Melimo ea Babilona ea bohata
1Bele oa ketoha,
Nebo o khatheng la ho oa,
melingoana ea bona
e bofiloe holim'a lipelesa.
Melingoana eo e bofiloeng e boima,
e imela lipelesa tse khathetseng.
2E khatheng la ho oa,
e ketoha hammoho,
e sitoa ho ithōla moroalo,
melingoana eo le eona
e ea bothōpuoeng.
3“'Mameleng
lōna ba ntlo ea Jakobo,
lōna masalla 'ohle
a ntlo ea Iseraele,
lōna bao ke le sikileng
ho tloha mohla le tsoaloang,
lōna bao ke le pepileng
ho tloha mohla le tsoaloang.
4Ho fihlela boqhekung ba lōna
ha ke e-s'o fetohe,
ke tla 'ne ke le pepe
ho fihlela le e-ba bo-raputsoe.
Ke 'na ea le bōpileng,
'me ke tla 'ne ke le sike,
ke tla 'ne ke le pepe,
ke le namolele.
5“Joale le tla ntekanya le mang,
le nketse thaka ea hae?
Le tla ntekanya le mang
hore ke tle ke tšoane le eena?
6Ba bang ba ntša khauta
ka mekotleng ea bona,
ebe ba bea silefera sekaleng,
ba hira lelala la khauta
ho etsa setšoantšo,
tšoantšo sa molimo oa bohata,
ba se obamele, ba se khumamele.
7Baa se nka,
ba se jare ka mahetla a bona,
ba se bee tulong tsa sona,
se eme teng;
moo se emeng teng
se ke ke sa sisinyeha.
Leha motho a ka ipiletsa ho sona
ha se mo arabe,
leha e le hona ho mo pholosa
tsietsing ea hae.
8“Hopolang taba ena,
e tsitse kelellong tsa lōna,
le 'ne le e hopole, lōna bakoenehi.
9Hopolang taba tsa boholo-holo
taba tsa khale,
ke 'na Molimo,
ha ho na e mong;
ke 'na Molimo,
ha ho ea tšoanang le 'na.
10Ho tloha qalehong
ke tsebisitse batho tsa ho qetela,
ho tloha mehleng ea boholo-holo
ka ba tsebisa,
ka ba tsebisa tse tla etsahala,
ka re: ‘Merero ea ka e tla tiea,
ke tla etsa tsohle tseo ke li ratang.’
11Ke bitsa lenong le e-tsoa bochabela,
e leng motho
ea tsoang naheng e hōle,
ke 'mitsetsa
ho tla phetha thato ea ka.
Seo ke se boletseng ke tla se phetha,
seo ke se rerileng ke tla se etsa.
12'Mameleng, lōna ba pelo li thata,
lōna ba leng hōle le ho loka.
13Ho loka ha ka ke ho tlise haufi,
ebile ha ho sa le hōle haholo,
ho pholosa ha ka
ho ke ke ha lieha.
Sione ke tla e pholosa,
Iseraele ke e tlotlise.”
