Morena o araba Habakuke
1Ke tla ema sethaleng sa ka,
ke lalle ke le toreng,
toreng ea balebeli,
ke mamele
seo Morena a se buang ho 'na,
ke imamelle
hore na ke tla mo araba joang.
2Eaba Morena oa nkaraba, o re:
“Ngola taba tsa pono ena
holim'a matlapa,
u li ngole hantle
babali ba se ke ba hakoa.
3Pono ena e sa emetse nako ea eona,
e haufi e phethahala,
'me e ke ke ea thetsa.
Leha e ka lieha, uena u e emele,
e tla fela e phethahale,
ha e ka ke ea lieha.
4Bona, ea khopo eena
a ke ke a phela,
athe ea lokileng
o tla phela ka tumelo ea hae.”
Kotlo ea ba sa lokang
5“Ruri, veine ke moeki oa motho;
ea ikhōhōmōsang a ke ke a phela.
O meharo joaloka Qalo ea Bafu;
joaloka lefu ha a ke a khōra.
O ipokellela lichaba tse ngata-ngata,
merabe kaofela a e fetole bathōpuoa.
6“Kaofela ha bona
ba tla mo nyelisa,
ba mo nyahanye,
ba mo nyefōle, ba re:
‘Ho malimabe
ea ipokellelang tsa bosholu,
ea ithuisang ka ho hanyapetsa batho!
Hoo ho tla ba joalo ho fihlela neng?’
7Bao u ba hanyapetsang
ha ba tl'o u tsometsa,
uena u thōthōmele
ha ba u tsohela matla?
Uena u tla ba mothōpuoa oa bona!
8Kaha u tlatlapile
lichaba tse ngata,
masalla a tsona
le 'ona a tla u tlatlapa,
hobane u tšolotse mali a batho,
u sentse linaha,
le metse ua e ripitla,
le baahi bohle ba eona
ua ba timetsa.
9“Ho malimabe
ea ithuisang ka mano,
ea hahang ntlo ea hae
holim'a qhoōa,
hore a tl'a tsebe ho phema koluoa.
10Merero ea hao
e hlabisitse ba heno lihlong,
merero ea ho bolaea
lichaba tse ngata;
kahoo u beile
bophelo ba hao kotsing.
11Majoe a lerako a tla hlaba mokhosi,
maballo a lehong
a arabele mokhosi oo.
12“Ho malimabe
ba hahileng motse oa bona,
ba o hahileng ka ho tšolla mali,
ba o haha
holim'a moralo oa bolotsana!
13Na hase Morena oa mabōtho
ea ileng a rera,
hore mosebetsi oa batho
o felisoe ka mollo,
le hore lichaba li sebeletse lelea?
14Empa tsebo e tla tlala,
e tlale lefatše kahohle,
tsebo ea ho tseba tlōtla ea Morena,
e tlale lefatše
sa metsi a tletse leoatle.
15“Ho malimabe
ea noesang ba habo tahi,
a ba tšelle eona
ho fihlela ba tahoa,
a tl'a tsebe
ho bona bofeela ba bona.
16U tla apareloa ke lihlong,
e seng ke tlōtla.
Nako ke ea hao joale, ea hore u noe!
Noa he, bofeela ba hao bo pepesehe!
Senoelo se ka tsohong
le letona la Morena,
sea pota, se tla be se fihle ho uena,
ebe lihlong
li aparela tlōtla ea hao.
17Tšenyo e entsoeng Lebanone
e tla u timetsa,
polao ea libatana tsa eona
e tla u tšosa,
hoba mali a batho
a tšolotsoe ke uena,
ua senya naha, le motse oa o ripitla,
baahi bohle ba oona ua ba timetsa.
18“Molingoana oa bohata
o thusa mo-o-etsi ka eng?
Ke setšoantšo feela,
se bolela mashano!
Moetsi oa sona
o tšepa 'mōpo oa matsoho a hae,
o iketselitse molingoana,
molingoana o semumu!
19Ho malimabe ea reng ho lehong:
‘Phaphama!’
le ho lejoe le semumu:
‘Phahama!’
Na melimo e tjee
e ka tseba ho porofeta?
E khabisitsoe ka khauta
le ka silefera,
empa ka ho eona
moea oa bophelo ha o eo!
20Morena eena
o ka Tempeleng ea hae,
Tempele ea hae e halalelang;
fatše lohle
le ke le khutse kapel'a hae.”
