Linyehelo tsa secheso
1Morena a bitsa Moshe a le ka Tenteng ea Morena, a re:
2“Bua le bana ba Iseraele, u re ho bona: ‘Ha e mong oa lōna a tlisetsa Morena nyehelo ea phoofolo, e be e tsoang mohlapeng oa hae oa likhomo, kapa oa liku.
3“ ‘Haeba nyehelo ea hae ea secheso e le khomo e tsoang mohlapeng oa hae hore e be secheso, e be e tona, e se nang sepha. A e tlise monyakong oa Tente ea Morena, e le hore a tle a amohelehe ho Morena. 4A bee letsoho la hae holim'a hlooho ea phoofolo ea sehlabelo sa secheso, 'me e tla ananeloa e le sehlabelo se tlosang libe tsa hae. 5Pohoana ena a e hlabele kapele ho Morena. Baprista, e leng bara ba Arone, ba bee mali kapele ho Morena, ba nt'o fōka mahlakore kaofela a mane a aletare e pel'a monyako oa Tente ka mali ao. 6A bue phoofolo ena ea secheso, a e tšelè; 7baprista, e leng bara ba Arone, ba bee mashala a tukang holim'a aletare, ba nt'o bea patsi holim'a 'ona. 8Ba bee litho tsa phoofolo eo, le hlooho, le mohlèhlo, holim'a patsi e tukang, mollong o holim'a aletare. 9Empa likahare tsa eona le litlhako tsa eona a li hlatsoe ka metsi; moprista a chesetse sehlabelo sohle aletareng, e be sehlabelo sa secheso, se monko o monate, se amohelehang ho Morena.
10“ ‘Haeba nyehelo ea hae ea secheso e le e tsoang mohlapeng oa linku kapa oa lipoli, hore e be secheso, e be e tona, e se nang sepha. 11A e hlabele kapele ho Morena e le ka lehlakoreng la aletare le ka leboea. Baprista, e leng bara ba Arone, ba fōke mahlakore 'ohle a mane a aletare ka mali a eona. 12Motho eo a e tšelè, moprista a bee litho tsa phoofolo eo, le hlooho, le mohlèhlo, holim'a patsi e tukang, mollong o holim'a aletare. 13Empa likahare tsa eona le litlhakoana tsa eona a li hlatsoe ka metsi; moprista a chesetse sehlabelo sohle holim'a aletare, e be sehlabelo sa secheso, se monko o monate, se amohelehang ho Morena.
14“ ‘Haeba nyehelo ea hae ea secheso eo a nyehellang Morena ka eona, e le nonyana, e be leebana-khoroana kapa lelinyane la leeba. 15Moprista o tla le tlisa aletareng, a le sothe molala, a chesetse hlooho ea lona holim'a aletare. Mali a lona a lutlisetsoe lehlakoreng la aletare. 16A le hlōthe masiba, a ntše kila, tsena a li lahlele ka lehlakoreng la aletare le ka bochabela, moo ho qhalloang molora teng. 17A tšoare mapheo a lona, a le rale, feela a sa le khekhethe; ebe moprista o le chesetsa holim'a aletare, holim'a patsi e tukang, e be sehlabelo sa secheso, se monko o monate, se amohelehang ho Morena.
