Molaetsa o eang ho Sedekiea
1Nakong eo Nebukadenesare, khosi ea Babilona, a neng a futuhetse Jerusalema le metse eohle e e pota-potileng, a e-na le mabōtho 'ohle a hae le mebuso eohle ea lefatše e neng e le tlas'a puso ea hae, le lichaba tsohle, lentsoe le tsoang ho Morena le ile la fihla ho Jeremia, la re:
2“Morena Molimo oa Iseraele, o bua tjena: ‘Tsamaea u e'o bua le Sedekiea, khosi ea Juda, u 'molelle, u re: Morena o bua tjena: Bona, ke tla neelana ka motse ona matsohong a khosi ea Babilona, 'me e tla o chesa ka mollo. 3Ha u ka ke ua phonyoha matsohong a eona; u tla fela u thōpuoe, u beoe matsohong a eona. Khosi eo ea Babilona u tla e bona ka mahlo a hao, u buisane le eona le talimane, ebe joale u isoa Babilona.
4“ ‘Empa uena Sedekiea, khosi ea Juda, mamela lentsoe la Morena. Morena o bua ho uena: Ha u ka ke ua bolaoa ka sabole, 5empa u tla ichoella ka khotso. Joalokaha sechaba se ne se besetse bo-ntat'ao-moholo, e leng likhosi tsa boholo-holo tse bileng teng pele ho uena, mollo oa bofifi, le uena se tla u besetsa mollo o joalo, se u llele, se re: “Oho, moren'a rōna!” Ke 'na ea buang joalo, ho rialo Morena.’ ”
6Eaba moporofeta Jeremia o bua mantsoe ana 'ohle ho Sedekiea, khosi ea Juda, a le Jerusalema. 7E ne e le ka nako eo mabōtho a khosi ea Babilona a neng a futuhetse Jerusalema le metse ea Juda e neng e setse, e leng Lakishe le Aseka, kaha har'a metse e hahelelitsoeng ea Juda, e ne e le eona feela e sa setseng.
Makhoba a etsetsoa bolotsana
8Lena ke lentsoe le ileng la fihla ho Jeremia le e-tsoa ho Morena, kamora' hoba khosi Sedekiea a etse selekane le sechaba sohle se neng se le Jerusalema, e leng selekane sa hore ho phatlalletsoe makhoba tokoloho. 9Eka khona motho ka mong a lokolle lekhoba la hae le lekhabunyane la hae, leo e leng Moheberu, e le hore ho se be le ea mong ea ka sebeletsoang ke lekhoba la Mojuda eo e leng ngoan'abo. 10Ha mahosana 'ohle le batho bohle ba neng ba entse selekane, ba utloa hore motho ka mong eka khona a lokolle lekhoba la hae le lekhabunyane la hae, hore a se hlole a ba sebeletsa, ba a lokolla. 11Empa hamorao ba koeneha, ba etsa hore makhoba le makhabunyane a neng a se a lokolotsoe, a khutle, e be makhoba le makhabunyane hape.
12Ka baka leo, lentsoe le tsoang ho Morena la fihla ho Jeremia, la re: 13“Morena Molimo oa Iseraele, o bua tjena: Ke ne ke etse selekane le bo-ntat'a lōna moholo mohla ke neng ke ba ntša naheng ea Egepeta, bokhobeng, ka re: 14‘Ha lilemo tse supileng li fetile, motho ka mong o lokela ho lokolla ngoan'abo oa Moheberu, eo a mo rekiselitsoeng. U tl'u mo lokolle ha a u sebelelitse ka lilemo tse tšeletseng,’ empa bo-ntat'a lōna moholo ha baa ka ba 'mamela, leha e le hona ho sekèha litsèbè tsa bona. 15Lōna le ile la sokoloha, la etsa ho lokileng mahlong a ka ha motho ka mong a ne a phatlalletsa mohahabo tokoloho. Hape le ne le entse selekane moo ke leng teng, kahare ho Tempele e bitsoang ka lebitso la ka. 16Empa le ile la koeneha, la silafatsa lebitso la ka, motho ka mong a khutlisetsa lekhoba la hae le lekhabunyane la hae bokhobeng boo le neng le se le lokolotsoe ho bona, hore e boele e be makhoba le makhabunyane a lōna.
17“Ka baka leo, Morena o bua tjena: Ha lea ka la 'mamela ha ke re motho ka mong a lokolle ngoan'abo le ea ahelaneng le eena, ho rialo Morena. Bonang mona he, le lōna ke le phatlalletsa tokoloho, e leng tokoloho ea ho bolaoa ka sabole, ea ho bolaoa ke lefu la seoa, le ea ho bolaoa ke sekoboto. Ke tla etsa hore mebuso eohle ea lefatše e le nyonye. 18Batho ba sentseng selekane sa ka, ba sa kang ba phetha lipallo tsa selekane seo ba neng ba se etse moo ke leng teng, ke tla ba etsisa namane eo ba neng ba e khékhéthe, ba feta pakeng tsa mekhèkhètho ea eona. 19Ba ileng ba feta pakeng tsa mekhèkhètho ea namane, ke mahosana a Juda le mahosana a Jerusalema, le matona, le baprista, le sechaba sohle sa naha ena. 20Ruri ke tla neelana ka bona matsohong a lira tsa bona, le matsohong a ba batlang ho ba bolaea. Litōpō tsa bona li tla jeoa ke matlaka le libatana tsa naha.
21“Ke tla neelana ka Sedekiea, khosi ea Juda, le mahosana a hae, matsohong a lira tsa bona le matsohong a ba batlang ho ba bolaea, e leng matsohong a bahlabani ba khosi ea Babilona ba ileng ba kokotōlōha, ba khutlela hae. 22Bonang, ho rialo Morena, ke tla ba laela, ke be ke etse hore ba khutlele motseng ona. Ba tla o futuhela, ba o hape, ba be ba o chese ka mollo. Ke tla etsa hore metse ea Juda e be lehoatata le se nang baahi.”
