Motse oa Davida o malimabe
1Ariele! Ariele!
U malimabe hakaakang!
Uena motse oo Davida
a kil'a emisa ho oona!
A lilemo li fete ka ho latelana,
le mekete ea hao
e 'n'e hlahlamane.
2Ke tla u lihela koluoa holimo,
u be bofifing,
u lle sa 'mokotsane,
u ke aletare e tukang mollo.
3Ka mabōtho
ke tla u etsetsa sakana-la-nkōpe,
ka litora ke u etsetse thibella,
ke hlome metero ho u pota-pota.
4U tla bua u rapaletse fatše,
u bue u le lerōleng la lefatše;
ntsoe la hao
e tla ka la sethotsela,
polelo tsa hao
li hoeshetsoe li e-tsoa lerōleng.
5Matšoele a lira tsa hao
a tla fetoha lerōle,
mphi tse sehlōhō
li fefoloe sa 'mōkō,
hang-hang hona ho tla etsahala
ka ho panya ha ntši!
6Moren'a mabōtho
o tla u pholosa,
a u pholose ka lialuma
le ka tšisinyeho ea lefatše,
a u pholose ka rata le leholo,
ka sefefo le setsokotsane
le malakabe a timetsang.
7Matšoele a chaba tsohle
tse loantšang Ariele,
a e futuhelang
le qhobosheane ea eona,
a e futuhele a be a e thibelle,
a tla feta sa toro le pono ea bosiu.
8Joalokaha ea lapileng
a ee a lore a e-ja,
ere ha a tsoha
a iphumane a nts'a lapile;
joalokaha ea nyoriloeng
a ee a lore a e-noa metsi,
ere ha a tsoha
a iphumane a khathetse, a nyoriloe;
ho tla ba joalo
le ho matšoele a chaba tsohle,
ho matšoele a loantšang
Thaba ea Sione.
Ha baa natsa likeletso
9Tšerehanang le thotofale!
Iphoufatseng le sitoe ho bona!
Tahoang empa le sa noa veine!
Ratseelang empa le sa noa joala!
10Morena o le tliselitse
sephume sa boroko,
o le tutubalitse,
lōna baporofeta,
o le khurumelitse lihlooho,
lōna linōhe.
11Ho uena pono ena e tšoana le buka e koetsoeng, ea bitieloa. Ha u ka e nea motho ea tsebang ho bala, ua re ho eena: “E bale!” eo o tla araba, a re: “Ke sitoa ho e bala, hobane e koetsoe, e bitietsoe.” 12Leha u ka e nea motho ea sa tsebeng ho bala, ua re ho eena: “E bale!” eo o tla re: “Ha ke tsebe ho bala!”
13Eaba Morena oa bua, o re:
“Chaba sena se bua le 'na
ka melomo feela,
se ntlhompha
ka melomo ea sona feela,
empa pelo tsa sona
tsona li hōle le 'na;
se ntšaba
ho ea ka litaelo tsa batho,
litaelo tseo
se li rutiloeng ke batho.
14Kahoo chaba sena
ke tla boela ke se makatsa,
ke se etsetsa limakatso tse ngata.
Bohlale ba bahlalefi ba sona
bo tla fela,
kelello ea ba nang le kelello
e nyamele.”
Tšepo ea kamoso
15Ho malimabe ba patelang Morena
merero ea bona,
ba e etsetsang lefifing, ba re:
“Ke mang ea re bonang?
Ke mang ea re tsebang?”
16Ntho le li hlabisa hlohlolingoane,
joalokaha eka sebōpi sa tsona
ke letsopa.
Na se bōpiloeng
se ka bua ka 'mōpi oa sona,
sa re: “Hase eena ea mpōpileng”?
Na pitsa
e ka bua ka sebōpi sa eona,
ea re: “Ha se tsebe letho”?
17Haufinyane, Lebanone e tla fetoha
masimo a khoiti,
khoiti eo e fetohe
moru o teteaneng.
18Ka tsatsi leo, bo-tutu
ba tla utloa polelo tsa buka,
leha lifofu li le lefifing,
li le botšong,
mahlo a tsona a tla bona.
19Baikokobetsi ba tla boela
ba thabela Morena,
mafutsana a thabele
Ea Halalelang oa Iseraele.
20Ba sehlōhō ba tla timela,
le basomi ba fele,
ba chachehelang bobe
le bona ba timetsoe:
21Ba beang motho molato
ka polelo tsa bona,
ba tsoakeletsang
ea emelang toka ka lekhotleng,
ka paki ea bohata
ba sitise ea lokileng,
ba mo sitise ho ahlōloa ka toka.
22Ka baka leo, Morena ea lopolotseng Aborahama o bua tjena ho ba lelapa la Jakobo:
“Jakobo ha a sa tla hlola
a hlajoa ke lihlong,
fahleho sa hae
ha se ka ke sa hlola se pulufala,
23Bana ba hae
ba tla halaletsa lebitso la ka,
ha ba bona mosebetsi
oa matsoho a ka
ba halaletse lebitso la ka,
ba halaletse
Ea Halalelang oa Jakobo,
ba tšabe Molimo oa Iseraele.
24Bao meea ea bona e lahlehileng
ba tla ba le kutloisiso,
ba neng ba belaela
ba thabele ho fumana thuto.”
