LUKA 16

₁Jesu a boela a re ho barutuoa: “Ho ne ho e-na le morui ea nang le mookameli oa ntlo, 'me eo a qosoa ho eena, ha thoe o hafa maruo a mong'a hae. ₂A 'mitsa, a re ho eena: ‘Ke utloa life ka uena? Neelana ka tsa bookameli ba hao, hobane ha u ka ke ua hlola u e-ba mookameli.’

₃“Joale mookameli a re ka ho eena: ‘Ke tla etsa'ng, ha e le moo mong'a ka a nkamoha bookameli? Ha ke na matla a ho sebetsa ka thata, le teng ke lihlong ho kōpa. ₄Ke tseba seo ke tla se etsa, hore batho ba tle ba nkamohele ha bona ha ke se ke ntšitsoe bookameling.’

₅“A bitsa ba nang le molato ho mong'a hae ka bomong, a re ho oa pele: ‘U na le molato o mokae ho mong'a ka?’

₆“Eo a re: ‘Ke litekanyo tse lekholo tsa ole.’

“A re ho eena: ‘Nka lengolo la hao la molato, u ngole kapele-pele mashome a mahlano.’

₇“A ntan'o re ho e mong: ‘Uena molato oa hao o mokae?’

“Eo a re: ‘Ke litekanyo tse lekholo tsa koro.’

“A re ho eena: ‘Nka lengolo la hao la molato, u ngole mashome a robeli.’

₈“Mong'a hae a rorisa mookameli eo ea sa tšepahaleng, kaha a sebelitse ka masene, hobane bana ba lefatše, molōkong oa bona, ba masene ho feta bana ba leseli.

₉“'Na kea le bolella: Iketsetseng metsoalle ka leruo le sa lokang, hore e tle ere ha le fela, ba le amohele meahong e sa feleng. ₁₀Ea tšepahalang tabeng e nyenyane o tšepahala le ho e kholo, 'me ea sa tšepahaleng tabeng e nyenyane ha a tšepahale le ho e kholo. ₁₁Ha e le moo le sa ka la tšepahala leruong le sa lokang, ke mang ea tla le tšepela la sebele? ₁₂Ha le bile le sa ka la tšepahala ho seo e leng sa e mong, ke mang ea tla le nea seo e leng sa lōna?

₁₃“Ha ho mohlanka ea ka tsebang ho sebeletsa marena a mabeli, hobane o tla hloea e mong, a rate e mong, kapa o tla khomarela e mong, a nyelise e mong. Le ke ke la sebeletsa Molimo le Leruo.”

₁₄Joale Bafarisi, ba neng ba rata chelete, ba utloa tseo tsohle, 'me ba mo soma. ₁₅Jesu a re ho bona: “Lōna le iketsa ba lokileng mahlong a batho, empa Molimo o tseba lipelo tsa lōna, hobane ho tlōtlehang mahlong a batho ke manyala ho Molimo.

₁₆“Ho bile le Molao le Baporofeta ho fihlela ho Johanne; ho tloha mohlang oo molaetsa o molemo oa 'Muso oa Molimo oa boleloa, 'me e mong le e mong o o kena ka likhōka. ₁₇Ho bonolo hore leholimo le lefatše li fele, ho e-na le hore letšoaonyana leha le ka ba leng la Molao le hloke matla.

₁₈“E mong le e mong ea hlalang mosali oa hae, a nyala e mong, oa feba, 'me ea nyalang mosali ea hlaliloeng ke monna e mong, oa feba.

₁₉“Ho ne ho e-na le monna e mong oa morui, ea neng a apara liaparo tse perese, tse ntlehali, a ithabisa ka ho etsa mekete ka tsatsi le leng le le leng. ₂₀Mofutsana e mong ea bitsoang Lasaro o ne a beiloe mathuleng a ntlo ea morui eo, a tletse liso. ₂₁O ne a lakatsa ho iphepa ka tse oang tafoleng ea morui. Le lintja li ne li e-tla li nyeka liso tsa hae.

₂₂“Joale ha etsahala hore mofutsana a shoe, 'me mangeloi a mo nkele sefubeng sa Aborahama. Le morui a shoa, 'me a patoa. ₂₃Ha a phahamisa mahlo a le litlhōkōfatsong, Qalong ea Bafu, a bona Aborahama a le hōle, Lasaro a le sefubeng sa hae. ₂₄Eena a hōoa, a re: ‘Ntate Aborahama, ak'u nkutloele bohlōkō! Rōma Lasaro, hore a qopetse ntlha ea monoana oa hae metsing, a pholise leleme la ka, hobane mollo ona o chesa habohlōkō!’

₂₅“Empa Aborahama a re: ‘Ngoan'a ka, hopola hore tse molemo tsa hao u li amohetse bophelong ba hao; ka mokhoa o joalo Lasaro o amohetse tse mpe, empa joale o tšelisoa mona, ha uena u hlōkōfatsoa. ₂₆Ntle ho tsena tsohle, khohlo e kholo e teng pakeng tsa rōna le lōna, e le hore ba ratang ho tloha mona ba tšelela ho lōna ba sitoe, leha e le ba tlohang moo ba tšelela ho rōna.’

₂₇“Empa a re: ‘Ha ho le joalo kea u kōpa, ntate, hore u mo rōme tlung ea ntate, ₂₈hobane ke na le bana beso ba bahlano, a tle a ba laee, esere le bona ba tla sebakeng sena sa tlhōkōfatso.’

₂₉“Empa Aborahama a re: ‘Ba na le Moshe le Baporofeta; a ba utloe bona.’

₃₀“A mpa a re: ‘Oee, ntate Aborahama, ha e mong ea tsoang bafung a ka ea ho bona, ba tla baka.’

₃₁“Aborahama a re ho eena: ‘Ha ba sa utloe Moshe le Baporofeta, ha ba ka ke ba kholoa leha e mong a ka tsoha bafung.’ ”