Molaetsa oa Morena o eang ho Baiseraele ba Egepeta
1Lena ke lentsoe le ileng la fihla ho Jeremia malebana le Bajuda bohle ba ahileng naheng ea Egepeta, e leng ba ahileng Migedole le Tahepanehese le Nofa, naheng ea Patarose, la re: 2“Morena oa mabōtho, Molimo oa Iseraele, o bua tjena: Le bone koluoa e kholo eo ke e lihetseng holim'a Jerusalema le metse eohle ea Juda. Kajeno lea bona hore e fetohile lesupi, 'me ha ho motho ea ahileng ho eona. 3Ke ka lebaka la bokhopo boo baahi ba eona ba bo entseng, ba nkhalefisa ka ho chesetsa melimo esele mokubetso, le ho sebeletsa melimo eo, eo bona kapa lōna kapa bo-ntat'a lōna ba sa kang ba e tseba. 4Leha ho le joalo ke 'nile ka rōmela bahlanka ba ka bohle, e leng baporofeta, ka makhetlo-khetlo, ka re: ‘Oho, se etseng manyala ana ao ke a hloileng!’ 5Empa ha baa ka ba mamela, leha e le ho sekèha litsèbè tsa bona, hore ba furalle bokhopo boo ba bona, ba ho chesetsa melimo esele mokubetso. 6Kahoo bohale ba ka le khalefo ea ka li ile tsa tlōkōma har'a metse ea Juda le literateng tsa Jerusalema, metse eo ea senyeha, ea fetoha masupi joalokaha ho le joalo le kajeno.
7“Ka baka leo, Morena Molimo oa mabōtho, Molimo oa Iseraele, o bua tjena: Ke ka baka la'ng ha le itlisetsa koluoa e kaale-kaale? Ke ka baka la'ng ha le ipolaela banna le basali le bana ba lōna ba masea naheng ee ea Juda, le sa itšiele le masalla feela? 8Ke'ng ha le nkhalefisa ka mesebetsi eo le e etsang ea ho chesetsa melimo esele mokubetso naheng ee ea Egepeta eo le tlileng ho jaka ho eona, hore le tle le timetsoe, le rōhakehe, le nyelisehe har'a lichaba tsohle tsa lefatše? 9Na le se le lebetse bokhopo ba bo-ntat'a lōna, le bokhopo ba likhosi tsa Juda, le bokhopo ba basali ba bona, le bokhopo ba lōna, le bokhopo ba basali ba lōna, boo ba bo entseng naheng ea Juda le literateng tsa Jerusalema? 10Ha ba e-s'o ikokobetse ho fihlela le kajeno; le ho tšaba ha ba e-s'o ka ba tšaba, leha e le ho ea ka melao ea ka le ka litaelo tsa ka, tseo ke le beetseng tsona, ka li beela le bo-ntat'a lōna.
11“Ka baka lena, Molimo oa mabōtho, Molimo oa Iseraele, o bua tjena: Tsebang hore ke rerile ho le tlisetsa koluoa le ho timetsa Juda eohle. 12Ke tla nka Bajuda ba masalla, ba ngangeletseng ho ea naheng ea Egepeta ho ea jaka teng. Kaofela ha bona ba tla timetsoa, ba shoele naheng ea Egepeta. Ba tla bolaoa ka sabole, ba bolaoe ke sekoboto; ba tla shoa bohle ho tloha ho ea eisehang ho isa ho ea hlomphehang, ba bolaoe ka sabole, ba bolaoe ke sekoboto. Ba tla nyelisoa, e be sesomo, ba rōhakehe, ba nyefoloe. 13Ba ahileng Egepeta ke tla ba otla ka sabole le ka sekoboto le ka lefu la seoa, joalokaha ke ile ka otla Jerusalema. 14Ha ho le ea mong oa masalla a Juda a ileng a ea Egepeta ho ea jaka teng ea tla phonyoha kapa a phele, hore a tle a khutlele naheng ea Juda, eo ba labalabelang ho khutlela ho eona ho ea aha ho eona. Ha ho le ea mong ea tla khutlela ho eona, haese feela mahlatsipa a ka phonyohang.”
