ESERA 3

₁Ka khoeli ea bosupa, ha bana ba Iseraele ba se ba tsitsitse metseng ea bona, sechaba sa khōbōkanela Jerusalema, ka khopolo e le 'ngoe. ₂Joale Jeshua, mora oa Josadake, a ema, a e-na le bana babo, e leng baprista, le Serubabele, mora oa Shealetiele, le eena a e-na le bana babo. Bana bohle ba haha aletare ea Molimo oa Iseraele, hore ba tle ba nyehelle linyehelo tsa secheso holim'a eona, joalokaha ho ngotsoe Molaong oa Moshe, moporofeta oa Molimo. ₃Le hoja ba ne ba tšaba lichaba tsa linaha tseo, ba haha aletare setšeng sa eona sa pele, 'me holim'a eona ba nyehella Morena ka linyehelo tsa secheso, e leng linyehelo tsa secheso tsa hoseng le tsa mantsiboea. ₄Ba keteka mokete oa maphèphè, joalokaha ho ngotsoe Molaong. Ka letsatsi le leng le le leng ba etsa linyehelo tsa secheso, tse lekanang letsatsi ka leng, ho ea kamoo ho laetsoeng kateng. ₅Kamora' moo, ba 'na ba etsa le linyehelo tsa secheso tse tloaelehileng tsa mokete oa ho thoasa ha khoeli, le tsa mekete eohle e beiloeng ke Morena, e khethehileng, le tsa limpho tsa boithaopo tsa motho ka mong. ₆Ho tloha ka letsatsi la pele la khoeli ea bosupa, ba qala ho etsetsa Morena linyehelo tsa secheso, le hoja mothèo oa Tempele ea Morena o ne o e-s'o raloe.

₇Eaba ba lefa ba betlang majoe, le ba betlang mapolanka. Ba nea Basidone le Batire lijo, le lino, le ole, hore bao ba ba tlisetse lifate tsa kedare, tse tsoang Lebanone, ba ba isetse tsona leoatleng la Jopo, ho ea kamoo Siruse, khosi ea Peresiea, a neng a laetse kateng.

₈Ka khoeli ea bobeli ea selemo sa bobeli ba fihlile Tempeleng ea Molimo Jerusalema, Serubabele, mora oa Shealetiele, le Jeshua, mora oa Josadake, le bana babo bona ba bang, e leng baprista le Balevi, le bohle ba fihlileng Jerusalema, bao e neng e le bathōpuoa, ba qala mosebetsi. Ba khetha Balevi, ho tloha ka ba lilemo tse mashome a mabeli ho ea holimo, hore ba okamele mosebetsi oa ho haha Tempele ea Morena. ₉Eaba Jeshua le bara ba hae, le bana babo, le Kademiele le bara ba hae, e leng bara ba Juda, ba okamela basebetsi ba hahang Tempele ea Molimo. Ba ne ba thusoa ke bara ba Henadade, le bana babo bona, e leng Balevi.

₁₀Eitse ha lihahi li rala mothèo oa Tempele ea Morena, baprista ba ema ba apere liaparo tsa bona, ba nkile literompeta; Balevi, e leng bara ba Asafo, bona ba nkile matlheretlhere, hore ba rorise Morena, ho latela taelo ea Davida, khosi ea Iseraele. ₁₁Ba bina ba neeletsana, ka lihlopha tsa bona, ba rorisa, 'me ba boka Morena, ba re: “O molemo, mohau oa hae ke oa kamehla eohle ho Baiseraele.” Sechaba sohle, ha se rorisa Morena, sa hōoeletsa haholo, hobane mothèo oa Tempele ea Morena o ne o raliloe. ₁₂Empa baprista, le Balevi, le lihlooho tsa malapa, bao e neng e se e le maqheku, ba neng ba ile ba bona ha mothèo oa Tempele ea pele o raloa, ba lla haholo, ha ba bona ho raloa mothèo oa Tempele ena, empa ba bangata bona ba etsa litlatse tsa thabo. ₁₃Motho o ne a ke ke a khetholla lerata la litlatse tsa thabo ho lerata la seboko sa sechaba, hobane sechaba se ne se hōoeletsa haholo, hoo lerata la sona le neng le utloahala hōle.