LUKA 12

₁Lekhatheng leo, ha letšoele la batho ba likete-kete le bōkane, hoo ba neng ba hatellana, Jesu a qala pele ka ho re ho barutuoa ba hae: “Hlokomelang tomōso ea Bafarisi, e leng boikaketsi. ₂Ha ho letho le koahetsoeng le sa tl'o koaholloa, le le patehileng le sa tl'o tsejoa. ₃Ka baka leo, tsohle tseo le li buileng lefifing li tla utloahala leseling, le tseo le li nyenyelelitseng motho tsebeng likamoreng tse kahare, li tla phatlalatsoa lihlōhlōlōng tsa matlo.

₄“Kea le bolella, metsoalle ea ka, le se ke la tšaba ba bolaeang 'mele, empa kamora' moo ba se na letho leo ba ka le etsang hape. ₅Empa ke tla le lemōsa eo le ka mo tšabang: Tšabang ea nang le matla a ho lahlela liheleng, ha a se a bolaile! E, kea le bolella, mo tšabeng! ₆Ana lirobele tse hlano ha li rekisoe lisente tse peli na? Athe Molimo ha a lebale le se seng sa tsona. ₇Esita le liqōba tsa moriri oa hlooho tsa lōna li baliloe kaofela. Le se ke la tšaba! Le ba bohlokoa ho feta lirobele tse ngata.

₈“Hape kea le bolella hore mang le mang ea mpakang pel'a batho, le Mor'a Motho o tla mo paka pel'a mangeloi a Molimo, ₉empa ea ntatōlang pel'a batho o tla latōloa pel'a mangeloi a Molimo. ₁₀Mang le mang ea tla bua lentsoe le hanyetsang Mor'a Motho o tla tšoareloa, empa ea nyefolang Moea o Halalelang a ke ke a tšoareloa.

₁₁“Ha ba le hulela pel'a matlo a thapelo, le pel'a baahlōli, le babusi, le se ke la itšoenya ka hore na le tla bua joang kapa eng, kapa le re'ng, ₁₂hobane Moea o Halalelang o tla le ruta ka eona nako eo seo eka khonang le se bue.”

₁₃E mong oa letšoele a re ho eena: “Moruti, ak'u re ho ngoan'eso a arolelane lefa le 'na!”

₁₄Jesu a re ho eena: “Monn'a heso, ea mpeileng moahlōli kapa moaroleli ao lōna ke mang?” ₁₅A re ho bona: “Hlokomelang, le pheme meharo eohle, hobane bophelo ba motho ha bo tsoe bongateng ba maruo ao a nang le 'ona.”

₁₆Joale a ba bolella setšoantšo, a re: “Tšimo ea morui e mong e ne e behile haholo. ₁₇A nahana ka pelong ea hae, a re: ‘Ke tla etsa'ng, ha e le moo ke se na moo nka bōkellelang lijo tsa ka teng?’

₁₈“Eaba o re: ‘Ke tla etsa hona: ke tla qhaqholla lisiu tsa ka, ke etse tse li fetang ka boholo, ke bōkelle teng koro eohle le lijo tsa ka, ₁₉'me ke tla re ka moeeng oa ka: Ke na le lijo tse ngata, tse bokeletsoeng ka lilemo tse ngata; a nke ke phomole, ke je, ke noe, ke keteke!’

₂₀“Empa Molimo a re ho eena: ‘Leoatla tōoe, ka bosiu bona u tla amohuoa bophelo ba hao; joale tseo u li lokisitseng e tla ba tsa mang?’

₂₁“O joalo ea ipōkellelang matlotlo, empa e se morui mahlong a Molimo.”

₂₂A re ho barutuoa: “Ka baka leo, kea le bolella, le se ke la itšoenya ka bophelo ba lōna, hore na le tla ja'ng, leha e le ka 'mele ea lōna, hore na le tla apara'ng, ₂₃hobane bophelo bo feta lijo, le 'mele o feta liaparo. ₂₄Lemohang makhoaba: ha a jale, ha a kotule, ha a na ntlo ea pōlōkelo, leha e le sesiu, empa Molimo oa a fepa. Lōna le feta linonyana hakaakang! ₂₅Ke mang ho lōna eo ka ho itšoenya a ka tsebang ho lelefatsa bophelo ba hae leha e le ka motsotsoana? ₂₆Ha ho le joalo, ha le sitoa ho etsa le ho honyenyane, le itšoenyetsa'ng ka tse ling na?

₂₇“Ithuteng ka likhahla hore na li hōla joang: ha li ohle, ha li lōhe, empa kea le bolella, esita le Solomone tlōtleng eohle ea hae ha aa ka a apara joaloka e 'ngoe ea tsona. ₂₈Joale ha Molimo a apesa joalo joang bo naheng, bo leng teng kajeno, 'me kamoso bo lahleloe sebōping, na a ke ke a le apesa ho feta? Tumelo ea lōna e fokola hakaakang! ₂₉Lōna le se ke la batla seo le ka se jang, le seo le ka se noang, 'me le se ke la belaela, ₃₀hobane tseo tsohle li labalabeloa ke bahedene ba lefatše, empa Ntat'a lōna o tseba hore lea li hloka. ₃₁Le mpe le batle 'Muso oa hae, 'me tsena le tla li ekeletsoa.

