JOHANNE 8

₁Jesu eena a ea Thabeng ea Mehloaare. ₂Kameso a boela a fihla ka Tempeleng. Sechaba sohle sa tla ho eena, 'me a lula, a se ruta. ₃Joale Litsebi tsa Molao le Bafarisi ba tlisa mosali ea tšoeroeng ka bofebe, ba mo emisa kapele ho bona, ₄ba re ho Jesu: “Moruti, mosali enoa o tšoeroe a ntse a feba. ₅Molaong Moshe o laetse hore ba joalo re ba tlepetse ka majoe; uena u re'ng?” ₆Ba ile ba rialo ka ho mo leka, hore ba be le seo ba ka mo qosang ka sona.

Empa Jesu a inama, a ngola fatše ka monoana. ₇Ha ba ntse ba pheelletse ho 'motsa, a inamoloha, a re ho bona: “Ea se nang sebe ho lōna, a 'metse pele ka lejoe!” ₈A inama hape, a ngola fatše.

₉Ha ba utloa, ba tsoa ka bonngoe ho qala ka ba baholo, 'me ba mo siea a le mong, mosali a ntse a le moo. ₁₀Eare ha Jesu a inamoloha, a re ho eena: “Mosali, ba kae? Ha ho ea u tsoileng?”

₁₁A re: “Ha a eo, Morena.”

Jesu a re: “Le 'na ha ke u tsoe; e-ea, 'me ho tloha joale u se ke ua hlola u etsa sebe.”

₁₂Jesu a boela a bua le bona, a re: “Ke 'na leseli la lefatše; ea ntatelang ha a ka ke a tsamaea lefifing, empa o tla ba le leseli la bophelo.”

₁₃Bafarisi ba re ho eena: “Ua ipakela; bopaki ba hao hase ba 'nete.”

₁₄Jesu a ba araba, a re: “Leha ke ipakela, bopaki ba ka ke ba 'nete, kahobane ke tseba moo ke tsoang teng le moo ke eang teng, empa lōna ha le tsebe moo ke tsoang teng, kapa moo ke eang teng. ₁₅Lōna le ahlōla ho ea ka nama, 'na ha ke ahlōle motho. ₁₆Empa leha nka ahlōla, kahlōlo ea ka ke ea 'nete, hobane ha ke 'notši, empa ke na le Ntate ea nthōmileng. ₁₇Esita le Molaong oa lōna ho ngotsoe hore bopaki ba batho ba babeli ke ba 'nete. ₁₈Ke 'na ea ipakelang, le Ntate ea nthōmileng oa mpakela.”

₁₉Joale ba re ho eena: “Ntat'ao o kae?”

Jesu a araba, a re: “Ha le ntsebe, le Ntate ha le mo tsebe; hoja le ne le ntseba, le Ntate le ka be le mo tseba.” ₂₀Lipolelo tsena o ne a li bua a le pōlōkelong ea matlotlo, a ruta ka Tempeleng, 'me ha ho ea ileng a mo tšoara, hobane nako ea hae e ne e e-s'o fihle.

₂₁A re ho bona hape: “Kea tsamaea; le tla mpatla, 'me le tla shoela sebeng sa lōna; moo ke eang teng, le ke ke la tla.”

₂₂Bajuda ba re: “Na ke hobane o tla ipolaea, ha a re: ‘Moo ke eang teng, le ke ke la tla?’ ”

₂₃A re ho bona: “Lōna le ba tlase mona, 'na ke oa holimo; lōna le ba lefatše lena, 'na ha ke oa lefatše lena. ₂₄Ke ka baka leo ke itseng ho lōna: Le tla shoela libeng tsa lōna, hobane ha le sa lumele hore e ntse e le 'na, le tla shoela libeng tsa lōna.”

₂₅Ba re ho eena: “U mang?”

Jesu a re ho bona: “Hantle ke buela'ng le lōna? ₂₆Ke na le tse ngata tseo nka li buang ka lōna le ho le ahlōla, empa ea nthōmileng ke oa 'nete, 'me tseo ke li utloileng ho eena, ke li bua lefatšeng.”

₂₇Ha baa ka ba utloisisa hore o bua le bona ka Ntate. ₂₈Jesu a re: “Ha le se le phahamisitse Mor'a Motho, ke hona le tla tseba hore e ntse e le 'na, le hore ha ke etse letho ka bonna, empa ke bua litaba tsena joalokaha Ntate a nthutile tsona. ₂₉Ea nthōmileng o na le 'na; ha a ea ntlohela ke 'notši, hobane ke etsa tse mo khahlisang kamehla.” ₃₀Ha a ntse a bua tsena, ba bangata ba lumela ho eena.

