JOBO 11

₂“Puo tse ngata-ngata tsee

ha li lokele ho arajoa?

Ebe motho oa lehèhlè

eena o nepa kamehla?

₃U re batho ba khutsisoe

ke ho bèrabèra ha hao?

Ere u soma,

u se khalemeloe ke motho?

₄U re ho Molimo:

‘Thuto ea ka e hloka koli,

le mahlong a hao ke hloekile!’

₅Eka Molimo

a ka be a lumela ho bua,

a ahlamisa molomo,

a ka a bua le uena;

₆a u senolela phiri tsa bohlale ba hae,

hore bohlale ba sebele

bo mehlahloe-mengata.

Tseba Molimo oa u leballa,

o u leballa tse ling

tsa tšito tsa hao!

₇“Na u ka tseba phiri sa Molimo

ka ho fuputsa?

Kapa ua fihlela bohlale

ba Ea Matla 'ohle?

₈U ka etsa'ng?

Bo phahametse le maholimo!

U ka tseba'ng?

Bo tebile ho feta lebitla!

₉Bolelele ba bona

bo feta le ba lefatše,

bophara ba bona

bo feta le ba leoatle!

₁₀“Ha a ka u tšoara,

a u isa chankaneng,

a u qōsa ka khōtla,

a ka hanyetsoa ke mang?

₁₁Bolotsana ba batho

o bo tseba hantle;

ha a bona bokhopo,

na a ka khutsa feela?

₁₂Empa sethoto se ke ke be sa hlalefa,

joalokaha petsan'a tonki,

e ke ke ea b'a ea tsoaloa e le motho.

₁₃“Empa ha u boela

u mo nea pelo ea hao,

u otlollela matsoho a hao ho eena;

₁₄haeba u lahla sebe

seo u se koetlileng,

u sa lumelle bobe

ho phela tlung ea hao;

₁₅ruri u tla tseba

ho talima motho u se na lihlong,

u tsitse hantle, u hloke tšabo.

₁₆Tsietsi tsa hao

u tla li lebala tsohle,

u li hopole joaloka metsi

ha a s'a fetile.

₁₇Bophelo ba hao

bo tla hlaka ho feta motšeare,

fifi la bona

le tšoane le tsatsi le chaba.

₁₈U tla ba sebete,

hobane tšepo e teng;

u qamake kahohle,

u robale u iketlile.

₁₉U tla ithoballa

ho se ea ka u tšosang,

ba bangata

ba qekise setsoalle sa hao.

₂₀Empa mahlo a ba khopo a tla eba,

ba hloke le oona monyetla

oa ho pholoha,

tšepo ea bona

e be ea ho neela moea.”