JOHANNE 10

₁“Kannete-nete, kea le bolella, ea sa keneng lesakeng la linku ka monyako, empa a tlōlela le kahosele, ke lesholu le senokoane, ₂empa ea kenang ka monyako ke molisa oa linku. ₃Molebeli oa monyako oa 'mulela, 'me linku li utloa lentsoe la molisa, o li thobisa ka mabitso, ho ea kantle. ₄Ha a ntšitse tsa hae kaofela, o li etella pele, 'me linku lia mo latela, kahobane li tseba lentsoe la hae. ₅Osele ha li ka ke tsa mo latela, empa li tla 'maleha, hobane ha li tsebe lentsoe la basele.” ₆Jesu o ile a ba bolella papiso ena, empa bona ha baa ka ba utloisisa hore na tseo a li buang ho bona ke life.

₇Joale Jesu a boela a re ho bona: “Kannete-nete, kea le bolella hore ke 'na monyako oa linku. ₈Bohle ba tlileng pele ho 'na ke masholu le linokoane, 'me linku ha lia ka tsa ba utloa. ₉Ke 'na monyako; ha motho a kena ka 'na o tla pholosoa, 'me o tla kena, a tsoe, a fumane lekhulo. ₁₀Lesholu le tlela feela ho utsoa, le ho bolaea, le ho timetsa; 'na ke tlile hore li be le bophelo, 'me li be le bophelo ka ho tlala.

₁₁“Ke 'na molisa ea molemo. Molisa ea molemo o tella linku tsa hae bophelo ba hae. ₁₂Mohlanka, eo e seng molisa le mong'a linku ka sebele, ha a bona phiri e e-tla, o tlohela linku, a balehe, 'me phiri e li tšoare, e li qhalanye; ₁₃ke hobane e le mohlanka, 'me ha a tsotelle linku.

₁₄“Ke 'na molisa ea molemo, 'me ke tseba linku tsa ka, le linku tsa ka lia ntseba; ₁₅joalokaha Ntate a ntseba, le 'na ke tseba Ntate, 'me ke tella linku tsa ka bophelo ba ka. ₁₆Ke sa na le linku tse ling, tseo e seng tsa lesaka lena. Le tsona eka khona ke li tlise; li tla utloa lentsoe la ka, 'me mohlape o tla ba mong, le molisa a be mong. ₁₇Ke ka lebaka lena Ntate a nthatang, hobane ke tela bophelo ba ka, hore ke tle ke boele ke bo fumane. ₁₈Ha ho ea nkamohang bona, empa ke bo tela ka ho rata. Ke na le tokelo ea ho bo tela, ke na le tokelo ea ho bo fumana hape; taelo ena ke e amohetse ho Ntate.”

₁₉Karohano ea e-ba teng hape har'a Bajuda ka baka la mantsoe ana. ₂₀Ba bangata ba re: “O na le modemona, oa hlanya; ke'ng ha le mo mamela?”

₂₁Ba bang ba re: “Mantsoe ana hase a motho ea nang le modemona; na modemona o ka tutubolla lifofu mahlo?”

₂₂Joale mokete oa ho khethela Molimo Tempele, oa e-ba teng Jerusalema. E ne e le mariha, ₂₃'me Jesu o ne a tsamaea ka Tempeleng mathuleng a Solomone. ₂₄Bajuda ba mo teela hare, 'me ba re ho eena: “U tla re lika-likisa ho fihlela neneng? Ha u le Kreste, re bolelle phatlalatsa.”

₂₅Jesu a ba araba, a re: “Ke le boleletse, 'me ha le lumele; mesebetsi eo ke e etsang ka lebitso la Ntate, ke eona e mpakang, ₂₆empa ha le lumele, hobane ha le ba mohlape oa ka. ₂₇Linku tsa ka li utloa lentsoe la ka, kea li tseba, 'me lia ntatela. ₂₈Ke li fa bophelo bo sa feleng, 'me ha li ka ke tsa timela le ka mohla. Ha ho ea tla li hloibila matsohong a ka. ₂₉Ntate ea 'neileng tsona o moholo ho bohle, 'me ha ho ea ka tsebang ho li hloibila matsohong a Ntate. ₃₀Rōna le Ntate re ntho e le 'ngoe.”

₃₁Bajuda ba boela ba thonaka majoe ho mo tlepetsa. ₃₂Jesu a re ho bona: “Ke le bontšitse mesebetsi e mengata, e molemo, e tsoang ho Ntate; le ntlepeletsa mosebetsi ofe oa eona?”

₃₃Bajuda ba araba, ba re: “Ha re u tlepeletse mosebetsi o molemo, empa re u tlepeletsa nyefolo, le kahobane ere u le motho, u iketsa Molimo.”

₃₄Jesu a araba, a re: “Na ha hoa ngoloa Molaong oa lōna, ha thoe: ‘Ke itse, le melimo?’ ₃₅Bao lentsoe la Molimo le tlileng ho bona, Molao o ba bitsa melimo, 'me Mangolo ha a ka ke a etsolloa. ₃₆Joale ho ea ka'ng ha le re: ‘Ua nyefola,’ kahobane 'na ea halalelitsoeng, 'me a rōmeloa lefatšeng ke Ntate, ke itse: ‘Ke Mora oa Molimo?’ ₃₇Haeba ke sa etse mesebetsi ea Ntate, le se ke la ntumela, ₃₈empa ha ke e etsa, leha le sa ntumele, lumelang mesebetsi, hore le hlalohanye, 'me le 'ne le tsebe hore Ntate o ka ho 'na, le 'na ke ka ho Ntate.” ₃₉Joale ba boela ba batla ho mo tšoara, empa a phonyoha matsohong a bona.

₄₀A boela a tloha a ea mose ho Jorodane, sebakeng seo Johanne a neng a kolobeletsa ho sona pele, a hlola teng. ₄₁Eaba ba bangata ba tla ho eena, ba re: “Johanne ha aa ka a etsa mohlolo leha o le mong, empa tsohle tseo Johanne a li boletseng ka monna enoa e ne e le 'nete.” ₄₂Hona moo ba bangata ba lumela ho eena.