₃₁Joale Jesu a re ho Bajuda ba lumetseng ho eena: “Ha le tiisetsa lentsoeng la ka, le barutuoa ba ka kannete; ₃₂le tla tseba 'nete, 'me 'nete e tla le lōkōlla.”

₃₃Ba mo araba, ba re: “Re litlōhōlō tsa Aborahama, 'me ha re e-s'o ka re e-ba makhoba a motho le ka mohla. U bolela joang ha u re: ‘Le tla lōkōlōha’?”

₃₄Jesu a ba araba, a re: “Kannete-nete, kea le bolella hore e mong le e mong ea etsang sebe ke lekhoba la sebe. ₃₅Lekhoba ha le lule tlung kamehla; mora o lula teng kamehla. ₃₆Joale ha Mora a le lōkōlla, le tla be le lōkōlōhile ka sebele. ₃₇Kea tseba hore le litlōhōlō tsa Aborahama, empa le batla ho mpolaea, hobane lentsoe la ka ha le fumane sebaka ka ho lōna. ₃₈Ke bua seo ke se boneng ho Ntate; lōna le etsa seo le se utloileng ho ntat'a lōna.”

₃₉Ba mo araba, ba re: “Ntat'a rōna ke Aborahama.”

Jesu a re ho bona: “Hoja le bana ba Aborahama, le ka be le etsa liketso tsa Aborahama, ₄₀empa joale le batla ho mpolaea, ke le motho ea le boleletseng 'nete eo ke e utloileng ho Molimo; hona Aborahama ha a ka a ho etsa. ₄₁Lōna le etsa liketso tsa ntat'a lōna.”

Ba re ho eena: “Ha rea tsoaloa ka bohlola; re na le Ntate a le mong, e leng Molimo.”

₄₂Jesu a re ho bona: “Ha Molimo e ne e le Ntat'a lōna, le ka be le nthata, hobane ke tlile ke e-tsoa ho Molimo; ha kea tla ka bonna, empa ke eena ea nthōmileng. ₄₃Ke hobane'ng ha le sa utloisise puo ea ka? Ke kahobane le ke ke la utloa lentsoe la ka. ₄₄Le tsoa ho ntat'a lōna, Diabolosi, 'me le rata ho phetha litakatso tsa ntat'a lōna. Eena e bile 'molai ho tloha tšimolohong, 'me ha aa ka a ema 'neteng, hobane ha ho 'nete ka ho eena. Ha a bua leshano, o bua tseo e leng tsa hae, kahobane o leshano, ke raleshano. ₄₅Empa, hobane ke bolela 'nete, ha le ntumele. ₄₆Ke mang ho lōna ea ka mpeang molato oa sebe? Ha ke bolela 'nete, ke ka baka la'ng ha le sa ntumele? ₄₇Ea tsoang ho Molimo o utloa lipolelo tsa Molimo; ke ka baka lena le sa utloeng, hobane ha le tsoe ho Molimo.”

₄₈Bajuda ba mo araba, ba re: “Na ha re nepe ha re re, u Mosamaria, 'me u na le modemona?”

₄₉Jesu a araba, a re: “Ha ke na modemona, empa ke hlompha Ntate, 'me lōna lea ntlhomphōlla. ₅₀'Na ha ke ipatlele tlōtla; o teng ea e batlang, ea ahlōlang. ₅₁Kannete-nete, kea le bolella, ha motho a bōlōka lentsoe la ka, ha a ka ke a shoa le ka mohla.”

₅₂Bajuda ba re ho eena: “Joale rea tseba hore u na le modemona. Aborahama o shoele, le baporofeta ba shoele, empa u re: ‘Ha motho a bōlōka lentsoe la ka, ha a ka ke a shoa le ka mohla.’ ₅₃Na uena u moholo ho ntat'a rōna Aborahama, ea shoeleng? Le baporofeta ba shoele. U iketsa mang?”

₅₄Jesu a araba, a re: “Ha ke itlotlisa, tlōtla ea ka hase letho; ea ntlotlisang ke Ntate, eo le reng ke Molimo oa lōna, ₅₅empa ha le mo tsebe; 'na kea mo tseba. Ha nka ka re ha ke mo tsebe, ke tla ba leshano joaloka lōna, empa kea mo tseba, 'me ke bōlōka lentsoe la hae. ₅₆Aborahama, ntat'a lōna, o ile a nyakallela hore a bone letsatsi la ka, a ba a le bona, 'me a thaba.”

₅₇Bajuda ba re ho eena: “Ha u e-s'o be le lilemo tse mashome a mahlano, na u bone Aborahama na?”

₅₈Jesu a re ho bona: “Kannete-nete, kea le bolella, Aborahama a e-s'o tsoaloe, 'na e ne se ntse e le 'na.” ₅₉Eaba ba nka majoe ho 'metsa ka 'ona, empa Jesu a tsoa ka Tempeleng, a ipata.