ESAEA 2

₂Mohl'a matsatsi a ho qetela,

thaba eo Tempele ea Morena

e leng holim'a eona

e tla phahamela lithaba tsohle,

e phahamele le maralla 'ohle,

lichaba tsohle li phallele ho eona.

₃Machaba-chaba a tla fihla, a re:

“Tloong, re nyoloheleng

Thabeng ea Morena,

re nyoloheleng

Tempeleng ea Molimo,

Tempeleng ea Molimo oa Jakobo.

O tla re ruta litaba tsa hae,

re tle re tsamaee tseleng tsa hae;”

kaha molao

o tla tsoa Thabeng ea Sione,

ntsoe la Morena

le tsoe Jerusalema.

₄Morena o tla ahlōlela lichaba,

a felise ho se utloane

har'a chaba tse ngata;

sabole tsa tsona

li tla li etsa mehoma,

marumo a tsona li a etse lisekele,

chaba li ke ke

tsa hlola li nkelana lisabole,

li ke ke

tsa hlola li itokisetsa lintoa.

₅Lōna ba ntlo ea Jakobo tloong,

a re tsamaeeng seling la Morena.

₆Morena, u lahlile chaba sa hao,

e leng ntlo ea Jakobo,

se tletse tumelo

tse tsoang Bochabela,

e bile ke linohe joaloka Bafilesita,

se khomaretse meetlo ea balichaba.

₇Naha ea sona

e tletse silefera le khauta,

matlotlo a tsona

ha a na pheletso;

naha ea sona

e tletse pere tse ngata,

kariki tsa sona tsa ntoa

ha li na palo.

₈Naha ea sona

e tletse melimo ea bohata,

se khumamela

mesebetsi ea matsoho a sona,

mesebetsi e bōpiloeng

ke menoana ea sona.

₉Batho bohle ba tla obama,

banna bohle ba ikokobetse,

u se ke ua ba tšoarela, Morena.

₁₀Ipateng har'a mafika,

le ipate le malumeleng,

ka baka la ho tšaba Morena

le khanya ea botlotlehi ba hae!

₁₁Moikakasi o tla kokobetsoa,

baikhōhōmōsi bona ba nyenyefatsoe,

mohlang oo ke Morena feela,

ea tla phahamela tsohle.

₁₂Tsatsi le teng

le beiloeng ke Moren'a mabōtho,

le beetsoeng

baikhantši le baikhōhōmōsi

le bohle ba ikakasang,

hore a tla'a ba kokobetse;

₁₃le beetsoe le kedare tsa Lebanone,

likedare tse telele, tse phahameng,

le lieike tsohle tsa Bashane;

₁₄le lithaba tsohle tse tlhōrō li telele,

le maralla 'ohle a phahameng;

₁₅le tora e 'ngoe le e 'ngoe

e phahameng,

le marako 'ohle a hahelelitsoeng;

₁₆le likepe tsohle tsa Tarashishe,

le mesebetsi eohle

e khahlang mahlo.

₁₇Boikhantšo ba motho

bo tla kokobetsoa,

boikhōhōmōso ba hae bo felisoe,

mohlang oo ke Morena feela,

ea tla phahamela tsohle;

₁₈melimo ea bohata

e tla felisoa eohle.

₁₉Batho ba tla balehela mahaheng,

ba balehele katlas'a mafika,

ba kene mekoting

e chekiloeng fatše,

ka baka la ho tšaba Morena

le khanya ea botlotlehi ba hae,

ha a phahama ho tšosa lefatše.

₂₀Mohlang oo melingoana ea bohata

ea silefera, le ea khauta,

eo batho ba e etselitseng

ho e khumamela,

ba tla e akhella

likhoiti le bo-'mankhane.

₂₁Batho ba tla balehela mahaheng,

katlas'a mafika le mafarung,

ka baka la ho tšaba Morena,

le ho tšaba khanya

ea botlotlehi ba hae,

ha a phahama ho tšosa lefatše.

₂₂Khaotsa ho tšepa motho,

motho ea phefumolohang feela.

Hona motho e ne e le eng?