Jobo a hlalosa moputso oa ba khopo
1Jobo a tsoela pele ka puo ea hae, a re:
2“Ka Molimo ea phelang,
ea nkamohileng toka,
ka Ea Matla 'ohle,
mohlōkōfatsi oa moea oa ka;
3ha feela 'na
ke sa ntsane ke phela,
ke ntse ke phefumoloha
moea oa Molimo,
4molomo oa ka
o ke ke be oa bua bokhopo,
leme la ka
le ke ke be la bolela bohata.
5Ha nka ke ka lumela hore le nepile,
ke tla be ke e'o shoa
ke ntse ke itatola.
6“Ho loka ha ka
ke boshoa-bo-tšoeroe,
ha ke ntse ke phela
tsoalo le ke ke la nkhoèbètha.
7“Lira tsa ka
li ke li tšoane le ba khopo,
bantoantši ba ke ba be
joaloka balotsana.
8Letšepa la moetsalibe ke lefe,
mohl'a Molimo
a mo amohang bophelo?
9Na Molimo a ka mamela,
a mamela sello sa hae,
ha tlokotsi e s'e mo oetse holimo?
10Na eena o tla thabela
Ea Matla 'ohle,
a ipiletse ho Molimo
ka nako tsohle?
11“Ke tla le ruta
seo matl'a Molimo a leng sona;
merero ea Ea Matla 'ohle
nke ke be ka e pata.
12Tsena tsohle
le lōna ka mahlo le li bone;
ke ka baka la'ng
ha le ntse le bua mafeela-feelane?
13“Seo Molimo
a se abetseng ea khopo,
lefa leo Ea Matla 'ohle,
a le abetseng ea sehlōhō, ke lena:
14Leha a ka ateloa ke bana,
ba tla shoa ka sabole,
tlōhōlō tsa hae
li ke ke tsa aneloa ke lijo;
15masalla a hae
a tla shoa ke lefu la seoa,
bahlolohali ba hae
ba ke ke ba mo llela.
16Leha a ka bōkella silefera
e kaa ka lehlabathe,
bongata ba aparo tsa hae
ba ba kaa ka letsopa,
17tsa etsa pōkella,
ea lokileng o tla li apara;
ba se nang molato
silefera ba e arolelane.
18O hahile ntlo e fokola
sa bolepo ba sekho,
e tšoana le lephèphè
la motšosi masimong.
19O robala a ruile
e le khetlo la ho qetela;
ere ha a phaphama
a tsohe a itlhōphere.
20Tsietsi li mo oela holimo
joaloka sekhōhōla,
fefo se mo fefola bosiu
ha ho robetsoe.
21Moea oa bochabela oa mo nka,
o ikele ka eena,
o mo pheulele hōle le lapa la hae;
22o puputlele ho eena o se na mohau,
e be lekharakhara
ha a leka ho o baleha.
23Ba mo opela liatla,
ba be ba mo je tlepane,
ba mo letsetse mololi
ha a tloha lapeng ha hae.”
