KOLI-EA-MALLA 3

₁Ke 'na motho

ea tsebang matšoenyeho,

ke otliloe ka thupa ea Morena,

Morena a halefile.

₂O nkhōthōmelitse, a re ke tsamaee,

ke tsamaee lefifing, e seng leseling.

₃Ruri o nkotlile ka letsoho la hae,

a nkotla a bile a phetella,

a nkotla letsatsi lohle.

₄Letlalo la ka o le tlatsite libabetsi,

masapo a ka o a soahlamantse.

₅O nketselitse sakana-la-nkōpe,

a nkopela ka mahlomola

le ka litsietsi.

₆O mpeile fifing le letšo-letšo,

ke joaloka bafu ba khale-khale.

₇O ntinkelitse hoo

nke ke be ka phonyoha,

a ntlama ka mahlaahlela

a lethose a boima.

₈Leha ke bokolla, ke batla thuso,

thapelo ea ka ha a e mamele.

₉O thibetse 'mila oa ka

ka kakaoe tsa majoe,

tsela ea ka o e khopamisitse.

₁₀Morena o ntaletse joaloka bèrè,

a ntalla sa tau e le ka letsabeng.

₁₁O nkhelositse tseleng ea ka,

a ntsekolla,

a ntšiea moo ke hloka mothusi.

₁₂A hula seqha sa hae, a fula,

a nketsa sekhōpi sa metsu ea hae.

₁₃O hlabile liphieo tsa ka ka metsu,

metsu e tsoang sehlajoeng sa hae.

₁₄Chabeng sa heso

ke fetohile sesomo,

se nteōla ka lipina letsatsi lohle.

₁₅O ntlōpile tse babang sa leshokhoa,

a b'a ntlōpa le lona lengana.

₁₆O nthobile meno

ka ho ntjesa lehlohlojane,

a mpulukanya holim'a molora.

₁₇Pelo ea ka u e amohile khotso,

le boiketlo ha ke sa bo tseba.

₁₈Eaba ke re:

“Matla a ka a se a mpheletse,

tseo ke li tšepetseng Morena

li se li fetile!”

₁₉Ke hopola matšoenyeho a ka

le litsietsi tsa ka,

ho 'na ke lengana

le leshokhoa le babang!

₂₀Pelo ea ka e li hopola kamehla,

e nyahame ka sefubeng sa ka.

₂₁Tsena ke sa ntsane ke li hopola,

kahoo ke sa ntsane ke e-na le tšepo.

₂₂Ka baka la lerato la Morena,

rato le sa feleng,

ha rea ka ra ba ra timela,

mehauhelo ea hae

ha e e-s'o ka e khaotsa;

₂₃hoseng ho hong le ho hong

ea nchafala,

botšepehi ba hae

bo boholo haholo!

₂₄Ka pelong ea ka 'na ke re:

“Morena ke eena kabelo ea ka,

kahoo ke itšepetse eena feela.”

₂₅Morena o molemo

ho bohle ba mo tšepang,

o molemo ho bohle ba 'matlang.

₂₆Ho molemo

ha motho a e-ba le letšepa,

a lebella ka mamello

hore Moren'a mo pholose.

₂₇Ho molemo

ha motho a jara joko ena,

a e jara nakong ea bocha ba hae.

₂₈A lule a le mong,

a lule a khutsitse,

hobane o e jarisitsoe ke Morena.

₂₉A obamele fatše

ho hlompha Morena,

mohlomong thuso

e ka 'n'a mo hlahela.

₃₀A se k'a thibela

ea mo jabelang lerama,

a mamelle mahlapa 'ohle

a mo tlelang.

₃₁Morena ha a ke be a lahle batho,

ha a ke a ba lahlela molahlela-ruri!

₃₂Leha a tlisa masoabi,

o utloela bohlōkō,

ka baka la boholo

ba mehauhelo ea hae.

₃₃Hase hore ho hlōkōfatsa batho

oa ho thabela,

kapa hona ho ba tlisetsa masoabi.