15Joale banna bohle ba neng ba tseba hore basali ba bona ba ile ba chesetsa melimo esele mokubetso, le basali bohle ba neng ba le moo, e le letšoelehali, e leng batho bohle ba neng ba ahile Patarose, naheng ea Egepeta, ba re ho Jeremia: 16“Ha re ka ke ra mamela seo u re bolellang sona ka lebitso la Morena! 17Ruri re tla etsa lintho tsohle tseo re hlapantseng hore re tla li etsa, e leng ho chesetsa Mofumahali oa Leholimo mokubetso, ho mo etsetsa nyehelo ea lino, joalokaha rōna le bo-ntat'a rōna, le likhosi tsa rōna, le mahosana a rōna, re ile ra etsa metseng ea Juda le literateng tsa Jerusalema. Ka nako eno khora e ne e le ngata, re iketla, re sa tšoenngoe ke letho. 18Empa haesale re khaotsa ho chesetsa Mofumahali oa Leholimo mokubetso, le ho mo etsetsa nyehelo ea lino, re ile ra hloka lintho tsohle, ra bolaoa ka sabole, ra bolaoa ke sekoboto.”
19Eaba basali ba re: “Ha re ne re chesetsa Mofumahali oa Leholimo mokubetso, re mo etsetsa nyehelo ea lino, banna ba rōna ba ne ba tseba hore re etsa likuku tse nang le setšoano sa hae, re mo etsetsa le nyehelo ea lino!”
20Joale Jeremia a re ho batho bohle, banna le basali, le ho batho bohle ba neng ba ile ba mo araba: 21“Ha ke re mokubetso oo lōna le bo-ntat'a lōna, le mahosana a lōna, le sechaba sohle sa naha, oo le ileng la o chesetsa metseng ea Juda le literateng tsa Jerusalema, ke oona oo Morena a ileng a o hopola, 'me a o nahana? 22Eitse ha Morena a se a sitoa ho mamella liketso tsa lōna tse khopo le manyala ao le a entseng, eaba naha ea lōna e fetoha nanaola le sesomo, ea rohakeha, ea hloka baahi joalokaha ho le joalo kajeno. 23Kahobane le ile la chesa mokubetso, la siteloa Morena, la se ke la mamela lentsoe la hae, la se ke la ea ka molao oa hae, kapa ka litaelo tsa hae, kapa ka likeletso tsa hae, le oetsoe ke koluoa ena holimo, joalokaha le bona.”
24Jeremia a re ho sechaba, haholo-holo ho basali: “Mamelang lentsoe la Morena, lōna bohle ba morabe oa Juda, ba leng naheng ea Egepeta; 25Morena oa mabōtho, Molimo oa Iseraele, o bua tjena: Lōna le basali ba lōna le buile ka melomo ea lōna, la ba la phethahatsa ka matsoho a lōna, la re: ‘Ruri re tla phetha likano tseo re li entseng, e leng tsa ho chesetsa Mofumahali oa Leholimo mokubetso, le ho mo etsetsa nyehelo ea lino.’ Joale he, bolokang litšepiso tseo tsa lōna, le phethahatse le likano tseo tsa lōna!
26“Kahoo lōna bohle ba morabe oa Juda ba ahileng naheng ea Egepeta, utloang lentsoe la Morena: Tsebang hore ke ikanne ka lebitso la ka le leholo, ho rialo Morena, hore ha ho motho oa morabe oa Juda ea naheng eohle ea Egepeta ea sa tla hlola a bitsa lebitso la ka, a re: ‘Ka Morena Molimo ea phelang!’ 27Bonang, ho ba hlokomela ha ka, e tla ba ho ba tlisetsang bobe, e seng botle. Banna bohle ba morabe oa Juda, ba leng naheng ena ea Egepeta, ba tla bolaoa ka sabole, ba bolaoe ke sekoboto, ho fihlela ba felella bohle. 28Empa ba 'maloana, ba tlang ho phonyoha, ba tla tsoa naheng ea Egepeta, ba khutlele naheng ea Juda, 'me masalla a Juda, a ileng a ea naheng ea Egepeta ho ea jaka teng, a tla tseba hore na ha e le lentsoe la ka kapa lentsoe la bona, ke lefe leo e leng 'nete.
29“Morena o re: ‘Seo e tla ba pontšo ho lōna ke hore ke tla le otlela hona sebakeng sena, le tle le tsebe hore mantsoe a ka a ho le lihela koluoa aa phethahala.’ 30Morena o bua tjena: ‘Bonang, ke tla neelana ka Faro Hofera, khosi ea Egepeta, matsohong a lira tsa hae, le matsohong a ba batlang ho 'molaea, joalokaha ke ile ka neelana ka Sedekiea, khosi ea Juda, matsohong a Nebukadenesare, khosi ea Babilona, sera sa hae se neng se rata ho 'molaea.’ ”
