BAAHLOLI 5

₂“Kaha baetapele ba Iseraele

ba eteletse Baiseraele pele,

kaha sechaba se ikentse

sehlabelo ka boithaopo,

lōna rorisang Morena!

₃“Lōna likhosi mamelang,

Lōna mahosana sekehang tsebe,

'na ke tla binela Morena,

ke binele Morena Molimo,

Molimo oa Iseraele.

₄“Morena, ha u futuha u e-tsoa Seire,

u haola, u e-tsoa naheng ea Edomo,

lefatše la na la thōthōmela,

maholimo a thoathoaretsaka,

e, maru a nesa ea litloèbèlèlè.

₅Lithaba tsa qhibiliha

kapel'a Morena,

le Sinai ea qhibiliha kapel'a Morena

Molimo oa Iseraele.

₆“Mehleng ea Shamegare

mora oa Anate,

mehleng ea Jaele

litsela tsa mela mohloa,

batsamai ba hlahlathela

ka litselana.

₇Iseraele ea hloka babusi,

ea ba hloka ho fihlela 'na Debora

ke ema ka maoto,

ke le 'm'a Baiseraele.

₈Ba ikhethela melimo e mecha,

ntoa ea e-ba teng

khorong tsa metse ea bona.

Har'a ba kete tse mashome a mane

tsa Baiseraele,

na ho kile ha bonoa thebe

kapa lerumo?

₉Pelo ea ka e rata

balaōli ba Iseraele,

lōna ba ikentseng sehlabelo

sa sechaba ka boithaopo,

lōna rorisang Morena!

₁₀“Lōna ba palamang litonki,

tonki tse tšoeu

lōna ba lutseng libutšabutšeng,

le lōna bo-mofeta-ka-tsela,

bolelang joalo.

₁₁Hōle-hōle le marata a bo-rametsu,

bakeng tseo

ho khuoang metsi ho tsona,

teng ba tla pheta

ketso tse lokileng tsa Morena,

ketso tse lokileng

tsa babusi ba hae ba Iseraele;

joale chaba sa Morena

sa theohela khorong tsa metse.

₁₂“ ‘Phaphama, phaphama, Debora!

Phaphama, phaphama,

phōkōla sefela!

Tsamaea Barake,

mora oa Abinoame,

u khanne bathōpuoa ba hao!’

₁₃“Masalla a mahosana a theoha,

chaba sa Morena sa theoha

joaloka bahale ho nthusetsa.

₁₄Banna ba Efraime

ba theohela naheng ea Amaleke,

Benjamine a u latela

a le har'a mabōtho a hao.

Balaōli ba theoha

ba e-tsoa ha Makiri,

ha Sebulone ha tsoa

ba nkileng mokhele oa molaōli.

₁₅Mahosana a Isakare

a tsamaea le Debora,

Isakare le eena a tsamaea le Barake,

ea e-ba letlaburu retheng tsa hae

ho leba khohlong.

ba morabe oa Rubene ba ferekana,

ba ipotsa hore na ba ka ea thusetsa.

₁₆Le luletse'ng har'a mehlape ea lōna,

le mametse makolilo a balisana?

Ba morabe oa Rubene ba ferekana,

ba ipotsa hore na ba ka ea thusetsa.

₁₇Gileade a itulela mose ho Jorodane,

Dane eena o luletse'ng ka likepeng?

Ashere eena

o ituletse lebōpong la leoatle,

o iphomoletse likoung tsa lona.

₁₈Morabe oa Sebulone

o ipeile kotsing ea lefu,

le oa Nafthali o entse joalo

o le holim'a lithaba.

₁₉“Likhosi tsa fihla tsa loana,

likhosi tsa Kanana

tsa loana li le Taanake,

li le Taanake pel'a metsi a Megido,

empa ha lia ka tsa hapa silefera.

₂₀Linaleli tsa loana li le holimo,

tsa loantša Sisera

li le tseleng ea tsona.

₂₁Molapo oa Kishone oa ba hōhōla,

molapo oa boholo-holo,

molapo oa Kishone;

ba hatakele ka matla,

uena moea oa ka!

₂₂Tlhako tsa lipere tsa tilaka fatše,

tsa tilaka fatše ha natla li baleha.

₂₃“ ‘Rōhaka Merose,’

ho rialo ngeloi la Morena,

‘U rōhake,

u rōhake le baahi ba eona,

hobane ha baa ka ba thusa Morena,

ha baa ka ba thusa Morena

lireng tsa hae.’

₂₄“Ho lehlohonolo Jaele har'a basali,

eena mosali oa Hebere oa Mokene,

o lehlohonolo har'a basali bohle

ba phelang litenteng.

₂₅Sisera a kōpa metsi,

Jaele a mo nea lebese,

a mo tlisetsa lebejana

ka mohope oa mahosana.

₂₆Ka tsoho le letšehali

a nka thakhisa ea tente,

ka tsoho le letona

a nka noto,

a ngaba Sisera ka eona,

a pshatla hata la hae,

a khokhothela thakhisa

tlhafunelong ea hae.

₂₇Sisera a oela fatše maotong a hae,

a oela fatše, a tjapalla,

a oela maotong a hae, a tjapalla,

a shoela moo a oetseng teng.

₂₈“'M'a Sisera

a hlaha ka fesetere a qamaka,

a hōoa a le kamora' lesira, a re:

‘Kariki ea hae ea ntoa

e liehile hakaakang?

Liqi tsa lipere tsa hae

ha li utloahale ke'ng?’

₂₉Tse bohlale-hlale

tsa khosatsana tsa hae

lia mo araba,

e, le eena o bile oa ikaraba:

₃₀‘Ba hapile, ba arolelana tsa khapo,

mohlabani ka mong

o abeloa moroetsana,

kapa o abeloa baroetsana

ba le babeli;

Sisera o abeloa seaparo se mebala,

seaparo se mebala, se hōmiloeng;

aparo tse peli, tse hōmiloeng,

tsa molaleng, ke tsa ka!’

₃₁“Lira tsohle tsa hao

a li ke li timele, Morena,

empa ba u ratang

ba be joaloka letsatsi,

letsatsi ha le chaba

ka matla a lona.”