ESAEA 15

Ka bosiu bo le bong

Are e Moabe e timelitsoe!

Ka bosiu bo le bong

Kire e Moabe e timelitsoe!

₂Batho ba Dibone

ba nyolohetse tempeleng ea bona,

ba nyolohetse ho ea llela

libakeng tsa bona tsa borapeli;

baahi ba Moabe

ba llela Nebo le Medeba,

ba ikutile lekorana,

ba ipeotse le litelu.

₃Ba tsamaea terateng tsa motse,

ba apere tse mahoashe,

bohle ba lla

ba le holim'a marulelo,

le mabaleng a motse,

ba itabanya fatše ba ntse ba lla.

₄Ba Heshebone le ba Elale

baa hōoeletsa,

mantsoe a bona a utloahala hohle

ho ea fihla Jahase;

kahoo le bahlabani ba Moabe

baa hōoeletsa,

bahlabani bohle baa thōthōmela.

₅Pelo ea ka e llela ba Moabe,

baphaphathehi ba bona

ba balehetse Sōoare,

ba baleha

ho ea fihla Egelate-Sheleshiea,

ba nyoloha ka tsela e eang Lohite.

ba nyolohela Lohite

ba ntse ba lla,

ba llela timelo ea bona

ba le tseleng e eang Horonaime.

₆Metsi a Nimerime a pshele,

joang bo omeletse,

limela li felile,

ha ho letho le letalana.

₇Maruo ao

ba a sebelitseng ka thata,

ba a bokella,

ba a kakatetse

ho ea tšela

Molatsoana oa Meluoane.

₈Mokhosi oa bona o hoballa,

ho ea fihla meeling ea Moabe.

seboko sa bona se fihla Egelaime,

sello sa bona

se fihle le Beere-Elime.

₉Metsi a Dimone

a tlerefetse ke mali,

ke hona ke sa tla tlisa koluoa,

ke e tlisetsa Dimone:

Baphaphathehi ba Moabe

ba tla bolaoa ke tau,

ba tla sala teng

le bona e tla ba bolaea.