Jakobo o teana le Esau
1Jakobo a phahamisa mahlo, a talima, 'me a bona Esau a e-tla a e-na le banna ba makholo a mane. Eaba o arola bana: Ba Lea, le ba Ragele, le ba makhabunyane a mabeli. 2A eteletsa makhabunyane le bana ba 'ona pele, a lateloa ke Lea le bana ba hae, 'me bo-Ragele le Josefa ba e-ba kamorao ho bohle. 3Jakobo eena a fetela kapele ho bona, a itihela fatše hasupa, ho fihlela a atamela ho ngoan'abo.
4Empa Esau a matha ho mo khahlanyetsa, a mo kopa molaleng, a mo aka, 'me ba lla.
5Eare ha Esau a phahamisa mahlo, 'me a bona basali le bana, a re: “Ke bo-mang baa ba nang le uena?”
Jakobo a re: “Ke bana bao Molimo a ba fileng mohlanka oa hao ka mohau.”
6Makhabunyane a atamela, 'ona le bana ba 'ona, 'me a itihela fatše. 7Lea le eena a atamela le bana ba hae, 'me ba itihela fatše. Qetellong ha atamela Josefa le Ragele, le bona ba itihela fatše.
8Eaba Esau o re: “U bolela eng ka lihlopha tsee tsohle, tseo ke kopaneng le tsona?”
Jakobo a re: “Ke hore moren'a ka a nkhauhele.”
9Empa Esau a re: “Ha ke hloke letho ngoan'eso, ipolokele seo u nang le sona.”
10Jakobo a re: “Che bo, kea u rapela; haeba u nkhauhetse, amohela mpho eo ke u neang eona, hobane ke bona sefahleho sa hao, joalokaha eka ke bona sefahleho sa Molimo, 'me ua nkamohela ka thabo. 11Ak'u amohele mpho ea ka hle, eo ke u tliselitseng eona, hobane Molimo o ile a nkhauhela, le hobane ke na le tse ntekaneng.” A mo pheella, 'me Esau a amohela mpho eo.
12Joale Esau a re: “A re tsamaeeng, 'me ke tla le etella pele.”
13Jakobo a re ho eena: “Moren'a ka oa tseba hore bana baa fokola, ke na le mehlape ea likhomo le ea linku e nyantšang, 'me ha li ka potlakisoa letsatsi le le leng feela, mehlape eohle e tla shoa. 14Ke kōpa hore moren'a ka a etelle mohlanka oa hae pele, 'me 'na ke tla tsamaea butle, ke iketlile, ho latela mokhoa oo likhomo tseo ke li qhōbang li tsamaeang ka oona, le ho latela mokhoa oo bana ba tsamaeng ka oona, ho fihlela ke fihla Seire, ho morena oa ka.”
15Eaba Esau o re: “A nke ke u siele banna ba bang ba ka.”
Empa Jakobo a re: “Hobane'ng? Ha ke mpe ke hauheloe ke moren'a ka.”
16Ka lona letsatsi leo Esau a khutlela Seire; 17Jakobo eena a ea Sukote, a ikhahela ntlo teng, a hahela le mehlape ea hae masaka. Ka baka leo, a rea sebaka seo lebitso la Sukote.
18Jakobo a fihla ka khotso motseng oa Shekeme, naheng ea Kanana, a e-tsoa Padone-Arame; a hloma litente tsa hae ka pel'a motse oo. 19Setša seo a hlomileng tente ea hae ho sona a se reka ho bara ba Hamore, ntat'a Shekeme, ka lichelete tse lekholo. 20A haha aletare teng, a e bitsa Molimo, Molimo oa Iseraele.
