Molimo o bōpa leholimo le lefatše
1Tšimolohong Molimo o ne a hlole leholimo le lefatše. 2Lefatše le ne le se na sebōpeho, le se na letho; lefifi le ne le aparetse boliba. Moea oa Molimo o ne o okaokela metsi.
3Molimo a re: “Leseli le be teng!” Eaba leseli le ba teng. 4Molimo a bona hore leseli le letle, 'me Molimo a le arohanya le lefifi. 5Molimo a re leseli ke “motšeare”, 'me a re lefifi ke “bosiu”. Ha phirima, ha e-sa, ea e-ba letsatsi la pele.
6Eaba Molimo o re: “Lōapi le be teng pakeng tsa metsi, ho arohanya metsi ho metsi a mang.” 7Molimo a etsa lōapi ho arohanya metsi a kaholimo ho lona, le metsi a katlase ho lona. Ha fela ha e-ba joalo. 8Molimo a re lōapi ke “leholimo”. Ha phirima, ha e-sa, ea e-ba letsatsi la bobeli.
9Joale Molimo a re: “Metsi a katlase ho leholimo a bōkellane sebakeng se le seng, ho hlahe mobu o ommeng!” Ha fela ha e-ba joalo. 10Molimo a re mobu o ommeng ke “lefatše”, metsi a bōkellaneng 'ona a re ke “maoatle”. Molimo a bona hore hoo ho hotle.
11Molimo a re: “Lefatše le melise joang, le litlama tse nang le peō, le lifate tse behang litholoana tse nang le peō ka mefuta ea eona, lefatšeng.” Ha fela ha e-ba joalo. 12Lefatše la melisa joang, le litlama tse nang le peō ka mefuta ea tsona, le lifate tse behang litholoana tse nang le peō ka mefuta ea eona. Molimo a bona hore hoo ho hotle. 13Ha phirima, ha e-sa, ea e-ba letsatsi la boraro.
14Eaba Molimo o re: “Lōapi la leholimo le be le mabone, a tle a arohanye motšeare le bosiu, a be a supe linako tsa selemo, le matsatsi, le lilemo. 15Hape e be mabone a lōaping la leholimo, a bonesang lefatše.” Ha fela ha e-ba joalo. 16Molimo a etsa mabone a mabeli, a maholo; lebone le leholo ea e-ba le busang motšeare, le lenyenyane ea e-ba le busang bosiu; 'me a etsa le linaleli. 17Molimo a li bea lōaping la leholimo hore li bonese lefatše, 18li buse motšeare le bosiu, li arohanye leseli le lefifi. Molimo a bona hore hoo ho hotle. 19Ha phirima, ha e-sa, ea e-ba letsatsi la bone.
20Joale Molimo a re: “Metsi a hlahise libōpuoa tse ngata, tse phelang, tse tsamaeang ka likhakhatha; le linonyana li fofe kaholim'a lefatše, lōaping la leholimo.” 21Molimo a hlola likhanyapa tsa litonanahali, le libōpuoa tsohle tse phelang, tse hlahisitsoeng ke metsi ka bongata, ka mefuta ea tsona; le linonyana tse fofang, ka mefuta ea tsona. Molimo a bona hore hoo ho hotle. 22Molimo a li hlohonolofatsa, a re: “Atang, le ngatafale, le tlale maoatleng; le linonyana li ngatafale lefatšeng.” 23Ha phirima, ha e-sa, ea e-ba letsatsi la bohlano.
24Eaba Molimo o re: “Lefatše le hlahise libōpuoa tse phelang, ka mefuta ea tsona: Makhomo, le lihahabi, le liphoofolo tse hlaha ka mefuta ea tsona.” Ha fela ha e-ba joalo. 25Molimo a etsa liphoofolo tse hlaha ka mefuta ea tsona, le makhomo ka mefuta ea 'ona, le lihahabi tsohle ka mefuta ea tsona. Molimo a bona hore hoo ho hotle.
26Joale Molimo a re: “A re etseng motho ka setšoano sa rōna le ka sebōpeho sa rōna, 'me a laole litlhapi tsa leoatle, le linonyana tse fofang, le makhomo, le lefatše lohle, le tsohle tse hahabang holim'a lefatše.”
27Eaba Molimo o bōpa motho ka setšoano sa hae, o 'mōpa ka setšoano sa Molimo; a bōpa e motona le e motšehali.
28Molimo a ba hlohonolofatsa, a re ho bona: “Atang, le ngatafale, le tlale lefatše, le rene holim'a lona; le laole litlhapi tsa leoatle, le linonyana tse fofang, le tsohle tse tsamaeang holim'a lefatše.”
29Molimo a nt'o re: “Bonang, ke le file meroho eohle e nang le peō, e teng lefatšeng lohle; le lifate tsohle tse behang litholoana tse nang le peō, hore e be lijo tsa lōna. 30Le liphoofolo tsohle tse hlaha, le linonyana tsohle tse fofang, le tsohle tse hahabang holim'a lefatše, le tsohle tse phelang, ke li file litlama tsohle tse tala, hore e be lijo tsa tsona.” Ha fela ha e-ba joalo.
31Joale Molimo a talima tsohle tseo a li entseng, 'me a bona hore li ntle haholo. Ha phirima, ha e-sa, ea e-ba letsatsi la botšelela.
