MEETLO 26

₁“ ‘Le se ke la iketsetsa melimo ea bohata, le litšoantšo tse betliloeng, kapa la itlhomela lifika tseo le li khumamelang; le se ke la haha litšoantšo tsa majoe naheng ea lōna, ho li khumamela, hobane ke 'na Morena Molimo oa lōna.

₂“ ‘Le tla bōlōka Lisabatha tsa ka, 'me le hlomphe Sehalalelo sa ka. Ke 'na Morena.

₃“ ‘Ha le tsamaea ho ea ka litaelo tsa ka, le bōlōka melao ea ka, le e phetha, ₄ke tla le nesetsa pula ka nako ea eona, 'me masimo a tla ba le chai, le lifate tsa naha li behe litholoana tsa tsona. ₅Nako ea lōna ea ho pōla e tla be e fihleloe ke nako ea ho kotula morara; le nako ea ho kotula morara e be e fihleloe ke ea ho lema. Le tla ja lijo tsa lōna, le khore, le phele naheng ea lōna ka boiketlo.

₆“ ‘Ke tla le nea khotso lefatšeng, 'me le tla ithoballa, ho se letho le le tšoenyang. Libatana tse harolang ke tla li felisa lefatšeng, le ba loanang ka sabole ba ke ke ba hlasela naha ea lōna. ₇Le tla lelekisa lira tsa lōna, 'me le tla li bolaea ka sabole. ₈Ba bahlano ba lōna ba tla lelekisa ba lekholo, ba lekholo ba lōna ba lelekise ba kete li leshome, 'me le bolaee lira tsa lōna ka sabole.

₉“ ‘Ke tla le hlompha, ke le atise, ke le ngatafatse, ke be ke tiise selekane sa ka le lōna. ₁₀Le tla ja thōkō eo le tla e tlohela ha kotulo e ncha e fihla. ₁₁Ke tla hloma Tente ea ka kahar'a lōna, 'me lōna nke ke ka le hloea. ₁₂Ke tla phela kahar'a lōna, ke be Molimo oa lōna, lōna le be sechaba sa ka. ₁₃Ke 'na Morena Molimo oa lōna, ea le ntšitseng naheng ea Egepeta, e le hore le se ke la ba makhoba a bona. Ke felisitse matla a neng a le hateletse, ka etsa hore le tsamaee ka bolokolohi.

₁₄“ ‘Empa haeba le ke ke la 'mamela, la se ke la bōlōka melao ena eohle; ₁₅haeba le furalla litaelo tsa ka, le nyelisa likahlolo tsa ka, le sa bōlōke melao ea ka eohle, le senya selekane sa ka; ₁₆le 'na ke tla etsa joalo ho lōna, ke le hlorise ka lefu la lefuba, le la feberu le foufatsang, le le felisang. Le tla lemela ntat'a-selala, hobane lira tsa lōna li tla ja lijalo tsa lōna. ₁₇Ke tla le halefela, 'me le tla bolaeloa moo lira tsa lōna li le bonang. Ba le hloileng ba tla le busa, 'me le tla baleha ho se ea le lelekisang.

₁₈“ ‘Haeba, le ka lebaka la lintho tsena, le ntse le sa 'mamele, ke tla le otlela libe tsa lōna, 'me ke menahanye kotlo ea lōna hasupa. ₁₉Ke tla felisa matla ao le ikhōhōmōsang ka oona, leholimo le ke ke la le nesetsa pula, 'me lefatše la lōna le tla omella joaloka tšepe. ₂₀Le tla sebeletsa lelea, hobane masimo a lōna a ke ke a beha letho, le lifate tsa naha ha li na ho beha litholoana.

₂₁“ ‘Haeba le ntoantša, le hana ho 'mamela, ke tla le tlisetsa lioa tse ngata, tse menahaneng hasupa, ka baka la libe tsa lōna. ₂₂Ke tla le rōmela libatana tse hlaha, tse tla harola bana ba lōna, li felise liphoofolo tsa lōna, li fokotse palo ea lōna, 'me litsela tsa lōna li mele mohloa.

₂₃“ ‘Haeba, le ka lebaka la lintho tsena, le ntse le sa ikokobeletse 'na, empa le ntse le ntoantša, ₂₄le 'na ke tla le loantša. Ke tla le otlela libe tsa lōna, 'me ke menahanye kotlo ea lōna hasupa. ₂₅Ke tla le bolaea ka sabole, ho phetetsa selekane sa ka hobane le se sentse. Leha le ka la phuthehela metseng ea lōna, ke tla le rōmela lefu la seoa, 'me ke le neele lira tsa lōna. ₂₆Ke tla le amoha lijo tsa lōna, 'me le tla apeheloa bohobe ka sebōping se le seng ke basali ba leshome. Ba tla le methela bohobe; le tla ja, empa le ke ke la khora.