₃₄Ho hatakela batšoaruoa ka leoto,

batšoaruoa bohle

ba teng lefatšeng;

₃₅ho hanela motho ka tokelo tsa hae,

ha motho a le kapel'a

Ea Holimo-limo;

₃₆ho sokamisa toka ka makhotleng,

na tsee tsohle Morena ha a li bone?

₃₇Ea ka bolelang ntho,

ea etsahala, ke mang,

haeba ntho eo

e sa laoloa ke Morena?

₃₈Na tse bōhlōko le tsona tse monate

ha li tsoe ho Ea Holimo-limo?

₃₉Kahoo motho

a ka belaetsoa ke life,

ha motho a otleloa libe tsa hae?

₄₀A re hlahlobeng tsela tsa rōna

re li lekōle,

ebe re boela re khutlela ho Morena.

₄₁A re phahamiseng lipelo

le matsoho a rōna,

re li phahamisetse ho Molimo,

Molimo ea maholimong, re re:

₄₂“Re sitiloe, ra ba ra koeneha,

uena Morena ha ua re tšoarela.

₄₃“U re phalalisitse u halefile haholo,

ua re bolaea u sa re hauhele.

₄₄U ikhurumelitse ka leru, u ipatile,

hore thapelo tsa rōna

li se fihle ho uena.

₄₅U re entse hore re be mahōhōli,

re be thōtōbōlō har'a balichaba.

₄₆Lira tsa rōna tsohle

li re bebenyetsa melomo,

lia re soenyetsa.

₄₇Re tšoeroe ke tšabo,

leraba le re khatile,

re fihletsoe ke tšenyeho

re fihletsoe le ke timelo.”

₄₈Mahlo a ka a phorosela likeleli,

li phorosela sa metsi a nōkana,

ka baka la ho timetsoa

ha sechaba sa heso.

₄₉Mahlo a ka

a tla keleketla likeleli,

li keleketle mocha-o-chele,

li sa khaotse,

li keleketle joalo,

mahlo a sa phomole,

₅₀ho fihlela Morena a talima fatše,

a talima a le leholimong,

'me a re bona.

₅₁Ke utloisoa bohlōkō

ke seo ke se bonang,

ka baka la basali ba motse oa heso.

₅₂Ke phalalisitsoe ke lira tsa ka

ho se lebaka,

tsa mphalalisa

sa ha ho phalalisoa nonyana.

₅₃Li nkakhetse ka mokoting

ke ntse ke phela,

molomo oa mokoti

tsa o koala ka lejoe.

₅₄Metsi a phōphōma

holim'a hlooho ea ka,

ka ba ka re:

“Joale ke khatheng la ho timela!”

₅₅Ka bitsa lebitso la hao,

uena Morena,

ka le bitsa

ke le botebong ba mokoti, tlase.

₅₆Ua utloa lentsoe la ka

ha ke ne ke re:

“Se thibe tsèbè ea hao

ha ke feheloa,

ha ke feheloa ke bile ke ipiletsa.”

₅₇Ua atamela ho 'na ha ke ipiletsa,

ua re ho 'na: “U se ke ua tšaba!”

₅₈Ha ke ne ke qōsoa

u il'a nkemela, Morena,

eaba bophelo ba ka ua bo pholosa.

₅₉U bone kamoo ke tujoang kateng,

ak'u nkahlōlele ka toka, Morena!

₆₀Boiphetetso ba bona bohle

u bo bone,

le mano 'ohle

ao ba ntherelang 'ona.

₆₁Nyefōlo tsa bona

u li utloile, Morena,

le mano 'ohle

ao ba ntherelang 'ona;

₆₂lipuo tsa bao e leng lira tsa ka,

merero eo ba therelang eona

letsatsi lohle.

₆₃Esita ba eme, esita ba lutse,

ka nako tsohle 'na ke pina ea bona!

₆₄Ba otlele liketso tsa bona, Morena,

ho ea ka mesebetsi

ea matsoho a bona.

₆₅Ak'u thatafatse lipelo tsa bona,

thōhako ea hao e ba oele holimo!

₆₆Ba hlorise,

u ba timetse khalefong ea hao,

u ba timetse, u be u ba felise,

u ba felise tlas'a maholimo a hao.