ESAEA 51

₁“Lōna ba labalabelang ho loka,

'mameleng,

le lōna ba batlang Morena:

Talimang lefika

leo le khephotsoeng ho lona,

le morafo

oo le chekiloeng ho oona.

₂Talimang ho ntat'a lōna,

ntat'a lōna Aborahama,

le talime le ho Sara

ea le belehileng.

Ha ke bitsa Aborahama

o ne a se na ngoana,

ka mo hlohonolofatsa,

ka ba ka mo anafatsa.

₃“E, Morena

o tla utloela Sione bohloko,

a utloele bohlōkō

masupi 'ohle a eona,

mafeella ao a a fetole

a be joaloka Edene,

mahoatata a eona

a be joaloka rapa sa Morena.

Thabo le nyakallo

li tla fumanoa ho eona,

ho utloahale mantsoe

a pina tsa liteboho.

₄“Lōna batho ba ka,

a le ke le mamele!

Lōna chaba sa ka

ntšekeheleng tsèbè!

Molao o le tsamaisang

o tla tsoa ho 'na,

kahlōlo ea ka

e be seli le bonesetsang lichaba.

₅Ho loka ha ka ho se ho atametse,

ho pholosa ha ka ho se ho le tseleng,

toka e tla tlisetsoa lichaba

ke tsoho la ka.

Ba lihlekehlekeng

ba tla ntebella ka cheseho,

ba lebelle ka tšepo

ho sireletsoa ke tsoho la ka.

₆Lelatsang mahlo

le talime maholimong,

le be le talime le tlase, lefatšeng;

maholimo a tla nyamela

sa mosi ha o nyamela,

lefatše le tsofale joaloka seaparo,

baahi ba lona ba shoe

joaloka lintsintsi.

Empa ho pholosa ha ka

ke ha kamehla eohle,

le ho loka ha ka

ha ho ka ke ha felisoa.

₇“Lōna ba tsebang se lokileng,

mamelang!

Lōna chaba se tsebang molao oa ka,

chaba seo molao a ka

o leng ka pelong tsa sona:

Le se ke la tšaba

ha batho ba le nyefola,

kapa la tšosoa ke mahlapa a bona.

₈Tšoèlè e tla ba ja

sa ha e e-ja seaparo,

sebōkō se ba je

joalokaha se e-ja boea.

Empa ho loka ha ka

ho tla hlola kamehla eohle,

ho pholosa ha ka

e be ha melōko eohle.”

₉Morena tsoha!

Tsoha u re thusetse

ka tsoho la hao le matla!

U tsohe

joaloka mehleng ea khale-khale,

u tsohe

joaloka melōkong ea boholo-holo.

Na hase uena

ea neng a khabelake Rahaba?

Na hase uena

ea neng a khehlepele khanyapa?

₁₀Na hase uena

ea neng a pshese leoatle,

ea neng a pshese metsi

a boliba-boholo?

Ea neng a bule tsela

bolibeng ba leoatle,

hore ba lopolotsoeng

ba tle ba tsebe ho tšela?

₁₁Balopolloa ba Morena ba tla khutla,

ba kene Sione ba bina ka nyakallo,

thabo ea kamehla eohle

e be mefapahlooho ea bona,

thabo le nyakallo li ba aparele,

masoabi le masisapelo

'ona a ba tlohele.

₁₂“'Na, 'na ke inotši,

ke 'na ea le tšelisang.

U mang uena u tšabang batho,

libōpuoa tse shoang?

U tšabang batho

ba itšoanelang le joang feela?

₁₃U leballa'ng Morena,

e leng 'Mōpi oa hao,

eena ea ileng a ala maholimo,

a ba a rala methèo ea lefatše?

U phelela'ng ka tšabo,

ka matsatsi 'ohle,

ka baka la khalefo ea mohatelli

ea rerileng ho u timetsa?

E kae khalefo ea mohatelli eo?

₁₄Bathōpuoa ba matsoalong

ba khatheng la ho lokolloa,

ha ba ka ke ba shoela

ka chankaneng ea bona,

ha ba ka ke ba hloka

leha e le bohobe.

₁₅“Ke 'na Morena Molimo oa hao,

ea fuluhang leoatle

hore maqhubu a lona a hoase;

Moren'a mabōtho

ke lona lebitso la hae.

₁₆Lipolelo tsa ka

li tla tsoa molomong oa hao,

ke u sirelelitse

ka moriti oa seatla sa ka.

Ke 'na ea beileng maholimo

tulong tsa 'ona,

ke 'na

ea ralileng methèo ea lefatše,

ke 'na ea reng ho Sione:

‘U sechaba sa ka.’ ”

₁₇Tsoha! Tsoha!

Ema uena Jerusalema,

uena ea noeleng senoelo sa khalefo,

sa khalefo ea Morena

se le atleng sa hae,

uena ea minyeletsang maritsa,

maritsa a joala bo tsekelisang batho.

₁₈Har'a bohle ba mala a hae,

ha ho ea mo tataisang,

har'a bao a il'a ba hōlisa,

ha ho ea mo tšoarang ka letsoho.

₁₉Koluoa tse peli tsena

li u oetse holimo;

ea ka u tšelisang ekaba ke mang?

U oetsoe ke tšenyeho le tahleho,

u oetsoe ke sekoboto le sabole;

ea ka u thobang pelo

ekaba ke mang?

₂₀Baahi ba hao ba akhehile,

ba rapaletse lihukung

hukung tsa literata tsohle,

ba joaloka khama

e tšoasitsoe lerabeng.

Ba pipitletsoe ke khalefo ea Morena,

le eona khalemo ea Molimo oa hao.

₂₁Ka baka lena, mamela mona,

uena ea otliloeng,

ea tahiloeng,

le hoja u sa tahoa ke veine.

₂₂Morena, Morena oa hao,

Molimo oa hao,

eena ea buellang chaba sa hae,

o bua tjena: “Bona

Ke phamotse letsohong la hao

senoelo se neng se u tsekelisa;

senoelo seo sa khalefo ea ka

u ke ke ua hlola

u noela ho sona hape.

₂₃Ke tla se bea matsohong

a batubi ba hao,

bona ba ileng ba re ho uena:

‘Paqama fatše,

re tle re u tsamaee holimo!’

Ua etsa hore

mokokotlo oa hao o ke lefatše,

o ke 'mila

oo ho tsamauoang ho oona.”