Baiseraele ba hloka botšepehi
1Morena o re:
“Ha monna a hlala mosali oa hae,
mosali a mo tlohela,
a nyaloa ke monna osele,
na monna a ka khutlela ho eena?
Naha e ka silafala kahohle!
U bile seotsoa
sa banna ba le bangata,
na u ka boela
ua khutlela ho 'na hape?”
ho rialo Morena.
2“Phahamisa mahlo
u talime maralleng;
ke kae moo u sa kang
ua etsa bootsoa teng?
U il'a emela banna kathōko ho tsela,
ua ba lalla sa Moarabia lehoatateng.
U silafalitse naha ka bootsoa ba hao,
ua e silafatsa le ka bokhopo ba hao.
3Kahoo mafafatsane a ile a thibeloa,
pula ea hoetla le eona
ea se ke ea na;
empa ua tiisa phatla joaloka seotsoa,
ua ngangella,
lihlong tsa se ke tsa u hlaba.
4Ha ke re u qeta ho ipiletsa,
u ipiletsa ho 'na, u re:
‘Ntate, motsoalle oa ka
ho tloha bocheng ba ka,
5na u tla nkhalefela kamehla,
lisuoa tsa hao e be tsa mehla eohle?’
Lintho tsena tsohle u li buile,
ua etsa bokhopo bohle
ka boithatelo ba hao.”
Eka khona Baiseraele le Bajuda ba bake
6Mehleng ea puso ea khosi Josiea, Morena a boela a re ho 'na: “Na u bone kamoo Iseraele oa mokoenehi a entseng kateng? O hloeletse holim'a maralla 'ohle a phahameng, a ea tlas'a lifate tsohle tse talana, a etsetsa bootsoa hona moo. 7Eare hoba a etse tsena tsohle ka re: ‘O tla khutlela ho 'na!’ Empa ha aa ka a khutla. Joale khaitseli ea hae Juda, ea hlokang botšepehi, le eena a bona tsena. 8Iseraele ea hlokang botšepehi ka mo hlala, ka ba ka mo nea lengolo la thlalo, ka baka la tsohle tsa bokoenehi ba hae, le tsa bohlola boo a bo entseng, empa Juda, khaitseli ea Iseraele e hlokang botšepehi, ha aa ka a tšaba, eaba le eena o etsa bootsoa. 9Kahoo Iseraele o silafalitse naha ka bootsoa ba hae bo se nang lihlong, a etsa bofèbè ka ho khumamela majoe le lifate. 10Empa leha tsena tsohle li etsahetse, Juda, khaitseli ea Iseraele e hlokang botšepehi, ha aa ka a khutlela ho 'na ka pelo ea hae eohle, o tlile ka mano feela,” ho rialo Morena.
11Joale Morena a re ho 'na: “Iseraele oa mokoenehi o iponahalitse a lokile ho feta Juda ea hlokang botšepehi. 12E-ea, u e'o phatlalatsa molaetsa ona ka lebōea, u re:
“Khutla, uena Iseraele
oa mokoenehi,”
ho rialo Morena.
“Ha nka ke ka hlola
ke u sosobanyetsa sefahleho,
hobane ke mohau,”
ho rialo Morena.
“Ha ke na ho u halefela
kamehla eohle.
13Lumela feela molato oa hao,
hore o fetohetse Morena,
Molimo oa hao,
rato la hao
ua le hafela melimo esele,
ua le hafa
u le tlas'a lifate li le talana;
esita le 'na ha ua ntlhompha,”
ho rialo Morena.
14Morena o re: “Khutlelang ho 'na, lōna bana ba koenehileng, hobane ke 'na Morena oa lōna. Ke tla nka motho a le mong motseng o mong le o mong, ke nke ba babeli morabeng o mong le o mong oa Iseraele, ebe ke le isa Sione. 15Ke tla le nea babusi ba tla ntlhompha, ba tla le tsamaisa ka tsebo le ka kutloisiso.” 16Hape Morena o re: “Matsatsing ao, etlare ha le eketseha, le anafala naheng eo, ebe batho ha ba sa bua ka areka ea selekane sa Morena! Ha ba sa tla bua ka eona kapa ba e hopole, kapa ba e hlōlōheloe, 'me ba ke ke ba etsa e 'ngoe hape. 17Ha nako eo e fihla, Jerusalema e tla bitsoa terone ea Morena, lichaba tsohle li phuthehele Jerusalema ho ea khumamela Morena. Chaba tseo li ke ke tsa hlola li etsa seo lipelo tsa sona tse manganga, tse khopo, li lakatsang hore se etsoe. 18Ka nako eo, ba ntlo ea Juda ba tla kopana le ba ntlo ea Iseraele, ba falle 'moho naheng e ka lebōea, ba fallele naheng eo ke e neileng bo-ntat'a lōna moholo hore e be lefa la lōna.”
Chaba sa Molimo se rapela melimo ea bohata
19Eaba Morena o re:
“Ke ne ke tla thabela
ho le etsa bana ba ka,
ke le abele naha e khahlehang,
lefa le letle
ho feta mafa a chaba tsohle.
Ka ba ka re:
Lōna le tla mpitsa Ntate,
'me le ke ke la khaotsa ho ntatela.
20Empa joaloka mosali
ea hlokang botšepehi,
a bo hloke a ba a tlohele monna,
le lōna ba ntlo ea Iseraele
le ntlohetse,
le ntlhoketse botsepehi,”
ho rialo Morena.
21Lentsoe le llang
le utloahetse holim'a maralla,
e le lithapelo tsa bana ba Iseraele,
hoba ba khelohile litsela tsa bona,
ba lebetse Morena,
Molimo oa bona.
22“Khutlang lōna bana ba bakoenehi!
Bokoenehi boo ba lōna
ke tla bo phekola!”
“Bona, ke rōna bana,
re tla ho uena,
hobane u Morena, Molimo oa rōna.
23Ho rapella holim'a maralla
ha ho thuse letho,
lereberebe le holim'a lithaba
ha le thuse letho;
ruri Morena, Molimo oa rōna,
ke eena Mopholosi oa Baiseraele.
24Ho tloha bocheng ba rōna
bo-Baale ba jele,
ba eja tse sebelitsoeng
ka thata ke bo-ntat'a rōna:
Mehlape ea likhutšoane
le mehlape ea likhomo,
bara ba bona le barali ba bona.
25A re paqameng fatše
ka lihlong tsa rōna,
sekhobo sa rōna se re aparele,
hoba re sitetsoe Morena,
Molimo oa rōna,
rōna 'moho le bo-ntat'a rōna;
ho tloha bocheng ba rōna
ho fihlela kajeno,
ha rea ka ra mamela Morena,
Molimo oa rōna.”