₂₇“ ‘Haeba le ka lebaka la lintho tsena, le ntse le sa 'mamele, le ntse le ntoantša, ₂₈ke tla le loantša ke le halefetse, ke le otlele libe tsa lōna, 'me ke menahanye kotlo ea lōna hasupa. ₂₉Le tla ja nama ea bara le barali ba lōna. ₃₀Ke tla senya libaka tsa lōna tsa borapeli tse maralleng, ke heletse lialetare tsa lōna tsa ho chesetsa mokubetso, ke akhele litōpō tsa lōna holim'a litōpō tsa melimo ea lōna, 'me ke le nyonye. ₃₁Ke tla fetola metse ea lōna masupi, ke falatse libaka tsa lōna tsa borapeli, ke se ke ka amohela monko o monate oa licheso tsa lōna. ₃₂Naha ea lōna e tla fetoha nanaola, 'me lira tsa lōna tse ahileng moo li tla e makalla. ₃₃Ke tla le qhalanyetsa har'a lichaba, ke le bolaee ka sabole, naha ea lōna e fetohe nanaola, le metse ea lōna e fetohe masupi.

₃₄“ ‘Joale naha e tla thabela lilemo tsa phomolo ea eona, ka matsatsi 'ohle ao e ntseng e se na baahi ka 'ona, ha lōna le le naheng ea lira tsa lōna. Joale naha e tla phomola, e thabele phomolo ea eona. ₃₅Ka matsatsi 'ohle ao e ntseng e se na baahi ka 'ona, naha e tla phomola, e fumane phomolo eo e neng e e hloka ha le ne le ahile ho eona.

₃₆“ ‘Ha e le masalla a lōna, ke tla a etsa makoala naheng ea lira tsa 'ona. A tla tšoha lifotle, a phaphathehe joalokaha eka a baleha sabole, le hoja ho se ea a lelekisang. ₃₇A tla hatana holimo joalokaha eka a baleha sabole, le hoja ho se ea a lelekisang, 'me a tla hloka matla a ho loantša lira tsa 'ona. ₃₈Le tla shoella har'a balichaba, 'me naha ea lira tsa lōna e tla ba mabitla a lōna. ₃₉Batho ba masalla a lōna ba tla shoella bokhopong ba bona, le makhopong a bo-ntat'a bona, ba ntse ba le naheng ea lira tsa bona, ba tla shoa le makhopo ao.

₄₀“ ‘Batho bao ba masalla ba tla ipolela makhopo a bona, le makhopo, a bo-ntat'a bona, le litšito tsa bona tseo ba ntšitetsoeng ka tsona; le hore ba ile ba ntoantša. ₄₁Le 'na he, ke ile ka ba loantša, ka ba tlisa naheng ea lira tsa bona. Empa haeba lipelo tsa bona tse thata-thata li ka ikokobetsa, 'me ba lumela ho otleloa makhopo a bona, ₄₂le 'na he, ke tla hopola selekane sa ka le Jakobo, le selekane sa ka le Isaka; le selekane sa ka le Aborahama ke tla se hopola, 'me le naha ke tla e hopola. ₄₃Ba tla furalla naha, 'me e tla thabela lilemo tsa phomolo ea eona, ha e ntse e se na baahi. Ba tla lumela ho otleloa makhopo a bona, hobane ba ile ba furalla litaelo tsa ka, 'me ba hloea melao ea ka. ₄₄Empa leha ho le joalo, ha ba le naheng ea lira tsa bona ha ke na ho ba lahla; ha ke na ho ba hloea hoo nka ba timetsang ho hang, ka ba ka senya selekane sa ka le bona, hobane ke 'na Morena Molimo oa bona. ₄₅Empa ka baka la bona, ke tla hopola selekane sa baholo-holo ba bona, bao ke ileng ka ba ntša naheng ea Egepeta, moo lichaba li ntseng li bona, hore ke tle ke be Molimo oa bona. Ke 'na Morena.’ ”

₄₆Tsena ke litaelo, le likahlolo, le melao eo Molimo a neng a e etse pakeng tsa hae le bana ba Iseraele ka Moshe, a le thabeng ea Sinai.