HOSEA 4

₁Lōna Baiseraele,

utloang ntsoe la Morena!

Morena o qōsa baahi ba naha ena,

hobane ha ho 'nete, ha ho mohau,

le ho tseba Molimo naheng ena

ha ho eo.

₂Ke mahlapa, ke leshano,

ke lipolao, ke bosholu,

ke ho etsa bohlola!

Melao eohle-eohle baa e tlōla,

mali a tšoloha a sa tsoa tšoloha!

₃Kahoo naha e tla apara bofifi,

bohle ba phelang ho eona

ba tla timela,

ho timele libatana tsa naha,

ho timele nonyana tse fōfang,

tlhapi tsa leoatle le tsona li timele!

₄“Empa ho se be motho ea tsekang,

kapa motho ea nyatsang e mong;

ke 'na ea qōsang uena moprista.

₅Ka baka leo,

u tla khōthōmetseha motšeare,

bosiu moporofeta

a khōthōmetsehe le uena,

'me 'na ke tla timetsa 'm'ao.

₆Chaba sa ka

se timetsoa ke ho hloka tsebo.

“Kahobane tsebo u se u e lahlile,

le 'na ke tla u lahla joalo,

u ke ke ua ba moprista oa ka;

kaha u lebetse molao

oa Molimo oa hao,

le 'na bana ba hao ke tla ba lebala.

₇Ha baprista ba ntse ba ngatafala,

ba ile ba ntšiteloa haholo;

kahoo tlōtl'a bona

ke tla e fetola lihlong.

₈Ba ruisoa ke sebe sa chaba sa ka,

ba thabela ha se etsa bokhopo.

₉Joaloka sechaba,

baprista le bona ba tla otloa,

ke tla ba otla,

ke ba otlele metsamao ea bona,

ke ba putse

ka baka la liketso tsa bona.

₁₀“Ba tla ja mahlabelo,

empa ba ke ke ba khōra;

ba tla ineella bootsoa,

empa ba ke ke ba ata,

hobane ha ba sa tsotella Morena,

₁₁ba ineeletse ho etsa bootsoa.”

“Veine e ncha le veine ea molatsa

e hlokisa chaba sa ka kelello.

₁₂Chaba sa ka se laola ka likoqoana,

melangoana ke eona

e buang le sona.

Moea oa bootsoa oa se khelosa,

se furaletse Molimo,

se etsa bootsoa.

₁₃Tlhōrōng tsa lithaba

ba nyehela ka mahlabelo,

maralleng teng

ba chesetse mokubetso,

le tlas'a eike le popoleri le leōka,

hoba teng moriti ke o mapholi.

Kahoo barali ba lōna

ba etsa bootsoa,

lingoetsi tsa lōna le tsona lia fèba.

₁₄“Barali ba lōna

nke ke ka ba otlela bootsoa,

le lingoetsi tsa lōna

ha li etsa bofèbè,

hobane banna bona

ba matha le liotsoa,

ba nyehela ka mahlabelo

ba e-na le matekatse,

chaba se hlokang kutloisiso

se tla timela!

₁₅“Uena Iseraele,

leha u iphetotse letekatse,

Juda a se k'a ba molato

joaloka uena,

Gilegale teng le se ke be la hata,

le Bete-Afene le se nyolohele teng,

kapa la hlapanya

ka Molimo ea phelang!

₁₆Baiseraele ba manganga

sa khomo'a sethole,

na ebe Morena a ka ba alosa,

a ba katla sa likonyana phuleng?

₁₇Efraime o khomaretse melingoana,

mo leseng, le mo tlohele.

₁₈Lino tsa bona lia ba tahisa,

ba etse bootsoa ba sa khaotse;

babusi ba bona

ba hlanyetsa tse lihlong.

₁₉Setsokotsane se tla ba sobokella,

se ba sobokelle, se ba fefole,

mahlabelo a bona

a ba hlabise lihlong.”