Pholiso letšaneng
1Kamora' tsena ha e-ba le mokete oa Bajuda, 'me Jesu a nyolohela Jerusalema. 2Moo Jerusalema, haufi le Khoro ea Linku, ho na le letšana, le bitsoang Bethestha ka Seheberu, le nang le mathule a mahlano. 3Tlas'a 'ona ho ne ho paqama bakuli ba bangata: lifofu, le liritsa, le ba shoeleng litho, ba lebeletse ho fuluhuoa ha metsi, 4hobane ka nako tse ling lengeloi la Morena le ne le ee le theohele letšaneng, le fuluhe metsi, 'me ea kenang pele kamora' ho fuluhuoa ha metsi, o ne a folisoa bohlōkōng bofe le bofe boo a ka bang le bona. 5Monna e mong o ne a le teng ea kutseng lilemo tse mashome a mararo a metso e robeli. 6Ha Jesu a 'mona a paqame moo, 'me a tseba hore e se e le nako e telele a kula, a re ho eena: “Na u rata ho fola?”
7Mokuli a mo araba, a re: “Monghali, ha ke na motho ea nkenyang letšaneng ha metsi a fuluhuoa; e ee ere ke sa ea, e mong a theohele pele ho 'na.”
8Jesu a re ho eena: “Tsoha, nka liphate tsa hao, u tsamaee.” 9Motho eo a fola hang-hang, a nka liphate tsa hae, 'me a tsamaea.
Letsatsi leo e ne e le la Sabatha. 10Ka hona Bajuda ba re ho ea folisitsoeng: “Ke Sabatha, 'me ha ho lumellehe hore u nke liphate tsa hao.”
11Empa a ba araba, a re: “Ea mpholisitseng, ke eena ea itseng ho 'na: ‘Nka liphate tsa hao, u tsamaee.’ ”
12Ba 'motsa, ba re: “Motho ea itseng ho uena: ‘Nka liphate u tsamaee,’ ke mang?”
13Empa ea folisitsoeng o ne a sa tsebe hore na ke mang, hobane Jesu o ne a tlohile, kaha ho ne ho e-na le letšoele sebakeng seo.
14Kamora' tsena Jesu a mo fumana ka Tempeleng, 'me a re ho eena: “Bona, u folile; u se ke ua hlola u etsa sebe, esere mohlomong ua hlaheloa ke ho hobe ho feta.” 15Monna eo a tloha, 'me a bolella Bajuda hore ke Jesu ea mo folisitseng.
16Ka baka leo, Bajuda ba hlorisa Jesu kahobane a entse tsena ka Sabatha. 17Empa Jesu a ba araba, a re: “Ntate o ntse a sebetsa ho fihlela joale, 'me le 'na kea sebetsa.” 18Ka baka lena, Bajuda ba eketsa ho batla ho 'molaea, e seng feela hobane a tlōla molao oa Sabatha, empa a bile a itse, Molimo ke Ntat'ae ka sebele, a iketsa ea lekanang le Molimo.
Matla a Mora
19Jesu a boela a re ho bona: “Kannete-nete, kea le bolella, Mora a ke ke a etsa letho ka boeena, haese seo a bonang Ntat'ae a se etsa, hobane eng le eng eo Ntat'ae a e etsang, le Mora a e etsa. 20Ntate o rata Mora, o 'montša tsohle tseo a li etsang, 'me o tla 'montša mesebetsi e meholo ho feta ena, hore le tle le makale. 21Joalokaha Ntate a tsosa bafu, a ba phelisa, le Mora o phelisa joalo bao a ratang ho ba phelisa. 22Ntate ha a ahlōle motho, empa o neile Mora tokelo eohle ea ho ahlōla, 23hore bohle ba hlomphe Mora joalokaha ba hlompha Ntat'ae. Ea sa hlompheng Mora ha a hlomphe Ntat'ae ea mo rōmileng.
24“Kannete-nete, kea le bolella hore ea utloang lentsoe la ka, a lumela ho ea nthōmileng, o na le bophelo bo sa feleng. Ha a ahlōloe, empa o tsoile lefung, a kena bophelong. 25Kannete-nete, kea le bolella: Nako ea tla, 'me e se e fihlile, eo ka eona bafu ba tla utloa lentsoe la Mora oa Molimo, 'me ba le utloang ba tla phela. 26Joalokaha Ntate a e-na le bophelo ka ho eena, o neile le Mora ho ba le bophelo ka ho eena. 27O mo neile matla a ho ahlōla, hobane ke Mor'a Motho.
28“Se makalleng hona, hobane nako ea tla, eo ka eona bohle ba ka mabitleng ba tla utloa lentsoe la hae, 29'me ba tla tsoa, ba entseng tse molemo ba tsohele bophelo, ba entseng tse khopo ba tsohele kahlōlo.
Lipaki tsa Jesu
30“Nke ke ka etsa letho ka bonna; ke ahlōla kamoo ke utloang kateng, 'me kahlōlo ea ka e lōkile, hobane ha ke batle ho etsa thato ea ka, empa thato ea ea nthōmileng.
31“Ha ke ipakela, bopaki ba ka hase ba 'nete; 32e mong o teng ea mpakelang, 'me ke tseba hore bopaki boo a mpakelang ka bona ke ba 'nete.
33“Le rōmetse ho Johanne, 'me o pakile 'nete; 34'na ha ke amohele bopaki ba motho, empa ke bolela tsena hore le pholosoe. 35Eena e ne e le lebone le tukang, le khanyang, 'me lōna le ile la rata ho nyakalla leseling la hae nakoana.
36“Empa 'na ke na le bopaki bo fetang ba Johanne, hobane mesebetsi eo Ntate a 'neileng eona hore ke e phethe, eona mesebetsi eo ke e etsang, ea mpakela hore Ntate o nthōmile; 37le Ntate ea nthōmileng o mpaketse. Ha le e-s'o ka le utloa lentsoe la hae, leha e le ho bona hore na o joang, 38'me lentsoe la hae ha le lule ka ho lōna, kahobane ha le lumele eo a mo rōmileng. 39Le fuputsa Mangolong, hobane le hakanya hore ka 'ona le na le bophelo bo sa feleng, athe ke 'ona a mpakang, 40empa ha le rate ho tla ho 'na hore le be le bophelo.
41“Ha ke amohele tlōtla ho batho, 42empa kea le tseba: ha le na lerato la Molimo ka ho lōna. 43Ke tlile ka lebitso la Ntate, 'me ha le nkamohele; ha e mong a ka itlela ka lebitso la hae, le tla mo amohela. 44Le ka lumela joang, lōna ba tlotlisanang, empa le sa batle tlōtla e tsoang ho Molimo ea inotši?
45“Le se ke la hopola hore ke tla le qosa ho Ntate; ea le qosang ke Moshe, eo le mo tšepileng. 46Hoja le lumetse Moshe, le ka be le ntumetse, hobane o buile ka 'na. 47Empa ha le sa lumele seo a se ngotseng, lipolelo tsa ka le tla li lumela joang?”
