka tsena tse peli, tse ikhōhlileng ka meeli ea naha e abetsoeng merabe, e tla ba tsa khosana, 'me sebaka se khethehileng, se nang le Tempele, se tla ba bohareng ba libaka tsena tse ling. 22Karolo ea naha e abetsoeng Balevi le e abetsoeng motse e tla ba bohareng ba karolo ea naha ea khosana. Karolo ea khosana e tla ba pakeng tsa moeli oa Juda le moeli oa Benjamine.
Naha ea merabe e meng
23“Merabeng e meng e setseng, Benjamine o tla ba le karolo e le 'ngoe ea naha, ho tloha bochabela ho ea bophirimela.
24“Naha ea Benjamine e tla sehelana moeli le ea Simeone. 25Naha ea Simeone e sehelane moeli le naha ea Isakare. 26Naha ea Isakare e sehelane moeli le ea Sebulone. 27Naha ea Sebulone e sehelane moeli le ea Gade.
28“Moeli o ka boroa oa naha ea Gade o tla leba boroa ho tloha Tamare, ho ea fihla selibeng sa Meriba-Kadeshe, o ikhōhle ka naha ea Egepeta, ho ea fihla Leoatleng le Leholo.
29“Naha ena ke eona eo le tla e arolela merabe ea Iseraele, hore e be lefa la eona, 'me tsena e tla ba tsona libaka tsa merabe eo,” ho rialo Morena.
Likhoro tsa Jerusalema
30“Tsena e tla ba likhoro tse tsoang ka motseng, lerakong le ka lebōea, le bolelele ba limethara tse likete tse peli le makholo a mabeli le mashome a mahlano. 31Likhoro tsena li tla reelloa merabe ea Iseraele. Tse tharo, tse ka lebōea, li tla bitsoa Khoro ea Rubene, le Khoro ea Juda, le Khoro ea Levi.
32“Lerakong le ka bochabela, le bolelele ba limethara tse likete tse peli le makholo a mabeli le mashome a mahlano, ho tla ba le likhoro tse tharo: Khoro ea Josefa, le Khoro ea Benjamine, le Khoro ea Dane.
33“Lerakong le ka boroa, le bolelele ba limethara tse likete tse peli le makholo a mabeli le mashome a mahlano, ho tla ba le likhoro tse tharo: Khoro ea Simeone, le Khoro ea Isakare, le Khoro ea Sebulone.
34“Lerakong le ka bophirimela, le bolelele ba limethara tse likete tse peli le makholo a mabeli le mashome a mahlano, ho tla ba le likhoro tse tharo: Khoro ea Gade, le Khoro ea Ashere, le Khoro ea Nafthali.
35“Bolelele ba lerako leo, ho potoloha motse, e tla ba limethara tse likete tse robong.
“Ho tloha mohlang oo, lebitso la motse e tla ba: MORENA O TENG MONA.”
