Jesu o moholo ho feta Moshe
1Ha ho le joalo, bana beso ba halalelang, bao re nang le kabelo 'moho le lōna pitsong ea leholimo, talimang morōmuoa le Moprista e Moholo, Jesu, eo re 'molelang tumelong ea rōna. 2O ile a tšepahala ho ea 'meileng, joalokaha Moshe a ile a tšepahala tlung eohle ea Molimo. 3Jesu o bile o lokeloa ke tlōtla e fetang ea Moshe, joalokaha sehahi sa ntlo se hlompheha ho feta ntlo ka boeona. 4Efela ntlo e 'ngoe le e 'ngoe e na le sehahi sa eona, 'me sehahi sa tsohle ke Molimo. 5Moshe o ile a tšepahala tlung eohle ea Molimo e le mosebeletsi ea pakang tse tlang ho boleloa ke Molimo, 6empa Kreste, e le Mora, o tšepahala tlung ea hae eo a e okametseng. Ntlo eo ke rōna ha re ka ba sebete, 'me ra bōlōka tšepo eo re leng motlōtlō ka eona.
Phomolo ea sechaba sa Molimo
7Ka baka leo, joalokaha Moea o Halalelang o bolela:
“Kajeno ha le utloa lentsoe la hae,
8se thatafatseng lipelo tsa lōna
joaloka mohla
ba mo fetohelang,
joaloka mohla
ba mo lekang lehoatateng,
9moo bo-ntat'a lōna
ba ileng ba nteka teng,
ba 'nonya,
leha ba ne ba bone liketso tsa ka
10ka lilemo tse mashome a mane.
Ka baka leo,
ka halefela molōko oo,
ka re: ‘Kamehla lipelo tsa bona
li khelohile,
ha baa ka ba tseba litsela tsa ka.’
11Eaba ke hlapanya ke halefile,
ke re:
‘Ba ke ke ba ba ba kena,
ba kena phomolong ea ka.’ ”
12Bana beso, hlokomelang, esere mohlomong e mong oa lōna a ba le pelo e mpe, e hanang ho lumela, e mo arohanyang le Molimo ea phelang. 13Le mpe le khothatsane ka matsatsi 'ohle, ha ho sa ntsane ho thoe: “Kajeno”, e le hore ho se be le ea mong ea ithatafatsang ka ho thetsoa ke sebe. 14Re fetohile ba nang le kabelo le Kreste ho tsa hae, ha feela re tiisetsa, ho isa qetellong, tšepong e tiileng eo re bileng le eona qalong, 15kaha ho thoe:
“Kajeno ha le utloa lentsoe la hae,
se thatafatseng lipelo tsa lōna
joaloka mohla ba mo fetohelang.”
16Joale ke bafe ba ileng ba le utloa, 'me ba mo fetohela? Na hase bohle ba ileng ba tsoa Egepeta ba tsamaisoa ke Moshe? 17Ke bafe bao a ileng a ba halefela ka lilemo tse mashome a mane? Na hase ba ileng ba etsa sebe, bao litōpō tsa bona li ileng tsa sala lehoatateng? 18Ke bafe bao a ileng a ba hlapanyetsa hore ba ke ke ba kena phomolong ea hae le ka mohla, haese batho bao ba neng ba hana ho mamela? 19Rea bona hè, hore ba ile ba sitoa ho kena ka baka la ho se lumele ha bona.
