Esekiele o ipeola hlooho
1“Uena ngoan'a motho, nka sabole e bohale, u e sebelise e le lehare, u ipeole hlooho le litelu. U nke sekala, ebe u bea moriri oa hao holim'a sona ka lihlopha tse tharo. 2Ere ha matsatsi a hao a thibella a fetile, u chese sehlopha se le seng sa tsena tse tharo tsa moriri oa hao, u se chese u le kahar'a motse. U nke sehlopha sa bobeli sa moriri oa hao, u o ale ho pota-pota motse, ebe u o otla ka sabole. Sehlopha sa boraro u se hasanyetse moeeng, 'me ke tla se felisa ka sabole. 3U nke liqōba li se kae tsa moriri oa hao, u li tlamelle lemenong la seaparo sa hao. 4Ebe joale u nka liqōba tse ling hape, u li akhela mollong, ua li chesa. Mollo o tla qhōma o e-tsoa ho tsona, ebe o chesa bohle ba ntlo ea Iseraele.”
5Morena Molimo o bua tjena: “Ena ke eona Jerusalema, eo ke e beileng bohareng ba lichaba, e pota-potiloeng ke linaha. 6Empa ka baka la bokhopo ba eona e fetohetse melao ea ka le litaelo tsa ka ho feta lichaba tsohle le linaha tsohle tse e pota-potileng. Jerusalema e lahlile melao ea ka, ha ea latela litaelo tsa ka.”
7Ka baka leo, Morena Molimo o re: “Uena Jerusalema, u mphetohetse ho feta lichaba tse u pota-potileng, ha ua tsamaea ka melao ea ka, ha ua boloka litaelo tsa ka, ha ua ea le ka melao ea lichaba tse u pota-potileng.”
8Ka baka leo, Morena Molimo o re: “Bona, Jerusalema, le 'na kea u loantša, 'me ke tla phethahatsa kahlōlo ea ka holim'a hao moo lichaba tsena li ntseng li bona. 9Ka lebaka la manyala ana a hao, ke tla u etsa seo ke e-s'ong ho se etse, seo nke keng ka hlola ke se etsa. 10Bo-ntat'a ba ahileng Jerusalema ba tla ja bara ba bona, 'me bara le bona ba je bo-ntat'a bona. Ke tla phethahatsa kahlōlo ea ka holim'a hao, 'me masalla a hao ke a qhalanyetse hohle lefatšeng.
11“Ka baka leo, kea ikana, ho rialo Morena Molimo: Kahobane u silafalitse Sehalalelo sa ka ka melimo ea hao e nyonyehang, le ka manyala 'ohle a hao, ke tla u felisa; nke ke ka hlola ke u hauhela, kapa hona ho u utloela bohlōkō. 12Karolo e 'ngoe ea likarolo tse tharo tsa sechaba sa hao, e tla bolaoa ke lefu la seoa le ke sekoboto; karolo ea bobeli e bolaoe ka sabole kathōko ho marako a hao, 'me karolo ea boraro e qhalanele hohle lefatšeng, e phalalisoa ka sabole.
13“Bohale ba ka bo tla fela, 'me khalefo eo ke neng ke ba halefetse ka eona e kokobele, hobane ke tla be ke iphetelitse. Ha ke phethahalitse khalefo ea ka holim'a bona, ba tla tseba hore ke 'na Morena, ea buileng ka cheseho.
14“Ke tla u etsa lesupi, u fetohe sekhobo ho lichaba tse u pota-potileng, le mahlong a bohle ba fetang ka tsela. 15Mohla ke phethahatsang kahlōlo ea ka holim'a hao ka bohale, ke u khalemela, ke halefile, u tla fetoha sekhobo, u nyelisehe; u be thuto le sesomo ho lichaba tsohle tse u pota-potileng. 'Na Morena ke buile. 16Ha ke u fula ka metsu e bohlōkō ea sekoboto, e leng metsu e timetsang, ke tla u fula hore ke u timetse. Sekoboto se tla u oela holimo, se 'ne se eketsehe, lijo tsa hao ke li fokotse. 17Ke tla u rōmela sekoboto le libatana, li u bolaele bana. Lefu la seoa le tšollo ea mali li tla u aparela, sabole e u bolaee. 'Na Morena, ke se ke buile.”
