Jesu o tšèloa ka setlolo Bethania
1Ha ho setse matsatsi a tšeletseng e e-ba Paseka, Jesu a ea Bethania, moo Lasaro, eo Jesu a neng a mo tsose bafung, a neng a le teng. 2Ba mo etsetsa lijo teng, Maretha a ba fepa, 'me Lasaro e ne e le e mong oa ba nang le eena lijong. 3Maria a nka halofo ea lethara ea setlolo sa nareda ea sebele, ea bohlokoa, a tlotsa maoto a Jesu, a mo hlakola maoto ka moriri oa hae, 'me ntlo ea tlala monko oa setlolo.
4Judase Isekariota, e mong oa barutuoa ba Jesu, ea neng a tla mo èka, a re: 5“Ke hobane'ng ha setlolo see se sa ka sa rekisoa lidenare tse makholo a mararo, tsa neoa mafutsana?” 6O ile a rialo, e seng hobane a ne a tsotella mafutsana, empa hobane e ne e le lesholu, 'me kaha a ne a tšoara mokotla oa chelete, o ne a utsoa tse kentsoeng kateng.
7Eaba Jesu o re: “Mo lese, a se bōlōkele letsatsi la kepelo ea ka, 8hobane mafutsana le na le 'ona kamehla, empa 'na le ke ke la ba le 'na kamehla.”
Morero oa ho bolaea Lasaro
9Letšoelehali la Bajuda la tseba hore o teng moo, 'me la tla, e seng ka baka la Jesu feela, empa le hore le bone Lasaro eo a mo tsositseng bafung. 10Baprista ba baholo ba rera hore le eena Lasaro a bolaoe, 11hobane ka baka la hae, Bajuda ba bangata ba ne ba ba koenehela, ba lumela ho Jesu.
Jesu o kena Jerusalema
12Ka la hosasane, letšoelehali le tlileng moketeng ha le utloa hore Jesu o tla Jerusalema, 13la nka makala a lipalema, la tsoa ho ea mo khahlanyetsa, 'me la hōoa, la re:
“Hosanna! Ho bokoe
ea tlang ka lebitso la Morena,
Khosi ea Iseraele!”
14Eare ha Jesu a fumana petsana ea tonki, a e palama, joalokaha ho ngotsoe, ho thoe:
15“Se tšabe, morali oa Sione:
bona, Khosi ea hao ea tla,
e palame petsana ea tonki.”
16Ho qaleng barutuoa ba hae ha baa ka ba utloisisa litaba tsena, empa eare ha Jesu a se a tlotlisitsoe, ba hopola hore litaba tsena li ne li ngotsoe ka eena, 'me tsena ba mo entse tsona.
17Joale letšoele le neng le e-na le eena ha a bitsa Lasaro lebitleng, a mo tsosa bafung, le ne le paka hoo. 18Ka baka leo, letšoele la mo khahlanyetsa, hobane le utloile hore o entse mohlolo ona. 19Joale Bafarisi ba buisana, ba re: “Na lea bona hore ha le thuse letho? Bonang, lefatše lohle le mo setse morao!”
Bagerike ba bang ba rata ho bona Jesu
20Ho ne ho e-na le Bagerike ba bang har'a ba nyolohang ho ea khumamela Molimo moketeng. 21Ba tla ho Filipi oa Bethesaida e Galelea, ba kōpa, ba re: “Monghali, re rata ho bona Jesu.” 22Filipi a ea bolella Andrease; Andrease le Filipi ba ea bolella Jesu.
23Jesu a ba araba, a re: “Nako e fihlile ea hore Mor'a Motho a tlotlisoe. 24Kannete-nete, kea le bolella, ha tlhaku ea koro e oelang mobung, e sa shoe, e sala e le inotši, empa ha e e-shoa, e beha litholoana tse ngata. 25Ea ratang bophelo ba hae, bo tla mo lahlehela, 'me ea hloeang bophelo ba hae lefatšeng lena, o tla bo bōlōkela bophelo bo sa feleng. 26Ha motho a ntšebeletsa, a ntatele, 'me moo ke leng teng, le mosebeletsi oa ka o tla ba hona teng; ha motho a ntšebeletsa, Ntate o tla mo hlompha.
