ESAEA 5

₁Moratuoa oa ka

ke tla 'minela sefela,

ke binele tšimo ea hae sefela,

tšimo ea hae ea morara;

moratuoa o ne a e-na le tšimo

rallaneng le mobu o motle.

₂A e khatha, a hleka majoe ho eona,

ho eona a lema

morara o motle-motle,

a haha kalana bohareng ba eona,

a ba a e chekela setlhōtlelo,

a lebella hore e behe

morara o monate,

empa ea beha morara oa hlahlaane.

₃“Lōna banna ba Jerusalema

le banna ba Juda,

a ke le ahlōle pakeng tsa ka,

le tšimo ea ka ea morara.

₄Nkabe ke etselitse tšimo ea ka eng,

ho feta seo ke e etselitseng sona?

Ha ke ne ke lebeletse

hore e behe morara o monate,

ho tlile joang

hore e behe morara oa hlahlaane?

₅Ke tla le bolella seo ke tla se etsa,

ke se etse

tšimong ea ka ea morara:

Motero oa eona

ke tla o tlosa e fetohe lekhulo,

mabota a eona ke a heletse,

a hatakeloe ka maoto.

₆Ke tla e tlohela e senyehe,

morara o ke ke oa faoloa

kapa oa lemeloa,

hlabahlabane le meutloa

li tla mela ho eona,

ke thibele maru

a se k'a e nesetsa pula.”

₇Tšimo ea morara

ea Morena oa mabōtho,

ke ntlo ea Iseraele,

chaba sa Juda

ke semela se mo khahlang;

Morena a batla toka,

empa a e hloka,

bakeng sa ho loka

ea e-ba lillo le tšollo ea mali.

₈Ho malimabe lōna

ba inkelang matlo a batho,

lōna ba itjellang masimo a batho,

ho fihlela baka sohle e le sa lōna,

le phela le le inotši naheng eo.

₉Morena oa mabōtho

o 'nyenyelelitse, a re:

“Matlo a mangata

a tla sala e le lithako,

matlo a maholo, a matle,

a hloke baahi.

₁₀Liakere tse leshome

tsa tšimo ea morara

li tla beha lilethara

tse robeli feela tsa veine;

peō e etsang lilethara

tse lekholo le mashome a robeli

e behe lilethara

tse leshome le metso e robeli,

tse kaalo feela tsa koro.”

₁₁Ho malimabe

ba tsohellang joaleng,

ka malungoalungoana,

ba inoellang ho fihlela bosiu,

ba tahoe ke veine.

₁₂Meketeng ea bona

ba letsa harepa le likatara,

ba tilinye meropa le makolilo,

ba noe veine;

mosebetsi oa Morena

oona ha ba a natse,

tseo a li entseng tsona

ha ba li bone.

₁₃Ka baka leo,

chaba sa ka se tla thōpuoa

hoba chaba sena

se hloka kutloisiso;

bahlomphehi ba sona

ba tla bolaoa ke tlala,

bongata ba sona

bo tla shoa ke lenyora.

₁₄Kahoo lebitla le ba lapetse,

le se le ahlame, le ba emetse;

khabane tsa bona le matšoele

li theohela teng,

li theohela le menyaka

le marata a tsona.

₁₅Bohle ba tla nyenyefatsoa,

ba kokobetsoe,

baikakasi le bona ba kokobetsoe.

₁₆Morena oa mabōtho

o tla ba phahamela kahlōlong,

Molimo ea halalelang

o tla iponahatsa,

ka ho loka a iponahatse a halalela.

₁₇Linku li tla fula

eka ke makhulong a tsona,

likonyana tsona li fule

thakong tsa barui.

₁₈Ho malimabe

ba ikhulelang bokhopo,

ka thapo tsa mafeela,

ba ikhulelang sebe

joalokaha kariki e huloa;

₁₉ba reng:

“Molimo a akofise mesebetsi ea hae

re e bone,

merero e atamele,

merero ea Ea Halalelang oa Iseraele

e atamele re tle re e tsebe.”

₂₀Ho malimabe ba reng

bobe ke ho loka,

ho loka ke bobe,

ba reng lefifi ke leseli,

leseli ke lefifi,

ba reng ho babang ho monate,

ho monate hoa baba.

₂₁Ho malimabe ba reng ba bohlale,

bona ba iponang ba le masene.

₂₂Ho malimabe ba reng

ha ba hlōloe ke joala,

ba reng ba tseba haholo

ho tsoaka lino;

₂₃ba lokollang ea molato

ka baka la tjotjo,

ea se nang molato

eena ba mo hlokele toka.

₂₄Ka baka leo, ba tla cha

sa litlhaka li chesoa ke mollo,

ba che sa matlakala

a chesoa ke malakabe,

metso ea bona e tla bola,

thunthung tsa bona

li fefohe joaloka lerōle,

hobane ba furaletse molao

oa Moren'a mabōtho,

ba nyelisitse polelo

tsa Ea Halalelang oa Iseraele.

₂₅Ka baka leo, khalefo ea Morena

e tlōkōmela chaba sa hae,

o phahamisitse tsoho la hae,

oa ba otla, thaba lia reketla,

tōpō tsa bona eka matlakala

har'a seterata.

Leha ho le joalo,

khalefo ea hae ha e khaotse,

tsoho la hae

o nts'a le phahamisitse.

₂₆O phahamiselitse

chaba tse hōle mokhèlè,

ba pheletsong tsa lefatše

o ba bitsa ka mololi,

ke bana ba e-tla kapele,

ba potlakile!

₂₇Ha ho le ea mong oa bona

ea khathalang, a khōthōmetsehe,

ha ho leqhama

le khoehlileng thekeng,

ha ho lerapo

la moqathatso le khaohileng.

₂₈Metsu ea bona e nchocho,

liqha tsa bona li lutse li kobiloe,

tlhako tsa pere tsa bona

eka mahakoe,

mabili a koloi tsa bona tsa ntoa

eka setsokotsane.

₂₉Ho puruma ha bona ho ka ha tau,

ba puruma joaloka litaoana,

baa rora

ha ba tšoara phofu ea bona,

ba e hlasinye

ho se ea ka e pholosang ho bona.

₃₀Tsatsing leo, ba tla puruma

ba e hateletse,

ba purume sa leoatle le hoasa.

Etlare ha motho a talima lefatše

a bone lefifi le litlallo,

leseli le lona

le fifalitsoe ke maru.