Morena o iponahatsa ho Aborahama
1Morena a iponahatsa ho Aborahama a le lifateng tsa eike, tsa Mamore, moo a neng a lutse monyako oa tente, ka nako eo letsatsi le neng le chesa haholo. 2A phahamisa mahlo, a talima, 'me a bona banna ba bararo ba eme pel'a hae. Eare ha a ba bona, a tloha monyakong oa tente, a mathela ho bona ho ba khahlanyetsa. A fihla a itihela fatše, 3a re: “Morena oa ka, haeba kajeno u nkhauhetse, kea u rapela, u se ke ua feta ha mohlanka oa hao. 4A ho ke ho tlisoe metsinyana, le hlatsoe maoto a lōna, le phomole tlas'a sefate. 5Ke sa il'o le batlela sengoathoana sa bohobe, le tle le thobe pelo tsa lōna, ebe joale lea feta, hobane le fapohetse ha mohlanka oa lōna.”
Eaba ba re: “Etsa joalokaha u boletse.”
6Aborahama a potlakela ho Sara, ka tenteng, a re: “Phakisa u nke lirōtoana tse tharo tsa phofo e thumisehileng, u e lube, u etse maqebekoane.”
7Joale Aborahama a mathela mohlapeng oa likhomo, a khetha namane e nonneng, e nama e bonojoana, 'me a e nea mohlanka; eena a e hlaba ka potlako. 8A nka sereleli le lebese la motsilili, le nama ea namane e phehiloeng hantle, tsena a li bea kapele ho bona; eena a ema pel'a bona, tlas'a sefate, ha ba ntse ba e-ja.
9Eaba ba re ho Aborahama: “Mosali oa hao Sara o kae?”
A araba, a re: “O ka tenteng.”
10Morena a re ho eena: “Ke tla boela ke u etela hape isao, ka eona nako ena, 'me bona, mosali oa hao Sara o tla be a se a e-na le mora.”
Sara o ne a ntse a utloa, a eme monyakong oa tente, kamorao ho bona. 11Aborahama le Sara ba ne ba se ba hōlile, litšiu li ile, 'me Sara o ne a se a sa khelohe. 12Sara a tšehela ka pelong, a re: “Ha ke se ke tsofetse tjee, le monna oa ka a tsofetse, na nka ba le thabo e joalo?”
13Morena a re ho Aborahama: “Sara o tšehela'ng, ha a re: ‘'Na ruri nka tsoala ngoana, ke se ke tsofetse tjee?’ 14Na ho na le se ka sitang Morena? Isao, ka eona nako ena, ke tla boela ke u etela, 'me Sara o tla be a se a e-na le mora.”
15Empa Sara a latola, a re: “Ha kea ka ka tšeha;” a rialo hobane o ne a tšaba.
Morena a re: “Che, u ile ua tšeha.”
Aborahama o rapella Sodoma
16Joale banna bao ba ema, ba tloha moo, ba leba nq'a Sodoma. Aborahama a ba felehetsa, ho ba fihlisa tseleng. 17Morena a re: “Na ebe nka patela Aborahama seo ke leng lekhatheng la ho se etsa, 18ha e le moo Aborahama e tla ba sechaba se seholo, se matla, 'me le lichaba tsohle tsa lefatše li tla hlohonolofatsoa ka eena? 19Nke ke! Hobane ke mo khethile hore a tle a laele bana ba hae le lelapa la hae ho tsamaea ka tsela ea Morena ka ho etsa tse lokileng, le ho sebetsa ka toka; e le hore Morena a tle a phethe tseo a li tšepisitseng Aborahama.”
20Eaba Morena o re: “Sello se qosang Sodoma le Gomora se seholo, 'me le sona sebe sa metse eo se seholo haholo! 21Ke tla theohela teng ho ea bona hore na ba entse kamoo sello se fihlang ho 'na se leng kateng, 'me haeba ho se joalo, ke tla tseba.” 22Banna bao ba tloha moo ba leba nq'a Sodoma, empa Aborahama a sala a eme kapel'a Morena.
23Joale Aborahama a atamela, a re: “Na u tla hl'u timetse ba lokileng 'moho le ba khopo? 24Ere mohlomong ho na le ba mashome a mahlano ba lokileng motseng oo, na u tla o timetsa, ho e-na le ho o hauhela ka baka la bao ba mashome a mahlano ba phelang ho oona? 25Khopolo e joalo, ea ho bolaea ba lokileng le ba khopo, e ke e be hōle le maikutlo a hao! Ho be sieo maikutlong a hao ho tšoantša ba lokileng le ba khopo! Na Moahloli oa lefatše lohle a ke ke a ahlola ka toka?”
26Morena a re: “Haeba nka fumana motseng oa Sodoma ho e-na le ba mashome a mahlano ba lokileng, ke tla o tšoarela kaofela ka baka la bona.”
27Aborahama a boela a re: “Ak'u bone! Ke bile sebete ho bua le Morena, le hoja ke le lerōle le molora feela. 28Ere ho haella ba bahlano, ho phetha palo ea mashome a mahlano a ba lokileng, na u tla timetsa motse oo ka baka la ba bahlano bao ba haellang?”
Morena a araba, a re: “Haeba nka fumana ba mashome a mane a metso e mehlano, ha nka ke ka o timetsa.”
29Aborahama a boela a bua le eena hape, a re: “Mohlomong ho fumanoa ba mashome a mane!”
Morena a re: “Ka baka la bao ba mashome a mane ha nka ke ka etsa joalo.”
30Eaba Aborahama o re: “Morena a se ke a mpa a halefa, ke tle ke tsebe ho bua. Mohlomong ho fumanoa ba mashome a mararo!”
Morena a re: “Haeba nka fumana ba mashome a mararo teng, nke ke ka etsa joalo.”
31Aborahama a re: “Ak'u bone! Ke bile sebete ho bua le Morena. Ere mohlomong ho ka fumanoa ba mashome a mabeli teng?”
Morena a araba, a re: “Ka baka la bao ba mashome a mabeli ha ke na ho o timetsa.”
32Eaba Aborahama o re: “Oho, Morena a se ke a mpa a halefa hle, ke mpe ke bue la ho qetela. Teng haeba ho ka fumanoa ba leshome?”
Morena a araba, a re: “Ka baka la bao ba leshome nke ke ka o timetsa.”
33Hoba Morena a qete ho bua le Aborahama, eaba oa itsamaela, 'me Aborahama o khutlela ha hae.
