Chaba sa Molimo sea tšelisoa
1“Tšelisang sechaba sa ka,
se tšeliseng,”
ho rialo Morena.
2Khothatsang Jerusalema ka lerato,
e bolelleng:
Bokhoba ba eona bo felile,
sebe sa eona se tšoaretsoe,
Morena o e otletse sona haholo.
3Lentsoe la ea hōoang, le re:
“Lokisang 'mila oa Morena,
le o lokise feelleng,
le otlollele Molimo oa rōna
'mila lehoatateng.
4Likhohlo tsohle li tla katoa,
lithaba le maralla li bothalatsoe,
le tsona litutulu li bothalatsoe,
baka tse makukuno li batalatsoe.
5Tlōtla ea Morena e tla bonahatsoa,
batho bohle
ba tla e boha ba le 'moho,
hoba Morena o boletse joalo.”
6Lentsoe le ile la re: “Hōoa!”
Eaba 'na ke re:
“Ke tla hōoa ke re'ng?”
E-re:
“Batho bohle ba joaloka joang,
tlōtla ea bona
e ka ea palesa tsa naha.
7Joang boa pona,
palesa li fōfōrehe,
ha moea oa Morena
o fokela ho tsona.
Ruri batho ba joaloka joang.
8Joang boa pona,
palesa li fōfōrehe
empa ntsoe la Molimo oa rōna
le hlola kamehla.”
9Uena Sione,
ea tlisang molaetsa o molemo,
nyolohela thabeng e phahameng.
Uena Jerusalema,
ea tlisang molaetsa o molemo,
hōoeletsa haholo u se na tšabo.
Bolella metse ea Juda, u re:
“Bonang,
Molimo oa lōna ke enoa!”
10Bonang, Morena Molimo
o tla e le Ea Matla,
o tla busa ka letsoho la hae.
Bonang, o tla le moputso oa hae,
phetetso ea hae e mo eteletse pele.
11O katla mohlape oa hae
joaloka molisa,
likonyana o li sika
ka matsoho a hae,
a li sikele sefubeng sa hae,
litsoetse tsona a li khanne hantle.
Ha ho Molimo ea kang oa Iseraele
12Ea kil'a metha metsi a leoatle
ke mang,
a a metha ka seatla sa hae?
Ea kil'a seha moeli oa maholimo
ke mang,
a o seha ka seatla sa hae?
Ea kil'a kha rōle la lefatše
ka sethōtō ke mang?
Ea kil'a bèa lithaba le maralla,
a li bea sekaleng, ke mang?
13Ea kil'a ruta Moea oa Morena
ke mang?
Ea kil'a mo ruta
e le moeletsi oa hae ke mang?
14Morena o kōpile mang
hore a mo eletse?
Ho ahlōla ka toka
a ho rutoa ke mang?
Tsebo eona a e rutoa ke mang?
Tsela ea kutloisiso
a e bontšoa ke mang?
15Ruri chaba li ka lerotholi,
rotholi la metsi ka nkhong,
li ka lerōlenyana
ha le le sekaleng;
ho eena boima ba lihlekehleke
bo ka lerōlenyana.
16Fate tsa Lebanone
ha li lekane ho besa,
ho besa mollo aletareng,
phoofolo tsa teng
ha li lekane ho etsa secheso.
17Chaba tsohle ke lefeela ho eena,
o li talima e le mafeela
a se nang thuso.
18Joale Molimo
le ka mo lekanya le mang?
Hona le ka re o tšoana le mang?
19Setsebi se etsa setšoantšo
sa molimo oa bohata,
ebe lelala le se maneha khauta,
le se etsetse ketane tsa silefera.
20Mofutsana ea sitoang
ho etsa nyehelo e joalo,
o khetha sefate
se ke keng sa ba sa bola;
a batle setsebihali sa mohlalefi
ho mo etsetsa setšoantšo
sa molimo oa bohata,
se ke keng sa oa.
21Na ha le tsebe,
kapa ha le e-s'o utloe?
Ha lea ka la tsebisoa
ho tloha tšimolohong?
Ha le e-s'o utloisise
haesale lefatše le theoa?
22Molimo o lutse teroneng
kaholim'a lefatše,
baahi ba lona
ba tšoana le mehloanyane.
Maholimo o a sarolotse
joalokaha eka ke lesira,
a a ala sa tente
eo ho pheloang ho eona.
23Mahosana o a etsa mafeela-feelane,
babusi ba fatše lena
a ba fetole lefeela.
24Ba joaloka sethopo
se qetang ho hlongoa,
seo metso ea sona e e-s'o ka e tiea;
ha moea oa Molimo o foka
se ee se pone,
setsokotsane se se fefole
joalokaha eka ke 'mōkō.
25“Joale le ka ntekanya le mang?
La re thak'a ka eena ke mang?”
ho rialo Ea Halalelang.
26Lelalang, le talime maholimo:
Tseo le li bonang
li bōpiloe ke mang?
Ke ea balang naleli tsa leholimo,
a li bale ka bomong,
lebōtho ka leng
a le bitse ka lebitso la lona?
Ka baka la matla a hae a maholo,
le ka baka la bonatla ba hae,
ha ho le le leng le lahlehang.
27Uena Jakobo, u leng Iseraele,
ke hobane'ng ha u bua, u re:
“Metsamao ea ka
Morena ha a e tsebe,
Molimo oa ka
ha a natse tokelo ea ka?”
28Na ha le tsebe,
kapa ha le e-s'o utloe?
Morena ke Molimo
oa kamehla eohle,
ke eena 'Mopi oa lefatše lohle.
A ke ke a khathala kapa a tepella,
mehopolo ea hae
e ke ke be ea fihleloa.
29O matlafatsa ba tepeletseng,
ba khathetseng o ba tsosa molōta.
30Bacha baa khathala,
'me ba tepelle,
bahlankana ba khōthōmetsehe,
ba be ba oe;
31empa ba tšepileng Morena
ba tla tsoha molōta,
ba fofele holimo joaloka ntsu;
ba tla matha,
empa ba ke ke ba khathala,
ba tsamaee,
ba se ke ba felloa ke matla.
