ESAEA 48

₁“Mamelang sena,

lōna ba ntlo ea Jakobo,

lōna ba bitsoang

ka lebitso la Iseraele,

lōna ba tsoang lelōkong la Juda,

lōna ba ikanang

ka lebitso la Morena,

lōna ba rapelang

Molimo oa Iseraele,

empa e se ka 'nete kapa ka ho loka.

₂Le ipitsa baahi

ba motse o halalelang,

'me le tšepa Molimo oa Iseraele,

Moren'a mabōtho

ke lona lebitso la hae:

₃“Tse fetileng

ke ne ke li bolele khale,

ka li phatlalatsa,

ka etsa hore li tsejoe;

ka li etsa ka ho panya ha ntši,

'me tsa e-ba teng.

₄Ke tsebile

kamoo u leng manganga kateng;

molala oa hao

o sataletse sa tšepe,

phatla ea hao

eona e ka lethose.

₅Ka baka leo, ke u boleletse tsena

e sa le khale;

li e-s'o etsahale ka u bolella tsona,

e le hore u tle u se ke ua re:

‘Molimo oa ka oa bohata

o li entse,

molimo oa ka oa lehong

le molimo oa ka oa tšepe,

ke eona melimo e ileng ea li laola.’

₆“Tsena kaofela u li utloile,

ua li bona,

na ha u na ho li lumela?

Ho tloha joale

ke tla u bolella tse ncha,

ke u bolelle tse patehileng,

tseo u sa li tsebeng,

₇Li bōpiloe hona joale,

e seng tšimolohong,

ho fihlela kajeno

u ne u e-s'o li utloe;

ka hona u ke ke ua re:

‘Ke n'e ntse ke li tseba.’

₈Ha ua k'a li utloa le ho li utloisisa;

tsèbè tsa hao haesale li thibane

ho tloha khale.

Ke tseba hantle

kamoo u leng maqiti kateng,

u bitsitsoe lehlabapieo

ho tloha mohla u tsoaloang.

₉“Ka baka la lebitso la ka,

khalefo ea ka kea e thisisa,

ka baka la thoriso ea ka

e ke ke ea fihla ho uena,

esere mohlomong

ka tšoha ke u timetsa.

₁₀Bona! ke u hloekisitse,

le hoja e se sa silefera;

ke u lekile

ka sebōping sa matšoenyeho.

₁₁Ka baka la ka,

ka baka la ka feela,

hona ke ho entse.

Nka lumela joang

hore ke senngoe lebitso?

Tlōtla ea ka

ha nka ke ka e nea e mong.”

₁₂“'Mamele, uena Jakobo,

uena Iseraele eo ke u bitsitseng:

E hlile ke 'na;

ke 'na oa pele le oa ho qetela.

₁₃Tsoho la ka

ke lona le theileng lefatše,

tsoho la ka le letona

le alile maholimo;

ha ke a bitsa a emela hong kaofela.

₁₄“Khōbōkanang kaofela, le mamele:

Ke molingoana ofe

o boletseng tsee e sa le pele?

Ea ratoang ke Morena

o tla phetha thato ea Morena,

thato eo a e phethe

holim'a Babilona,

tsoho la hae

le loantše Bakalatiea.

₁₅'Na, e leng 'na, ke se ke buile;

e, ke se ke bile ke 'mitsitse.

Ke mo tlisitse,

o tla atleha hohle moo a eang teng.

₁₆“Atamelang pel'a ka,

le mamele hona:

Ho tloha tšimolohong

ha ke qala ho bua,

ha kea ka ka buela sephiring;

ha tseo li etsahetse

ke n'e se nts'e ke le teng.”

Joale Morena Molimo o nthōmme,

o nthōmme ka Moea oa hae.

₁₇Morena, Molopolli oa hao,

Ea Halalelang oa Iseraele,

o bua tjena:

“Ke 'na Morena Molimo oa hao,

ea u rutang

tse leng molemo ho uena,

ea u tsamaisang

tseleng e u loketseng.

₁₈“Hoja u kil'a mamela litaelo tsa ka,

khotso ea hao

e ka b'e le joaloka nōka,

ho loka ha hao

ho ka maqhubu a leoatle.

₁₉Tlōhōlō tsa hao

li ka be li le kaa ka lehlabathe,

bana ba hao

ba le kaa ka tlhaku tsa lona

li se na palo;

lebitso la bona

le ne le ke ke la fela,

leha e le ho hlakoha kapele ho 'na.”

₂₀Tsoang Babilona,

le balehe Bakalatiea!

Phatlalatsang tsena

ka mehoo ea thabo,

le li phatlalatse

ho ea pheletsong tsa lefatše,

le re: “Morena o lopotse Jakobo,

mohlanka oa hae.”

₂₁Ha baa ka ba nyoroa

ha a ba tsamaisa har'a lehoatata;

o il'a etsa hore metsi a phalle

a e-tsoa lefikeng;

a otla lefika, metsi a phorosela.

₂₂“Khotso ha e eo

ho batho ba khopo,”

ho rialo Morena.