Melimo ea bohata ha e na thuso
1Batho ba lokileng baa timela,
ha ho le ea mong
ea keng a nahane hona;
ba nang le tumelo
le bona baa felisoa,
ha ho ea utloisisang hona:
Ba lokileng
ba balehisetsoa bobe bo tlang.
2Ba hlokang koli
ba tla ichoella ka khotso,
ba iphomolele hamonate
lefung la bona.
3“Lōna bana ba baloi
atamelang mona,
le lōna bana ba lifebe,
le lōna ba liotsoa!
4Eo le mo somang ke mang?
Eo le mo nyekoletsang melomo,
maleme a leketlile, ke mang?
Na hase lōna
bana ba mahlabaphieo,
lōna bana ba batho ba leshano?
5Le sebeletsa melimo ea bohata
ka ho etsa bohlola,
le bo etsa
le le tlas'a lifate tse talana,
ka likhohlong le ka mahaheng
le etsa mahlabelo a secheso
ka bana ba lōna.
6Majoe a boreleli, a linōkana,
ke eona melimo ea lōna
e, efela e le eona kabelo ea lōna.
Melingoana ena
le e etsetsa nyehelo ea lino,
le bile le e etsetsa
le nyehelo ea lijo.
Ebe na tse tjee li ka nthabisa?
7Mealo ea lōna
e holim'a thaba tse phahameng,
thabeng tse holimo,
ke moo le nyolohelang teng
ho ea etsa mahlabelo.
8Kamora' mamati
le likosene tsa lōna,
ke moo le entseng meupello,
la mphuralla,
la apola bofeela ba lōna,
la kena liphateng,
la ithabisa ka ho etsa bohlola,
la iketsetsa setsoalle
le bao le ba ratang,
la ba la talima bofeela ba bona.
9La itlotsa ka ole
e nang le menkoane,
la ba la ea ho khosi,
la rōmela maqosa a lōna
naheng tse hōle,
la ba la a rōmela Qalong ea Bafu.
10Maeto a lōna a malelele
a le baketse mokhathala,
empa la sitoa le ho re:
‘Ha ho na thuso!’
Le 'nile la fumana mekhoa
ea ho imatlafatsa,
kahoo ha lea ka la khathala.
11“Eo le mo tšohang, ke mang,
eo le mo tšabang hakaale, ke mang,
hoo le ileng
la ntlhokela botšepehi,
la ba la sitoa le ho nkhopola,
kapa hona ho 'nahana
ka pelong tsa lōna?
Na hase hobane
e le khale ke khutsitse,
ha e le moo le se le sa ntšabe?
12Ke tla pepesa mesebetsi ea lōna,
mesebetsi eo lōna le reng e lokile;
empa ha e ka ke
ea le tsoela molemo.
13Ha le ipiletsa, le batla thuso,
e-reng melingoana ea lōna
e mengata e le thuse!
Kaofela ha eona moea o tla e fefola,
moeana o fokolang o e pheule.
Empa ea nketsang setšabelo sa hae,
fatše la pallo e tla ba lefa la hae,
a rue thaba ea ke e halalelang.”
Molimo o tšelisa ba soabelang libe tsa bona
14Lentsoe le tla re:
“Katang, katang,
le batalatse 'mila!
Tlosang se khōpang
tseleng ea chaba sa ka!”
15Ea phahameng, ea holimo-limo,
eena ea phelang kamehla eohle,
eo lebitso la hae le halalelang, o re:
“Ke phela bakeng se phahameng,
bakeng se halalelang,
ea robehileng moea
ke phela le eena,
le ea ikokobelitseng
ke phela le eena,
ke khothatsa ea ikokobetsang,
ke khothatsa ea robehileng moea.
16Ha ke na ho qosa kamehla eohle,
kapa hona ho halefa kamehla,
ho seng joalo
ba kapele ho 'na ba ka tepella,
e leng batho bao ke ba bōpileng.
17Ka baka la sebe sa bona
ke ile ka ba halefela,
ka ba otla,
ka ba patela fahleho sa ka ke halefile;
empa ba 'na ba tsoela pele
mekhoeng ea bona e khopo.
18Tsela tsa bona ke li bone,
ke tla ba phekola;
ke ba tsamaise,
ke tšelise ba llang,
19ke etse hore
maleme a bona a bine lithoko:
‘Khotso, khotso
ho ba hōle le ba haufi!’
Ke tla ba folisa,”
ho rialo Morena.
20Ba khopo
ba tšoana le leoatle le tuluana,
le tuluana le se na khotso,
maqhubu a lona a akhela seretse
le litšila lebōpong.
21“Khotso ha e eo ho ba khopo,”
ho rialo Molimo oa ka.
