JOBO 3

₃“Tsatsi la tsoalo ea ka

le ke le timele,

le bosiu boo ka bona

ho neng ho thoe:

‘Ho emotsoe ngoan'a moshanyana!’

₄Tsatsi leo le ke le fetohe lefifi,

Molimo ea holimo a le lebale,

seli le se hlole le le chabela hape.

₅Le metsoe ke fifi la bo-nka-ntjana,

leru le aparele tsatsi leo,

fifi le fifatse seli la lona.

₆Bosiu boo bona bo fifalle ruri,

bo se balelloe le matsatsi a selemo,

bo se balelloe le matsatsi a likhoeli.

₇Ka boo bosiu ho se tsoaloe lesea,

le mehoo ea thabo e se utloahale.

₈Barōhaki ba matsatsi

ba ke ba bo rōhake,

bona ba tsebang

le ho tšoenya khanyapa.

₉Naleli li se ke tsa phatsima,

bo batle leseli, bo se le fumane,

bo se ke ba bona ha tsatsi le chaba,

₁₀hobane ha boa ka

ba koala 'mè popelo,

ha boa ka

ba nthibela ho bona masoabi.”

₁₁“Ke hobane'ng

ke sa shoelang popelong?

Ke hobane'ng

ke sa shoang ha ke tsoaloa?

₁₂Ke hobane'ng nkileng ka sikoa?

Ke hobane'ng ke antseng matsoele?

₁₃Joale nkabe ke rapame, ke khutsitse,

ke ithobaletse,

ke phomotse ka khotso,

₁₄ke phomotse le likhosi

le matona a koano,

bao mehaho ea bona e leng mabitla,

₁₅le mahosana a khabang ka khauta,

ao matlo a 'ona a tletseng silefera;

₁₆ke epetsoe joaloka sefolotsana,

joaloka lesea le e-s'o bone leseli.

₁₇Lebitleng ba khopo baa khaotsa,

ba khaotsa ho ferekanya,

ba khathetseng,

teng ba fumana phomolo.

₁₈Ba thōpiloeng

le bona ba phela ka khotso,

ha ba sa utloa

mokataki a kharumaka.

₁₉Ba hlomphehang le ba eisehang

baa lekana,

khoba le hōlōtsoe

khobeng ba mong'a lona.”

₂₀“Ba litlokotsing

ba bontšetsoa'ng leseli?

Ba tubehileng moeeng

ba neeloa'ng bophelo?

₂₁Ba labalabela lefu, ha le ba fihlele,

ba le batla

le ho feta letlotlo, patuoe.

₂₂Ba thaba ka thabo e fetisisang,

ba nyakalle ha ba kena ka lebitleng.

₂₃Ea fihlametsoeng ke tsela

o tsoaletsoe'ng,

athe Molimo

o mo raletse mathibela?

₂₄Bakeng sa ho ja

ke tleloa ke mefehelo,

melumaelo ea ka

e phutsalle sa liphororo!

₂₅Seo ke se tšabang

se nkoetse holimo,

seo ke se tšohileng

joale se mphihletse.

₂₆Ke hloka khotso,

ke hloka le boikhutso;

ke hloka phomolo,

tsietsi li nkapere!”