Pitso ea Esaea
1Ka selemo seo khosi Usiea a ileng a shoa ka sona, ka bona Morena a lutse teroneng e phahameng, mophètho oa seaparo sa hae o tletse Tempele. 2Lirafime li ne li eme kaholimo ho eena, 'me serafime ka seng se ne se e-na le mapheo a tšeletseng: Ka a mabeli se ikhurumelitse sefahleho, ka a mabeli se ikoahetse maoto, ka a mabeli se fofa. 3Li ne li hōoeletsana, li re:
“Oa halalela! Oa halalela!
Oa halalela Morena oa mabōtho,
fatše lohle le tletse tlōtla ea hae!”
4Molumo oa lentsoe la se hōoeletsang oa sisinya litšiea tsa menyako, 'me Tempele ea tlala mosi.
5Eaba ke re: “A 'na eloa! Ke malimabe hakaakang! Ke timetse! Ke motho ea puo li mpe, 'me ke phela har'a sechaba se lipuo li mpe. Mahlo a ka a bone Khosi, Morena oa mabōtho.”
6Se seng sa lirafime sa fofela ho 'na, ka tsohong la sona se tšoere leshala le hlenneng, leo se le okhileng aletareng ka letlao. 7Sa ama molomo oa ka ka lona, sa re: “Leshala lena le amme molomo oa hao! Molato oa hao o tlositsoe, 'me u tšoaretsoe sebe sa hao.”
8Eaba ke utloa lentsoe la Morena le re: “Ke tla rōma mang? Ke mang ea tla ea bakeng sa rōna?”
Eaba ke re: “Ke 'na enoa! Nthōme!”
9A re: “Tsamaea,
u e'o bolella sechaba sena,
u re: ‘Ho utloa le tla utloa,
empa le ke ke la utloisisa;
ho sheba le tla sheba,
empa le ke ke la bona.’
10Thotofatsa lipelo tsa batho bana,
u thibe litsèbè tsa bona,
u tutubatse mahlo a bona,
esere mohlomong
ba bona ka mahlo a bona,
ba utloa ka litsèbè tsa bona,
ba utloisisa ka lipelo tsa bona,
ba sokoloha, eaba kea ba folisa.”
11Eaba ke re:
“Morena, e tla ba ho fihlela neng?”
Morena a araba, a re:
“Ho fihlela metse e fetoha lithako,
e sala e se na baahi,
matlo a sala a le feela,
naha e senngoa,
e fetoha nahathothe;
12ho fihlela Morena
a leleketse bohle hōle,
naha eona e fetohile nanaola.
13Leha ho ka sala
a le mong ho ba leshome,
le eena o tla felisoa
joaloka sefate se seholo,
a felisoe joaloka fate sa eike,
seo kutu ea sona
e salang ha se rengoa.
Kutu ea sona ke peō e halalelang.”
