JOSHUA 12

₁Tsena ke likhosi tsa linaha tseo bana ba Iseraele ba ileng ba li hlōla. Ba hapa naha ea tsona e kamose oane ho Jorodane, ka bochabela, ho tloha Khohlong ea Arenone, ho ea fihla thabeng ea Heremone, le Araba eohle ka bochabela.

₂Ba hapa ea Sihone, khosi ea Baamore, e neng e ahile Heshebone, e busa ho tloha Arōoere e pel'a lebōpo la nōka ea Arenone, bohareng ba khohlo; e busa le karolo e 'ngoe ea Gileade, ho ea fihla Joboko, e leng moeli oa Baamone. ₃E busa le Araba, ho ea fihla leoatleng la Kinerete ka bochabela, le ho ea fihla leoatleng la Araba, e leng Leoatle la Letsoai; e busa le ka bochabela, tseleng e eang Bete-Jeshimote, ka boroa, tlas'a matsoapo a Pisega.

₄Ba hapa le naha ea Oge, khosi ea Bashane, e 'ngoe ea masalla a Refaime, e neng e ahile Ashetarote le Ederei. ₅E ne e busa thabeng ea Heremone, le Saleka, le naheng eohle ea Bashane, ho ea fihla moeling oa Bageshure, le Bamaaka, le karolo e 'ngoe ea Gileade, le ho ea fihla moeling oa Sihone, khosi ea Heshebone.

₆Moshe, mohlanka oa Morena, a e-na le bana ba Iseraele, ba bolaea likhosi tseo, 'me Moshe, mohlanka oa Morena, a nea ba morabe oa Rubene, le ba morabe oa Gade, le ba karolo e 'ngoe ea morabe oa Manase, naha eo, hore e be lefa la bona.

₇Tsena ke likhosi tsa naha eo, tseo Joshua, a e-na le bana ba Iseraele, a neng a li bolaee kamose oane ho Jorodane, ka bophirimela, ho tloha Baale-Gade, khohlong ea Lebanone, ho ea fihla thabeng ea Halaka, e nyolosetsang Seire. Joshua a abela merabe ea Iseraele naha ena, hore e be ea eona, ho ea ka likarolo tsa eona. ₈A e abela le naha e maralleng, le e liphuleng, le ea Araba, le e matsoapong, le e lehoatateng, le e ka boroa, le naha ea Bahete, le ea Baamore, le ea Bakanana, le ea Baperise, le ea Bahife, le ea Bajebuse. ₉Ha bolaoa khosi ea Jeriko, le khosi ea Ai e pel'a Bethele, ₁₀le khosi ea Jerusalema, le khosi ea Heborone, ₁₁le khosi ea Jaremute, le khosi ea Lakishe, ₁₂le khosi ea Egelone, le khosi ea Gesere, ₁₃le khosi ea Debiri, le khosi ea Gedere, ₁₄le khosi ea Horema, le khosi ea Arada, ₁₅le khosi ea Lebena, le khosi ea Adulame, ₁₆le khosi ea Makeda, le khosi ea Bethele, ₁₇le khosi ea Tapua, le khosi ea Hefere, ₁₈le khosi ea Afeke, le khosi ea Lasharone, ₁₉le khosi ea Madone, le khosi ea Hasore, ₂₀le khosi ea Shimerone-Merone, le khosi ea Akashafe, ₂₁le khosi ea Taanake, le khosi ea Megido, ₂₂le khosi ea Kedeshe, le khosi ea Jokoneame e Karamele, ₂₃le khosi ea Dore e maralleng a Dore, le khosi ea Koime e Gilegale, ₂₄le khosi ea Tiresa. Likhosi tsena tsohle li ne li le mashome a mararo a motso o mong.