JONASE 2

“Mahlomoleng a ka

ka ipiletsa ho Morena,

ka ipiletsa ho eena, 'me a nkaraba.

ka kōpa thuso

ke le botebong ba Qalo ea Bafu,

'me ua utloa lentsoe la ka.

₃U ile ua nkakhela koeetseng,

ua nkakhela bolibeng ba leoatle;

ua nkakhela, 'me metsi a mpupetsa,

maqhubu a tsulubutlana holim'a ka.

₄Ka re: ‘U ntahletse hōle le uena,

empa ke tla boela ke bone,

ke bone Tempele ea hao,

Tempele e halalelang.’

₅Ke fihlile koeetseng,

metsi a nkhamme,

leoatle le mpota-potile kahohle,

bolèlè bo rarelitse hlooho ea ka.

₆Ke ne ke tebile,

ke le tlase ho lithaba,

mekoallo ea Qalo ea Bafu

e nkoalletse ruri;

empa uena Morena Molimo oa ka,

u mpholositse Qalong eo ea Bafu.

₇“Ha ke ne ke le makhatheng,

makhatheng a ho shoa,

ke ile ka u hopola, uena Morena,

thapelo ea ka ea finyella ho uena,

ka Tempeleng ea hao e halalelang.

₈“Ba khumamelang

melingoana ea bohata,

ba furalla seliba sa bona sa mohau.

₉Ha e le 'na

ke tla u nyehella ka sehlabelo,

ke ntse ke u binela ka teboho,

ke phetha le tsona likano tsa ka.

Pholoho e tsoa ho Morena!”