JOBO 14

₁“Motho ea tsoetsoeng ke mosali

o phela hakhutšoanyane,

bophelo ba hae

bo aparetsoe ke litsietsi;

₂o fupuha joaloka palesa

a be a pone,

o baleha joaloka seriti,

ebe o nyametse.

₃Joale u tjamela ea joalo ka eo?

U ntlisa kapele ho uena

ho nkahlōla?

₄Na ea litšila

a ka tsoala ea hloekileng?

Le khale!

Ho ke ke be ha etsahala joalo!

₅Tšiu tsa motho li baliloe,

palo ea khoeli tsa hae

e tsejoa ke uena,

u mo sehetse moeli,

a ke ke be a o tlōla.

₆Tlohela ho mo tjamela,

a fumane phomolo,

nako ea hae e b'e fete

joaloka ea mohiruoa.

₇“Esita le sefate se na le tšepo:

Ha se ka rengoa se tla hlōmela hape,

makala a sona a ke ke a ba a fela.

₈Leha motso oa sona

o ka tsofalla mobung,

kutu ea sona ea bolla lerōleng,

₉ha se utloa monko oa metsi

se tla hlōma,

se mele makala

joaloka tlama se secha.

₁₀Empa motho eena oa shoa,

a felloe ke matla,

a neele moea, ebe joale o kae?

₁₁“Joalokaha metsi a letša

a nyamela, a fela,

nōka e feta, e be e pshe,

₁₂le motho oa robala,

a roballe ruri!

Ho fihlela ha maholimo a fela,

batho ba ke ke be ba tseba

le ho phaphama,

kapa ho tsosoa

phumeng sa bona sa boroko.

₁₃“Eka u ka be u mpata

Qalong ea Bafu,

u nketsa bofihla,

khalefo ea hao e be e fete!

Eka u ka be u mpalla nako,

eo ka eona u tlang ho nkhopola!

₁₄Hoja motho oa shoe,

a boele a phele,

ke ne nka mamella tlokotsi tsa ka

ka nako tsohle,

ka emela topoloho ea ka

ea ba ea fihla.

₁₅U n'u tla mpitsa, 'na ke arabele,

u hlōlōheloe 'mōpo

oa matsoho a hao.

₁₆Empa joale mehato ea ka oa e bala,

sebe sa ka ha u khaotse ho se natsa;

₁₇tšito tsa ka

u li bitiella ka mokotleng,

sebe sa ka

sona ua se koahela.

₁₈“Joalokaha thaba e e'e helehe,

e nyamele,

le lefika le suthisoe

tulong tsa lona;

₁₉joalokaha metsi a kutlula majoe,

phororo le tsona

li baka khōhōleli mobung,

le uena tšepo ea motho

u e felisa joalo!

₂₀U mo hlōlela ruri, ebe o iketse;

u fetola fahleho sa hae,

ebe ua mo leleka.

₂₁Ha bara ba hae ba tlōtloa,

eena ha a tsebe le letho,

le teng ha ba kokobetsoa,

eena ha a bone le letho;

₂₂o utloa bohlōkō

ba 'mele oa hae feela,

le ho ngongoreha ha moea oa hae.”