Jesu ke sefate sa 'nete sa morara
1“Ke 'na sefate sa 'nete sa morara, 'me Ntate ke molemi. 2Lekala le leng le le leng le ho 'na le sa beheng litholoana, oa le pōma, 'me le leng le le leng le behang litholoana, oa le faola, hore le tle le behe litholoana tse ngata ho feta. 3Lōna le se le hloekile ka baka la lentsoe leo ke le buileng ho lōna. 4Lulang ka ho 'na, le 'na ka ho lōna. Joalokaha lekala le ke ke la beha litholoana ka bolona ha le se sefateng sa morara, ho joalo le ho lōna ha le sa lule ka ho 'na.
5“Ke 'na sefate sa morara, lōna le makala. Ea lulang ka ho 'na, le 'na ka ho eena, o beha litholoana tse ngata, hobane ntle ho 'na le ke ke la etsa letho. 6Ha motho a sa lule ka ho 'na, o lahleloa kantle joaloka lekala, 'me a omelle. Makala aa bōkelloa, a lahleloe mollong, a che. 7Ha le lula ka ho 'na, le lipolelo tsa ka li lula ka ho lōna, kōpang seo le se batlang, 'me le tla se neoa. 8Ntate o tlotlisoa ka hona: ha le beha litholoana tse ngata, le tla ba barutuoa ba ka.
9“Joalokaha Ntate a nthatile, le 'na ke le ratile joalo; lulang leratong la ka. 10Ha le bōlōka litaelo tsa ka, le tla lula leratong la ka, joalokaha ke bōlōkile litaelo tsa Ntate, 'me ke lula leratong la hae.
11“Ke buile litaba tsena ho lōna hore thabo ea ka e be ka ho lōna, 'me thabo ea lōna e be e phethehileng. 12Ena ke taelo ea ka, hore le ratane joalokaha ke le ratile. 13Ha ho ea nang le lerato le fetang lena, la hore motho a telle metsoalle ea hae bophelo ba hae. 14Lōna le metsoalle ea ka, ha le etsa seo ke le laelang sona. 15Ha ke sa le bitsa bahlanka, hobane mohlanka ha a tsebe seo mong'a hae a se etsang, empa lōna ke le bitsitse metsoalle, hobane ke le tsebisitse tsohle tseo ke li utloileng ho Ntate. 16Hase lōna le nkhethileng, empa ke 'na ke le khethileng, 'me ke le beile hore le ee, le behe litholoana, 'me litholoana tsa lōna li lulele ruri, hore eng le eng eo le e kōpang Ntate ka lebitso la ka, a le fe eona. 17Seo ke le laelang sona, ke hore le ratane.”
Ho hlouoa ke lefatše
18“Ha lefatše le le hloea, tsebang hore le ile la ntlhoea pele ho lōna. 19Ha le ne le le ba lefatše, lefatše le ka be le ratile seo e leng sa lona, empa kahobane le se ba lefatše, ke mpa ke le khethile ho ba lefatšeng, lefatše le le hloile ke hona. 20Hopolang polelo eo ke le boleletseng eona: ‘Mohlanka ha a moholo ho mong'a hae.’ Ha ba ntlhorisitse, le lōna ba tla le hlorisa; ha ba bōlōkile lentsoe la ka, le la lōna ba tla le bōlōka. 21Empa ba tla le etsa tsena tsohle ka baka la lebitso la ka, hobane ba sa tsebe ea nthōmileng. 22Ha ke ne ke sa ka ka tla ho bua le bona, ba ka be ba se na sebe, empa joale ha ba na boitatōlo ka sebe sa bona. 23Ea ntlhoileng, o hloile Ntate. 24Ha ke ne ke sa ka ka etsa mesebetsi har'a bona, eo ho seng le ea mong ea e entseng, ba ka be ba se na sebe, empa joale ba bone, 'me ba hloile rōna le Ntate. 25Empa lentsoe le ngotsoeng Molaong oa bona, le reng: ‘Ba ntlhoile ntle ho lebaka,’ le tšoanetse ho phethahala.
26“Ha Mothusi eo ke tla mo rōmela ho lōna a tlile a e-tsoa ho Ntate, Moea oa 'nete o tsoang ho Ntate, o tla mpaka, 27'me le lōna le tla mpaka, hobane le bile le 'na ho tloha qalong.