₃₂“Se tšabeng, mohlatsoana, hobane Ntat'a lōna o khahliloe ke ho le nea 'Muso. ₃₃Rekisang maruo a lōna, 'me le thuse mafutsana; iketsetseng mekotlana e sa tsofaleng, letlotlo le sa feleng, maholimong, moo ho sa atameleng lesholu, leha e le tšoèlè ho senya, ₃₄hobane moo letlotlo la lōna le leng teng, le pelo tsa lōna li tla ba hona teng.

₃₅“Matheka a lōna a tlangoe, le mabone a lōna a tuke. ₃₆Le be joaloka batho ba lebeletseng hore na mong'a bona o tla khutla neng moketeng oa lenyalo, e tle ere ha a fihla, a kokota, ba 'mulele kapele-pele. ₃₇Ho lehlohonolo bahlanka bao etlare ha mong'a bona a fihla, a ba fumane ba falimehile. Ruri kea le bolella, ke re: O tla itlama letheka, a ba fepe, a atamele, 'me a ba sebeletse. ₃₈Leha a ka fihla ka seroko, kapa ka lialla, 'me a fumana ba falimehile, ba lehlohonolo bahlanka bao! ₃₉Empa tsebang hona: Ha mong'a ntlo a ne a tsebile nako eo lesholu le tla tla ka eona, o ne a ke ke a lumela hore ntlo ea hae e thuuoe. ₄₀Le lōna le itokise, kahobane Mor'a Motho o tla tla ka nako eo le sa e lebellang.”

₄₁Joale Petrose a re: “Morena, na setšoantšong see u bua ka rōna, kapa u bua ka bohle?”

₄₂Morena a re: “Ke ofe mookameli ea tšepahalang, ea bohlale, eo mong'a hae a tla 'mea holim'a basebeletsi ba hae ho ba fa seabo sa lijo ka nako e lokelang? ₄₃Ho lehlohonolo mohlanka eo etlare ha mong'a hae a fihla, a mo fumane a etsa joalo. ₄₄Kannete kea le bolella hore o tla mo etsa molisa oa maruo 'ohle a hae. ₄₅Empa ha mohlanka eo a re ka pelong ea hae: ‘Mong'a ka o lieha ho fihla,’ ebe o qala ho otla bahlanka le makhabunyane, le ho ja, le ho noa, le ho tahoa, ₄₆mong'a mohlanka eo o tla fihla ka letsatsi leo mohlanka a sa le lebellang, le ka nako eo a sa e tsebeng, 'me o tla mo khabelaka, a mo fe kabelo ea hae le ba sa lumeleng.

₄₇“Empa mohlanka eo ea tsebileng thato ea mong'a hae, eaba ha a lokise leha e le ho etsa ho ea ka thato eo, o tla shapuoa haholo; ₄₈athe ha e le ea ileng a etsa tse lokeloang ke kotlo a sa ka a tseba thato ea mong'a hae, o tla shapuoa hanyenyane. Mang le mang ea neiloeng haholo, ho tla batloa tse ngata ho eena, 'me ea tšepetsoeng tse ngata o tla botsoa ho feta.”

₄₉“Ke tlile ho akhela mollo lefatšeng, 'me ke lakatsa hakaakang hore ebe o se o hotetse! ₅₀Empa ke na le kolobetso eo ke lokelang ho kolobetsoa ka eona, 'me ke tla tšoenyeha hakaakang ho fihlela ha e phethehile! ₅₁Na le hakanya hore ke tlile ho fana ka khotso lefatšeng? Che, kea le bolella, ke tlisitse karohano. ₅₂Ho tloha joale ba bahlano ba ka tlung e le 'ngoe ba tla arohana, ba bararo ba loantšane le ba babeli, ba babeli le ba bararo.

₅₄Joale a bolella le matšoele, a re: “Ha le bona leru le nyoloha bophirimela, hang-hang le re: ‘Kiriatšoana ke eo,’ 'me ho be joalo. ₅₅Ha ho foka moea oa boroa, le ee le re: ‘Ho tla chesa,’ 'me ho be joalo. ₅₆Baikaketsi ting! Le tseba ho hlalohanya sebōpeho sa lefatše le sa leholimo, 'me ho tla joang hore le se tsebe ho hlalohanya nako ee?

₅₇“Ke'ng ha le sa ikahlōlele hore na ho tšoanelang ke hofe? ₅₈Ha u e-ea le ea u tsekisang ho moahlōli, etsa ka matla ho utloana le eena le sa ntse le le tseleng, esere mohlomong a u hulela kapel'a moahlōli, moahlōli a u neela lepolesa, lepolesa la u kharameletsa chankaneng. ₅₉Kea u bolella, ha u ka ke ua tsoa teng ho fihlela ha u lefile le cheletana ea ho qetela.”