Aborame o fallela Kanana
1Morena a re ho Aborame: “Tloha naheng ea heno, le ho bang ka uena, le tlung ea ntat'ao, u fallele naheng eo ke tla u supisa eona.
2“Ke tla u etsa sechaba se seholo, ke u hlohonolofatse, ke tumise lebitso la hao, 'me ba bang ba tla hlohonolofala ka uena. 3Ke tla hlohonolofatsa ba u hlohonolofatsang, ke rohake ba u rohakang. Ka yena lichaba tsohle tsa lefatše li tla hlohonolofatsoa.”
4Aborame a tsamaea joalokaha Morena a 'moleletse, 'me Lota a ea le eena. Ha Aborame a falla Harane, o ne a e-na le lilemo tse mashome a supileng a metso e mehlano. 5Aborame a nka mosali oa hae Sarai, le Lota mora oa moen'ae, le thepa eohle eo ba neng ba e sebelitse, le makhoba, le bohle bao ba bileng le bona ha ba le Harane. Ba tloha, ba leba naheng ea Kanana, 'me ba fela ba fihla naheng eo ea Kanana.
6Aborame a feta naheng eo, a ea fihla sebakeng se bitsoang Shekeme, sefateng sa eike sa More. Bakanana ba ne ba ahile naheng eo.
7Morena a iponahatsa ho Aborame, a re: “Naha ena ke tla e nea litlōhōlō tsa hao.” Eaba Aborame o hahela Morena ea iponahalitseng ho eena aletare.
8Joale a tloha moo, a ea thabeng e ka bochabela ho Bethele. A hloma tente ea hae hona teng, Bethele ea e-ba ka bophirimela, Ai ea e-ba ka bochabela. A hahela Morena aletare hona moo, a rapela. Morena. 9Aborame a tsamaea a hloma a hlomola, a leba boroa.
Aborame o theohela Egepeta
10Tlala ea e-ba teng naheng eo; eaba Aborame o theohela Egepeta ho ea jaka-jaka teng, hobane tlala e ne e le kholo naheng ea Kanana. 11Ha a se a le haufi le ho kena Egepeta, a re ho mosali oa hae Sarai: “Bona mona; kea tseba hore u mosali e motle haholo; 12etlare ha Baegepeta ba u bona, ba re: ‘Ke mosali oa hae enoa,’ ebe baa mpolaea, empa uena ba tla u tlohela u 'ne u phele. 13Joale u tle u re u khaitseli ea ka, ke tle ke amohelehe, 'me ke pholohe ka baka la hao.”
14Ha Aborame a fihla Egepeta, Baegepeta ba bona hore mosali eo o motle haholo. 15Mahosana a Faro a 'mona, 'me a mo babatsa ho Faro; eaba mosali eo o isoa tlung ea Faro. 16Ka baka la mosali eo, Aborame a baballeha. A neoa mehlape ea linku le ea likhomo, makhoba a banna le a basali, litonki tse tona le tse tšehali, le likamele.
17Empa Morena a otla Faro, le ba lelapa la hae, ka likotlo tse kholo, ka baka la Sarai, mosali oa Aborame. 18Eaba Faro o bitsa Aborame, o re ho eena: “Ke eng ee, eo u e entseng ho 'na? Ke ka baka la'ng u sa kang ua mpolella hore ke mosali oa hao? 19Ke ka baka la'ng u ileng ua re: ‘Ke khaitseli ea ka,’ 'me eaba ke mo nka hore e be mosali oa ka? Ka baka leo, mosali oa hao ke eo he! Mo nke, u tsamaee!” 20Eaba Faro o laela banna hore ba mo felehetse le mosali oa hae, le tsohle tseo a neng a e-na le tsona.