Eka khona Mor'a Motho a phahamisoe
27“Joale moea oa ka o ferekane. Ke tla re'ng? Na ke tla re: ‘Ntate, u mpholose nakong ena?’ Empa ke ka lebaka lena ke fihletsoeng ke nako ena. 28Ntate, tlotlisa lebitso la hao!”
Eaba ho tsoa lentsoe leholimong, le re: “Ke le tlotlisitse, 'me ke sa tla le tlotlisa hape.” 29Letšoele le neng le eme moo, ha le utloa, la re ke letōlō. Ba bang ba re: “Lengeloi le buile le eena.”
30Jesu a araba, a re: “Lentsoe lena ha lea bua ka baka la ka, empa ke ka baka la lōna. 31Joale ke kahlōlo ea lefatše lena; joale 'musi oa lefatše lena o tla lahleloa kantle, 32'me 'na, ha ke se ke phahamisitsoe, ke tlohile lefatšeng, ke tla hulela batho bohle ho 'na.” 33A rialo ho supa hore na o tla shoa lefu le joang.
34Eaba letšoele lea mo araba, le re: “Re utloile Molaong hore Kreste o tla hlola ka ho sa feleng, empa uena u bolela joang ha u re eka khona Mor'a Motho a phahamisoe? Mora enoa oa Motho ke mang?”
35Jesu a re ho bona: “Leseli le sa na le lōna ka nakoana. Tsamaeang ha le sa ntse le e-na le leseli, esere mohlomong lefifi la le tšoara. Ea tsamaeang lefifing ha a tsebe moo a eang teng. 36Ha le sa ntse le e-na le leseli, lumelang ho leseli, e le hore le tle le be bana ba leseli.”
Jesu a bua litaba tsena, 'me a tloha a ipatela bona.
Ho se lumele ha Bajuda
37Le hoja a entse mehlolo e mengata hakaalo pel'a bona, ha baa ka ba lumela ho eena, 38e le hore ho phethahale lentsoe leo moporofeta Esaea a ileng a le bolela, a re:
“Morena, ke mang ea lumelang
seo re se bolelang?
Tsoho la Morena
le bonahalitsoe ho mang?”
39Ka baka leo, ba ne ba ke ke ba lumela, kahobane Esaea a ile a boela a re:
40“O foufalitse mahlo a bona,
a thatafatsa lipelo tsa bona,
hore ba se ke ba bona ka mahlo,
ba utloisisa ka pelo, ba sokoloha,
'me ka ba folisa.”
41Esaea o ile a bolela tsena hobane a ne a bone tlōtla ea Morena, 'me a bua ka eena.
42Leha ho le joalo, esita le ba bangata ba baokameli ba ile ba lumela ho eena, empa ka baka la Bafarisi, ha baa ka ba bolela, esere ba tebeloa tlung ea thapelo, 43hobane ba ne ba rata tlōtla e tsoang ho batho ho feta tlōtla e tsoang ho Molimo.
Kahlōlo ea ba sa lumeleng
44Joale Jesu a phahamisa lentsoe, a re: “Ea lumelang ho 'na ha a lumele ho 'na, empa o lumela ho ea nthōmileng, 45'me ea mponang o bona ea nthōmileng. 46'Na ke tlile lefatšeng ke le leseli, hore mang le mang ea lumelang ho 'na a se ke a ba lefifing.
47“Ha motho a utloa lipolelo tsa ka, a sa li bōlōke, ha ke mo ahlōle, hobane ha kea tlela ho ahlōla lefatše, empa ke tletse ho pholosa lefatše. 48Ea nkhanang, a sa amohele lipolelo tsa ka, o na le ea mo ahlōlang: lentsoe leo ke le buileng le tla mo ahlōla ka tsatsi la bofelo, 49hobane ha kea ka ka bua ka bonna, empa Ntate ea nthōmileng o 'neile taelo ea seo ke tla se bolela le ea seo ke tla se bua. 50Kea tseba hore taelo ea hae ke bophelo bo sa feleng. Ka baka leo, tseo ke li buang ke li bua joalokaha Ntate a mpoleletse tsona.”
